UBND TPHCM njauk hatai haong bruk ba tabiak di So Ngak nong saong Moi truong ka bruk pandar veik yaom taneh yau urak ini di TPHCM (klak), Binh Duong (klak) saong Bà Rịa - Vũng Tàu (klak) tal luac thun 2025, blaoh nan ba tabiak yaom taneh birau meng kaok thun 2026. Bruk kuhria tui yaom taneh klak tal luac thun ini piah khik brei tani tanat bruk kuhria jien pandar taneh ka bhap bini, po ngak mbang pablei salih taneh riya.

Mbiah tal ini, dom xa, phuong, dac khu di tỉnh An Giang  birau ngak blaoh bruk ramik jabat karja tame ngak bruk hu tani tanat. Pasak ngak bruk harak gal karja pakat xã brei parabha rajakar, urang ndoan tacei pato bhap bini ngak harak gal karja, abih di nyu lac pato ngak harak gal ho so jit vu karja online. Hu labik taduan bhap bini, ba mbuan lagaih ka bhap bini peih ngak dom harak gal ho so ngak bruk dalam harei.

1.200 urang doan dam dara halan hatian hu mbaok di 124 pasak ngak bruk harak gal karja pakat xã dalam tinh Lam Dong piah tacei pato bhap bini mek taka so, pagam angan je ndien tu, tut angan tai khoan bhap bini dien tu…Tui nan, tacei pato, langyah saong daong duah dom khaw tin njauk hu ka harak gal, jitvu kong online. Bruk nan rik tame  ngak trun tukvak taduan saong langyah harak gal ho so, abih di nyu lac dom bhum atah bayah, bhum urang bangsa takik daok kurang oh ka thau pandar kong nghe di dien thoai smarphone.

Mban Khik iek danak dak buh jien padang ngak dom jalan mbak TPHCM peih ngak  tatua Rạch Tôm di xã Hiệp Phước, kuhria abih tih jien buh tame ngak labaih 497 ti dong, piah salih tatua pasei klak khut jaoh saong pakhang bruik pambuak dom bhum haong tinh Tay Ninh ( tinh Long An dahlau diah). Ini lac sa dalam dom danak dak hu makna praong piah salih birau jalan mbak di bhum gah Meraong TP.HCM, plaik njiak bruk gal tavak jalan saong rik tame patagok kinh te-xa hoi. Tui kuhria mboh dahlau danak dak nan ngak salah blaoh ba tame pandar meng harei 31/12/2026.  

Dong Thap lac bhum palei hu labik pala durian pablei tabiak negar langiu praong abih di Bhum taneran kraong Cuu Long, labaih 28.000 ha hu rilo pajaih siam, darak pasar takre blei. Urak ini tinh daok peih ngak rilo jalan piah pasiam veik bruk njom cadimi, khik pabak ginup baoh pablei tabiak negar langiu. Tui nan, peih bruk pato pakai ilamo la urang jakar, labik papaok tui bruk ba tabiak di dom taneh ia blei tame, njauk ndem tal bruk ngak tabiak kaya mbang hacih sa-at.

Meng akaok thun mbiah tal ini Campuchia hu 7 ribau mbang urang njom ruak  pandiak tabiak darak. Njauk ndem tal, dalam nan hu 15 urang metai lac uranaih. Tui dom urang gah y te Campuchia, bruk uranaih ruak pandiak tabiak darah metai di taneh ia ini lac kayua urang ngak amaik ame atau urang iek glang oh caik hatai sangka, suai ba uranaih nao iek ruak saong jru ruak.

Jabat chuc nang Thai Lan kakei dahlau meng harei ini tal harei 15 bilan 7 anak tal di ban ine Bangkok saong rilo bhum jaik taphia meda dauk dalam ia kayua ia di kraong Chao Phraya tagok glong meng 1met 7 tal 2 met dut saong mbaok ia tasik. Jabat chuc nang iew bhap bini daok jiak kraong Chao Phraya ramik ndap nda pandon tagok glong klak ia dauk saong khik brei salamat.

Tapa pasang iek di Uy mban salamat jalan mbak pakat negar Indonesia khan lac, bruk ba tal  kapal gilai pajeng tuai saong radaih oto karam di eo tasik Bali di harei 4 bilan 7 meng blaoh meda lac urang peih gilai var kareik pambang bilik mac  dahlau tuk tabiak tasik ngak ia tasik tame gilai tuk riyak praong. Bala ngak metai 9 urang, 27 urang lahik meda lac urang lahik daok ralo jang./.