Tamat mbang ginum biai pang harak pathau khan, brei panuac ka jalan buh jien tame peih praong jalan TPHCM - Long Thành di Danak jalan mbak peih drah samar TPHCM - Long Thành - Dầu Giây peih tabiak page ini, Pho Thu tuong Trần Hồng Hà ndom lac, bruk peih praong jalan Ban raya HCM - Long Thành lac bruk njauk ngak, sumu haong dom quy hoạch jalan mbak, pabak bruk patagok kinh tế - xã hội. Danak dak peih drah samar Ban raya HCM - Long Thành - Dầu Giây vaktu ka 1 ba tame pandar meng harei 30/6/2016 atah 55km jalan. Urak ini,  Tổng Công ty Đầu tư patagok jalan peih drah samar Việt Nam brei roh duah, pok tagok likau brei peih praong jalan vành đai 2 TPHCM tal jalan peih drah samar Biên Hòa - Vũng Tàu ngan haong 8 jalan peih radaih, meda peih praong tagok 10 jalan radaih.

Meng mon 3 biar harei ini, anek saih tal bac 9 di TP.HCM hu tut angan hatai caong tame tal bac 10 tui jalan online. Ngan saong dom hatai caong tame tal bac 10 thường, yaok anek saih tut angan rilo di abih 3 hatai caong, dak tui meng glaong tal biar. Langiu di tut angan 3 hatai caong tame tal bac 10 thường, anek saih daok hu tut angan 3 hatai caong tame tal bac 10 chuyên atau tích hợp. Mbang pakacah pilih ruah anek saih tame tal bac 10 di TP.HCM hu peih tabiak di harei 6 - 7/6 tal haong 3 môn pakacah lac: Ngữ văn, Toán saong Ngoại ngữ. 

Urak ini, taong abih xã, phường dalam tỉnh Trà Vinh hu taduan tanut chuan palei pala birau, nan ye rilo Urang hu angan je meda oh daok brei thẻ BHYT. Anak bruk nan, HĐ bhap bini tỉnh Trà Vinhh bu ba tabiak Sarak  daong blei the BHYT ka Urang hu angan je  meng thun 2023- 2025. Tui nan, tỉnh brei daong taong abih jien blei BHYT ka Urang hu angan je dalam bhap bini bangsa takik; brei ka dom Urang hu angan je dalam sarak hu Akok UB bhap bini tỉnh mbaoh harak bo oh ka hu the BHYT saong oh daok dalam angan dom urang hu kadung jien Karja blei BHYT.

Pandiak bhang dui atah ngak ka jaik 600 menuac di xã biên giới Bù Gia Mập, huyện Bù Gia Mập, tỉnh Bình Phước gaok kan kandah ka ia pandar. Meng bruk sangka di karja palei, 2 bingun ia hu kuac rok daong ka mikva hu ia hacih piah pandar. Bingun nan hu jamriak njuk ia tự động tagok bồn padang ia 5 khối. Tuk ia dalam bồn thu, jamriak eng nyu njuk ia tagok. Jaik abih mikva dalam xã lac urang bangsa takik saong raidiuk gaok rilo kan kandah. Nan ye tuk hu ia hacih brei pandar saoh, mikva uan tabuan lo. 

Di huyen Hàm Thuận Nam, tỉnh Bình Thuận, 7 bilan tapa oh hu mbang hajan halei. Jeng labaih 2 bilan ini, rilo binek padang ia  saong dom canah kraong thu klen ia. Bruk nan daok ngak kan kandah trak tal raidiuk saong bruk ngak mbang pala drak di mikva urang nong. Rilo po bein pala thanh long oh khin druac gom hadah piah ngak brei tabiak bingu njauk tukvak. Daok di xã Tân Thuận hu tal 1.800 phun thanh long, min rilo bein phun metai thu kayua kurang ia.

QH Hàn Quốc brei tapa sa dự luật ieu peih bruk duah thau bahrau ka bala juak kateik gauk di Itaewon thun 2022. Dự luật tabiak bruk padang 1 UB piah duah thau makna ba tal bala. Harei 19/1 meng blaoh, cảnh sát trưởng ban ine Seoul njauk truy tố haong duas lac "oh caik hatai tal bruk ngak". Ong ini njauk cáo buộc lac oh ngak dom bruk njauk ngak yau ye ieu pataom cảnh sát njauk lagaih saong tui iek bruk, yaom lac bruk oh salamat meda kuhria mboh dahlau hu, ngan saong bruk bak menuac tapa prein di nyu di dom labik ngak bui, me-in sambai melam di tuk lễ.

Tui sa bruk pasang iek kayua rajaei Nhật Bản brei thau, kuhria tal bilan 10 thun 2023, hu labaih 9 trieu baoh sang klaak saoh di grauk labik dalam negar ini. Bruk tagok rilo dom baoh sang klak saoh, meda lac kayua urang taha daok sa drei plang lahik atau tame daok dalam labik raong urang taha, dalam tuk nan dom urang taduan sang daok ye palih ruah  labik diukrai hu lagaih jang. Dom baoh sang nan ngak trak damak tagok karja  dalam bruk peih ngak dom jalan yak klak atau brei pandar veik dom drap ar sang danaok oh hu manuac daok, kayua caik sang tamo meda mbuan ba tal glut jaleih, ba tal bala dalam bhum.

Indonesia  daok ba tabiak gac yaok rabau menuac daok jaik ceik pui Ruang di gah barak Sulawesi hadei di tuk nyu pruh mbang ka 2 dalam sa bilan tapa. Jabat pasang iek bala meng langik tasik pakat negar oh ka tatuan hu pathau khan halei ka dom menuac matai atau njauk rambus pambuak tal bruk ceik pui pruh nan. Min dom bruk ba menuac nao jeng daok hu peih tabiak ngak. Pulao Tagulandang hu jaik 9.000 menuac, karja daok ba 11 sruh kapal saong 1 sruh haoh trực thăng piah ba yaok rabau menuac daok veik. Karja jeng daok kuhria ba tabiak saong oh brei menuac daok di pulao Ruang kayua labik ini biak mbuan ba tal matai lahik./.