“Ilamo Cam Ninh Thuan – Quang Nam” – nan lac asal kadha parang iek kayua Gilang khik drap ar Quang Nam pambuak gam haong Pasak Roh duah Ilamo Bangsa saong Gilang khik drap ar tinh Ninh Thuan hu peih ngak bahrau ini. Parang iek yaih khan labaih 200 thaik praong 50 saong atah 70 cm, gam haong rilo tu lieu, ralaoh langyah saong ndap nda khao co hoc hu pambuak tal dom inem mek Cam, bimong kalan di Quang Nam. Taphia nan lac dom ilamo karei dalam raidiuk daok rai, adat cambat, bruk je tame yang mbang, bruk ngak lan, bruk jhik menyim jih dalah, ragam ragu bhjap bini, khan ao bangsa Cam Ninh Thuan saong dom ndap nda khao co hoc di dom labik bimong kalan Cam Hòa Lai, Po Rômé di dalam tinh Ninh Thuan.

Mentri Ilamo - Padhih the thao saong Yulit hu harak njauk hatai brei ka tinh Ca Mau peih bruk cuh phao bingu di 2 labik dalam danak dak daoh tamia pambuak rayo papar binguk salam uan dua tinh Ca Mau - Bac Lieu pagam tame hasa. Tukvak cuh oh tapa 15 minit, yaok labik brei cuh phao binguk hu 120 mejam phao. Phao cuh tagok langik meng 21 mon harei 30 bilan 6 anak tal, di Mblang bein Hung Vuong, Ban Bac Lieu saong Bein bingu phuong 5, Ban Ca Mau. Jien piah cuh phao kayua bhap bini daong brei.

Mban Pato tacei danak dak Tet bol lin – rahra tinh Kien Giang bahrau padang harei tabiak bol lin di Tet bol lin – rahra thun 2026 pagam haong bruk daok dang mbang ngui, sangka raidiuk rahra yau ye: padang 48 baoh sang ka dom urang mbang tui sarak; 2 danak dak truac hadah jalan bhum palei; padang bruk pasang iek ruak, pabak jru oh mek jien ka 1.000 mbang urang; alin jaik 1.000 paok pandap ka urang kathaot, jaik kathaot saong anek saih truh tapa kan kandah bac ta-a naih joi.

Tinh Dak Lak pambuak bruk haong Sang bac Cao đẳng Yulit Ban Gon peih tal bac pabak ilamo ngak bruk ka gah duk bilik padeih padei duh ka tuai damuai rah rivang ma-in yulit di Dak Lak, piah ngak hu siam jang dom bruk nan dalam bilan padeih he anak tal. Hu mbaok tame pasram jiak 50 urang bac lac urang ngak bruk gah duk bilik padei padei, urang khik iek dom labik padeih padei ka tuai damuai mai rah rivang main yulit di Dak Lak. Dalam 3 harei, dom urang bac hu pato dom asar kadha ka bruk duh ka duk bilik padeih padei ka tuai damuai, khik brei hacih sa-at, salamat saong siam mekre di labik rivang main.

Harak adat brei pandar pato tacei labik “Ngọc Linh” ndap nda akaok sam bahrau hu tinh Kon Tum jao brei ka 4 kapul saong menuac urang, dalam nan hu: Hop tac xa Pandap jru Hoàng Hiểu Tu Mơ Rông daok di xa Đăk Hà, huyen Tu Mơ Rông; Kapul pambuak pala Sam Ngọc Linh Đăk Xây daok di xa Xốp, huyen Đăk Glei saong 2 menuac urang: baoh sang ong A Sỹ, A Chung daok di xa Tê Xăng saong Măng Ri, huyen Tu Mơ Rông. 4 kapul saong menuac urang urak ini daok pala 5.800 phun sam Ngọc Linh meng umo 6 thun ba tagok.

Dom flim biak gheih “ F1” kayua urang naih joi Brad Pitt saong dom urang naih joi danei angan di dunya hu angan dalam flim hu tabiak brei iek, meda lac pakacah gauk blei harak ve dalam bilan he ini. Dalam flim “ F1”, Bard Pitt dalam angan sa urang pakacah jalan 1 padeih pakacah kayua gaok bala, alah metah min dalam hatai takre khin pakacah veik. Jien buh tame ngak tagok tal 200 trieu USD, Flim danei angan gheih “ F1” brei ka urang iek dom bruk pakacah peih radaih huac dang cada, takre meta, sap yawa ragam dalam flim biak bingi pang.  

Labik cih thaik di Ary Scheffer di Paris, Prang lac labik taom gaok mbaok chreih chrai di dom urang cih thaik, urang ngak van saong rapaneh ragu ragam di akaok abap 19 – dalam nan hu Chopin. Hatai di dom mbang taom gaok mbaok di dom nghe si danei angan hu pamedeih dalam sa mbang parang bahrau ini. Tui dom urang padang mbang parang, ini oh lac kadha ka nghe thuat saong ragu ragam bo daok lac kadha ka ayut sahabat, drut druai saong hadar hagait meng kal.

Tây Ban Nha brei thau ka sarak hu mbaok tangin samar hu tame dom sang bac ndai hoc di taneh ia ini ngan haong sinh vien dunya bo karja di Tong thong My Donald Trump takik brei harak gal tame My bac megru. Tay Ban Nha dang dhi ka 3 dalam dom bruk palih ruah  akaok meti ka sinh vien My caong khin nao bac, hadei Negar Anh saong Italia. Takik abih 20.000 sinh vien negar langiu payua harak likau sarak yaok thun piah tame Tay Ban Nha bac./.