Dalam tuk yaom padai brah pablei tabiak langiu negar trun kayua padai labaih rilo dalam dunya, Mentri Ngak nong saong Alam langik caik hatai sangka ka dom gah ngak mbang pablei salih saong urang ngak nong daok di Bhum taneran kraong Cuu Long brei roh duah piah pasiam bruk ngak tabiak saong padai siam bangi. Dalam nan brei pataom ngak tabiak dom pajaih padai siam bangi saong hu yaom glaong, paglaong bruk pandar ilamo kong nghe bahrau, ngak tani tanat piah paglaong bruk khik piah, khik ramik brah piah duh ka darak pasar pablei tabiak langiu negar karo kajap saong jaik taphia haong alam langik.

Tui kuhria di So Pato megru TP.HCM anak tal brei pakauk anek saih padar ndien thoai gam tuk tabiak ma-in saong dalam dom bruk pato pakai di sang bac. Gam haong nan, brei hu jalan peih dom bruk ma-in karei piah anek saih main haong gauk gam pasram rup pabhap padhih the thao. Meng thun bac dahlau, rilo sang bac di TPHCM (klak) brei pakauk anek saih pandar phone. Hadei tukvak ngak tui, anek saih hu mbaok tame dom bruk ma-in sambai, padhih the thao, bac tapuk saong thau anit ranam gauk jang.

Hadei pagam tinh, tinh Gia Lai (bahrau) daok gaok rilo kan kandah dalam gah kraong ribaong  pabak ginup ia min bruk pandar oh ka njauk tui bruk caong takre ba mai kein laba. Gia Lai kuhria buh jien tame labaih 17.000 ty dong piah pasiam bruk tuh pruh ia, piah pabak hatai caong patagok gah ngak nong ilamo kong nghe glaong saong padang dom bhum pala kaya nong praong. Ong Hồ Quốc Dũng, Bi thu Tinh uy Gia Lai ndom lac, dalam 5 thun anak tal bo oh langyah hu halau ia ka dom labik daok kurang ye biak hu duas haong rahra.

Yaom durian di Bhum taneran kraong Cuu Long daok di tanut biar. Bruk ba tal kayua langik hajan ribuk rilo ngak ka rilo durian ngy pran khang, baoh takik bingi oh pablei tabiak negar langiu hu. Dom bhum pala daok veik kayua baoh kandong jru pakauk ba tal kan pablei tabiak. Tukvak tapa, tinh Tiền Giang (klak) ngak iek dom bruk ngak hacih Cadimi daok kandong labaih dalam taneh tapa bruk oh buh khak hu asar Cadimi, bạc hà, cur, vi sinh, biochar…Hadei 4 bilan, dom taka so Cadimi dalam taneh saong dhar hala trun, yau nan min, tal bilan paik baoh anak tal meng thau cambaic laic.

Enam bilan tapa Viet Nam raok labaih 10 trieu mbang tuai damuai dunya, tagok jaik 21% dut haong tukvak ini thun dahlau. Thun ini, gah Yulit Viet Nam kuhria raok meng 22 – 23 trieu mbang tuai damuai dunya, brei mboh bruk medeih khang kajap di gah yulit. Ong Nguyễn Quốc Kỳ, Akaok VietTravel brei thau, meng ini tal thun 2030, yaok thun, gah yulit brei rik daong veik 1% tame bruk cakrok GDP di Viet Nam. Piah mek hu bruk ini, brei hu rilo bruk daong, buh jien tame patagok dom kongti gah rah rivang ba tuai damuai dunya mai Viet Nam.

Thái Lan brei ngak iek dahlau dom labik pablei cansa hu harak gal piah ngak jru y te iek ruak. Tui nan, memng ini tal puac thun, dom labik pablei casa brei ngak iek dahlau labik  pablei tui harak gal. Urang pablei pandap hu pato pakai ayua Cục Y học bangsa Thái Lan. Dom urang blei saong pandar cansa brei hu harak gal gah y te saong harak angan jru di gru jru iek ruak. Cansa y te brei pabak dom bruk caong khin saong dom tanut chuan cambaic laic.

Bilan ndik ceik Phú Sĩ di Nhat Ban -Japon peih ngak tuk 3 jalan sit daok veik di tỉnh Shizuoka hu peih. Karja 2 bhum palei hu jalan ndik ceik brei mek jien jalan lac 4.000 yen (27 USD). Dua bhum palei ini ba tabiak jalan pacang caga dom urang ndik ceik kham ndik tagok tabung glong dalam melam sup salih ka bruk ndih veik  do dom tadai tuan tapen jalan. Ceik Phú Sĩ, hu taduan angan lac Drap ar ilamo dunya UNESCO thun 2013, pachreih yaok rituh ribau urang ndik ceik yaok thun.

Karja Tong thong My Donald Trump payua harak yak bang California, ndem puac ka dom kadha adat ka baoh manuk saong var ro raong manuk ada dalam hukum taong sik ngak rilo athur glai di bang ini ngak ka baoh manuk ada tagok yaom dalam negar. Thun 2008 saong 2018, bang California ba tabiak dom adat hukum, dalam nan pakauk urang raong kareik manuk dalam var rilo drei katil ginik. Dom hukum nan piah takik ngak pap di menuk ada saong mbuan njom ruak tame pandap mbang. Dom bang pablei baoh manuk ka California njauk brei ngak tui hukum nan./.