Di tỉnh Sóc Trăng meng tuk peih ngak tui Sarak ka 11 di Rajaei ka danak dak pasiam kinh tế - xã hội, rilo baoh sang kathaot, baoh sang jaik kathaot saong dom urang dalam sarak karei di tỉnh Sóc Trăng hu mesre phun jien samar drah. Meng nan, dom baoh sang kathaot hu tani tanat bruk pala drak pablei salih, dak harei dak yam tagok saong patruh kan kathaot khang kajap. Kuhria mbiah tal ini, taong abih jien brei mesre di dhar Gilang pariak Sarak karja tỉnh lac labaih 5.154 tỷ đồng, tagok labaih 700 tỷ đồng dut saong tukvak ini thun bloh, haong labaih 157.000 urang mesre oh ka bayar.

LĐLĐ quận Bình Tân, TP.HCM pambuak bruk haong Cong đoàn Cty TNHH Pouyuen Việt Nam bahrau peih ngak danak dak "dhar phor urang ngak" pachreih tui Bilan urang ngak mbang ka 16. Tapa nan, mban peih bruk hu brei 2 sổ tiết kiệm (yaom 5 triệu đồng yaok sổ) ka urang ngak njauk bala tuk ngak bruk saong daong ka 20 urang ngak gaok bala tuk ngak bruk (hu jien mbaok meng 500.000- 1 triệu đồng saong pok pandap). Piah thau dhar phor prein yava di urang ngak, Cty TNHH Pouyuen Việt Nam hu alin hadiah ameh brei ka 100 đoàn viên, urang ngak bruk di doanh nghiệp hu 15 thun. Yaok urang taduan hu 1 chi ameh. 

Piah daong dom HTX ngak bruk hu kein laba, tỉnh Trà Vinh daok peih ngak rilo sarak daong, yau daong HTX pandar, jao brei ilamo khoa hoc saong kong nghe; yaih khan, pambuak gauk, pachreih bruk pablei salih; hu mesre phun jien laba biar; daong urang ngak bruk saong sarak patagok cơ sở hạ tầng. Urak ini, Trà Vinh hu 1 lien hiep HTX, 168 HTX daok ngak bruk haong yaom phun jien dieu le labaih 180 tỷ đồng; dalam nan 125 HTX ngak bruk gah ngak nong.

Dalam tỉnh An Giang urak ini hu 56 labik kraong mbuan glut jaleih, atah abih tih labaih 181km. Dalam nan, 6 labik hu brei thau dahlau lac biak mbuan glut jaleih di tuk halei jeng hu. Makna ba tal glut jaleih lac kayua langik tasik srau kadau mai meng biến đổi khí hậu, meng dom thủy điện angaok kraong Mekong ngak brei kurang gluh baok pabak tame… Sở Tài nguyên & Môi trường tỉnh An Giang hu panuac kakei dom puk palei brei bhian tui iek saong khan brei rahra thau tuk mboh yau khin glut jaleih… Langiu di nan, oh caik brei tamuh tabiak bruk ramik ngak sang praong trak jang di tapen kraong, ribaong suan adat. Patagok pasang iek bruk kuac mek cuah kraong suan hukum.

Ndem ka bruk njauk jru mek pandap mbang rilo urang kayua mbang bánh mì di wuan Băng pak di Ban Long Khánh, Đồng Nai meng blaoh, tui UB bhap bini Ban Long Khánh, dalam labaih 560 urang njauk jru mek ye hu 124 uranaih, saong hu rilo uranaih njauk jru mek biak trak. Bruk njauk jru mek nan, lac biak trak damak, nan ye tui Hukum Hình sự, Hukum langyah bruk ngak suan gah hành chính, UB bhap bini Ban Long Khánh hu payua dom harak hồ sơ brei thau tuk camereip ka labik pablei salih nan ka Jabat Cảnh sát điều tra, Kong an Ban Long Khánh piah ngak brei cambaic laic tui hukum ba tabiak.

Campuchia saong Trung Quốc meda pasram haong gauk dalam bruk ieu lac “Ine girai ameh 2024” dalam bilan 5 tui dom bruk ngak haong gauk piah pacang khủng bố saong daong bruk ngak pahla. Ini lac bruk pasram haong gauk angan ieu "Ine girai ameh" Trung Quốc - Campuchia mbang ka 6, piah ngak brei khang kajap jang talei rohim di 2 taneh ia, paglaong ilamu pambuak bruk di bol lin 2 taneh ia saong ba gauk khik caga sron mbon, tani tanat dalam bhum. Mbang camereip abih, Campuchia haong Trung Quốc peih bruk pasram "ine girai ameh" haong gauk lac di thun 2016..

Harei ini, di tuk mon 12 jala pandiak (tui mon Moscow), adat tuyen the taduan bruk vaktu birau di Tổng thống Nga Vladimir Putin hu peih ngak dalam praong prang di Đại cung điện Kremlin. Bruk palih ruah Tổng thống Nga hu peih ngak meng harei 15/3 tal harei 17/3/ 2024. Ong Putin hu palih ruah ngak veik Tổng thống Nga mbang ka 5 ngan haong hala phieu biak glong. Tổng thống Vladimir Putin, umo 71 thun, daok patui bruk dang akaok negar Nga mbang ka 5, mbang ini dui atah 6 thun tui dom bruk ramik pasiam Hukum hu negar ini brei tapa thun 2020.

Mintri Y tế Thái Lan bahrau ini hu tabiak panuac brei thau dahlau ka pandiak pa-uh. Tui nan, menuac sia hu kakei brei takik ngak dom bruk langiu langik meng mon 11 jala tal mon 3 biar harei yaok harei saong eng drei tui iek bruk mebuk pandiak. Meyah mboh glaih glar atau mboh hu hagait karei dalam rup, brei nao khám chip. Dom harei tapa, Thái Lan jeng daok pandiak khang, hu labik, hu tuk langik pandiak meng 40-44 độ C. Di ban ine Bangkok, langik pandiak tal mangaok 52oC di harei 30/4./.