# Melam kabroi 13/1, pak Hà Nội, Hội Chữ thập đỏ Việt Nam peih  danak dak “Pren khang pah hala 2019” ngan haong kadha “Tết brei ka urang kathaot saong urang njauk jruk mek kalik kruac” Xuân Kỷ Hợi 2019. Mai pataom mbaok hu Tổng Bí thư, akaok negar Nguyễn Phú Trọng. Tapa nan, Trung ương Hội chữ thập đỏ Việt Nam hu brei thau lac Tổng Bí thư, Akaok negar Nguyễn Phú Trọng nan lac Chủ tịch danh dự Hội Chữ thập đỏ Việt Nam. Brei panuac dalam danak dak, Tổng Bí thư, Akaok negar Nguyễn Phú Trọng pok sap iew dom jabat, kapul nyaom, doanh nghiệp, urang ngak pahla saong dom rairah bhap bani gam saong Hội Chữ thập đỏ Việt Nam rik pren haong Đảng saong karja, daong ka urang kathoat, urang hu rai diuk kan kandah. 

# Harei ini (14/1),  di ban sit Gia Nghĩa, tỉnh Đắk Nông rah tabiak nyom biai xúc tiến đầu tư tỉnh Đắk Nông thun 2019, hu mbaok jaik 1.000 urang, dalam nan hu jaik 700 urang đầu tư. Tapa nan, UBND tỉnh Đắk Nông hu brei harak chứng nhận tut angan đầu tư  ka dom dự án praong dalam tỉnh yau: Dự án sang mac điện ia harei hu yaom jien buh tame ngak abih tih 1.108 tỷ đồng di Công ty CP sang mac Điện ia harei Trúc Sơn; Dự án điện ia harei hu yaom jien buh tame ngak jaik 1.250 tỷ đồng di Công ty CP Thủy điện Miền Trung; Dự án ngak nong kong nghe glaong saong du lịch sinh thái Phước Sơn hu yaom jien buh tame ngak 80 tỷ đồng di huyện Đắk R’Lấp… Abih tih phun jien buh tame ngak di dom dự án hu brei harak tut angan đầu tư lac labaih 4.000 tỷ đồng, lac yaom praong abih kuhria meng tuk padang tỉnh tal harei ini. 

# Biar harei sup 13/1, sa sruh gilai taong ikan tuan biển kiểm soát KG-1948TS di ôog Lưu Văn Hầu, ndih tapui thun 1966 daok pataok angaok kênh Ông Hiển, TP Rạch Giá njauk apui khuah. Hadei di nan, dalah apui pambak tapa 3 baoh sang daok tapen kraong, ngak ka 3 baoh sang jaik di nan njauk apui khuah abih. Mbang khuah oh ngak ka manuac urang metai lahik, jabat chức năng daok yaok iek khat lahik gah drap ar saong peih bruk pasang iek duah thau ka makna mbang khuah.

# Tui Mintri Công an, dalam 4 thun jaik di ini, dalam taneh ia rah tabiak labaih 7 rabau 600 bruk phạm pháp hình sự pambuak tal tín dụng đen. Dalam nan hu 56 mbang pametai menuac, 398 taong paoh urang, 629 mbnag blah drap ar, 836 mbang blah mek jien padai. Gam saong nan, hu labaih 2 mbang pachot, ieu pataom phun jien yaok rabau tỷ đồng bloh nduac klak sraiy. Urak ini, gah cảnh sát hình sự daok tui iek, ngak brei cambaih laih labaih 200 băng nhóm pambuak tal bruk tín dụng đen ngan saong jaik 2 urang dreih yau dom bruk chap mek di Thanh Hóa, Bắc Ninh, Đắk Lắk…Tui bruk mesruh pacang kol tội phạm, khik sron mbon ka Tết thun sak pabui 2019, gah công an daok patagok bruk tui iek, duah thau, kaoh tui adat dom kol brei mesraiy trak laba dalam tukvak ini.

# Dalam adit akaok mereip di thun 2019, TPHCM hu 60 urang njauk ruak sởi. urak ini, 24/24 quận, huyện jeng hu mboh urang njauk ruak sởi, dom quận hu rilo urang njauk ruak nan lac: Thủ Đức, 8, 12 saong Bình Tân. Di dom sang iek ruak, manuac urang tame sang iek ruak dak harei dak rilo, pagap yau sang iek ruak Bệnh Nhiệt đới TPHCM, kuhria meng akaok thun tal ini hu 62 urang tame iek ruak, oh ka kuhria urang mai pasang iek ruak saong điều trị ngoại trú. Kadha njauk huac kanda nan lac hu rilo urang metian njauk ruak sởi hu ndih tapui tuk daok pasang iek ruak.

Khaw tin dunya:

#Dalam bui sambai uan raok Thun bahrau saong uan Tết thun sak pabui 2019, melam 13/1, di ký túc xá sang bac Đại học Hoàng gia Phnom Penh, ban ine Phnom Penh, kapul anek saih Việt Nam di Campuchia hu peih malam ilamu, daoh tamia, taom gaok, ndom biai nao mai uan raokThun bahrau 2019, uan Tết meng kan di bangsa. Tapa nan, dom anek saih Việt Nam hu parang me-in rilo kadha daoh tamia ndung bak ilamu Việt Nam saong Cam-pu-chia. Jeng tapa nan, dom anek saih Việt Nam hu thau ka harei tết jum pataom tapen dom gru pato, dom ayut sahabat Cam-pu-chia saong dunya. Urak ini hu labaih 150 sinh viên Việt Nam daok bac di Cam-pu-chia.

# Harei 13/1, takik di abih 20 urang metai hu ba tabiak truh labik rah tabiak bala hadei di tuk sa sruh radaih pajeng ginuh tame darak Iworoko hu rilo manuac di bang Ekiti gah meraong Nigeria. Urang tabiak panuac di cảnh sát bang Ekiti brei thau, urang peih radaih di sruh radaih pajeng bak brah lahik kiểm soát saong nduac tapak tame darak Iworoko. Urang njauk bala mboh rilo nan lac dom urang daok pablei salih gah langiu darak. Tui dom urang hu mbaok pak nan, di tukvak rah tabiak bala, sruh radaih daok nao haong tốc độ biak glaong.

# Sa mbang megei baoh taneh khang 5,4 độ rích-te bahrau rah tabiak di labik atah di ban An-co-rết (Anchorage), tiểu bang A-lát-xca (Alaska), Mỹ jaik 14 ki-lô-mét nao gah Tây Bắc. Tui jabat pasang iek địa chất Mỹ,  mbang megei baoh taneh di labik dalam 33 ki-lô-mét, hukhu dân cư jaik di abih lac Poi Mác-ken-di (Point MacKenzie) atah di nan 11 ki-lô-mét. Urak ini oh ka thau metai lahik yau habar. Min rilo menuac hu tagok Tuýt-tơ brei thau ka mbang megei baoh taneh dalam harei puac adit./.