Page ini (7/5), di tỉnh Điện Biên peih bruk Pahadar, diễu binh, diễu hành 70 thun Jayah Điện Biên Phủ (7/5/1954-7/5/2024). Bruk pahadar piah pok meyaom bol lin, brei mboh makna, labik dang, sajarah dakrai praong glong di Jayah Điện Biên Phủ. Jayak Điện Biên Phủ  “danei angan angaok dunya, tayun megei baoh taneh” lac sa dalam dom tabung glong hadah tanyak, hu vak tame sajarah mesruh metak  pacang kol khang mang di bangsa Viet Nam yau sa Bạch Đằng, sa Chi Lăng atau sa Đống Đa dalam abap 20, pacap rajaei Prang mbaoh tangin tame Hiep dinh Geneva, taduan bruk độc lập, ngak po, yasa saong taong abih klau taneh ia Đông Dương, tamat bruk mesruh metah suai lavik, biak rambah rambeip dui tah 9 thun (1945 -1954). Tui nan, padeih bruk kateik greik di kol Prang dui atah rituh thun, peih tabiak bruk cak rok patagok birau ka cách mạng Viet Nam, Lào, Campuchia.

Huyện Thạnh Trị, tỉnh Sóc Trăng hu rilo urang bangsa takik. Dalam 5 thun tapa, huyện hu buh jien tabiak padang ngak bahrau saong ba tame pandar 225 danak dak, dalam nan, rilo cơ sở hạ tầng bahrau hu buh jien padang ngak dalam bhum urang bangsa. Abih di nyu lac, padang bahrau saong ngak pasiam 868 baoh sang jum pataom ka mikva kan kandah gah sang daok. Gam haong nan, hu buh tabiak labaih 8,6 tỷ đồng piah daong jien điện, blei thẻ BHYT ka urang kan kathaot, jaik si kan kathaot. Tal urak ini, jien mek tame khria tui akaok menuac hu jaik 69 triệu sa urang sa thun, raidiuk mbang ngui daok dang di bhap bini dak harei dak hu siam jang. 

Urak ini, rilo urang ngak nong di Bạc Liêu oh ngak njauk tui tukvak ba tabiak di gah ngak nong, “ ngak tui hatai” trun pajaih padai Hè Thu aval di kreh bilan pandiak bhang. Anak bruk nan, Akok UB bhap bini tỉnh Bạc Liêu tacei pato Sở Ngak nong saong patagok palei pala brei patui bruk pambuak haong dom bhum palei patagok pathau khan, tacei pato  bhap bini ngak tui panuac kakei di gah ngak nong oh brei trun pajaih  padai bilan Hè Thu 2024 di dom  bhum  oh ka hu ia taba tani tanat, brei peih bruk pala drak tuk hu hajan praong ralo labik atau di bhum hu halau ia tani tanat.

Rilo labik dalam bhum ĐBSCL daok gaok kan kandah kayua kurang ia pruh ka phun pala, min di tỉnh Hậu Giang oh ka mboh khut khat kayua pandiak bhang, ia njom mbak. Tui panuac khan di ong Ngô Minh Long – Yam ndok Sở Ngak nong saong Patagok palei pala tỉnh Hậu Giang, meng di tuk yam tame bilan thu 2023-2024, gah ngak nong brei ramik veik, salih janih phun pala, athur raong ka nyu lagaih haong langik tasik di yaok labik, brei kuac raok gluh baok dom kraong ribaong dalam mblang hamu piah khik hu ia rilo di abih. Meng nan bo Hậu Giang yam tapa hu bilan pandiak bhang, ia njom mbak khang di thun ini.

Tui Pasak tui iek bruk Langik tasik pakat negar, meng harei ini tal 11/5, Đông Nam Bộ meda hu mbang ia ndik birau, ia di balai Vũng Tàu tagok di tanut 4m. Gam ia ndik, riyak khang daok rah tabiak mbuan glut jaleih ar kraong, ar ribaong, ar tasik, ar pacang, ngak kan kandah tal raidiuk saong bruk ngak mbang ngak huak, menei gei di bhap bini. Piah pacang caga, trun takik khat lahik, Jabat thuong truc Mban tacei jalan pakat negar ka bruk pacang caga bala meng langik tasik  caong khin dom tỉnh, ban tui iek  tani tanat dom khaw tin kuhria mboh dahlau, khan brei karja, bhap bini thau piah plaik caga.   

Di Ấn Độ, pandiak bhang jeng daok hu di rilo labik, ngak kan kandah tal raidiuk di yaok triệu menuac. Dom mblang hamu thu lagu, dom bingun ia thu abih ia, lac bruk di rilo bhum palei dalam mbang Maharashtra, gah pai Ấn Độ di tuk ini. Dom thun jaik ini, Ấn Độ bhian hu dom mbang pandiak khang saong thu lagu dui atah. Gah tui iek bruk langik tasik kuhria mboh lac Ấn Độ daok hu rilo harei pandiak bhang dalam 2 bilan tal, lac tukvak bhian hu ngin daong ngak patrun pandiak.

Rajaei Bangladesh brei thau, takik abih 15 urang metai kayua pandiak khang di rilo labik dalam taneh ia ini 2 adit tapa. Jaik abih dom urang metai daok di Tây Nam  taneh ia ini, labik pandiak glong 43,8 độ C dalam adit dahlau. Bangladesh daok gaok kan kandah anak sa dalam mbang pandiak khang abih dalam dom thun ini mai. Piah pacang caga pandiak bhang, rajaei brei kakeih pabah mbang sang bac dalam taneh ia.

Hajan ia sua saong glut jaleih taneh khang di gah meraong Braxin ngak brei takik di abih 83 urang matai. Dom menuac metai daok hu rilo jang kayua urak ini daok hu labaih 111 urang daok lahik. Hajan ia sua jeng ngak brei 122 rabau menuac hu ba nao labik karei samar drah. Ini hu maong lac bala khí hậu praong abih kuhria meng dahlau mai dalam bhum Mỹ La-tinh. Dahlau nan di bilan 9/2023, taneh ia ini hu mbang ngin rabuk ngak brei 31 urang matai./.