# Harei 15/1,Thủ tướng Nguyễn Xuân Phúc hu mai rivang, alin brei pandap Tết ka 100 baoh sang kathaot daok di Buôn Nui, huyện Cư Jút, tỉnh Đắk Nông. Pak ini, Thủ tướng pandar karja puk palei sangka jang tal yaok baoh sang, yaok manuac urang, oh caik ka thei eil lipa. Thủ tướng caong khin mikva uan raok Tết siam mekre, juai menyum rilo alak tapai, oh pakacah radaih suan adat hukum, oh ma-in mbia… Taphia di nan, kuhria caga taong abih janih ngak mbang pala drak piah hadei di Tết oh gaok kan kandah; peih tabiak dom bruk pala glai, puh ramik labik daok, mong iek, nao rivang baoh sang kathaot, kan kandah, baoh sang sarak karja… Buôn Nui, xã Tâm Thắng urak ini hu 279 baoh sang ngan haong labaih 1.100 urang, dalam nan rilo meng lac mikva bangsa Ê đê.

# Dalam 5 thun tapa, tanut patagok Rajaei điện tử di Việt Nam tagok hu 11 tanut, ba Việt Nam hu tame top dom taneh ia patagok Rajaei điện tử di tanut glaong. Bruk nan hu Liên Hợp Quốc bahrau brei thau. Tui nan, thun 2018, tanut dịch vụ công trực tuyến di Việt Nam tagok hu 15 tanut dut saong 2 thun dahlau di nan, tanut nguồn nhân lực glaong jang tanut kuhria rah tapa di dunya. Urak ini, Việt Nam daok dang di tanut 88 dalam 193 taneh ia di dunya saong dang ka 6 dalam 11 khu vực ASEAN ka tanut patagok Rajaei điện tử.

# Sang bac đại học công nghệ miền Đông, xã Xuân Thạnh, huyện Thống Nhất, tỉnh Đồng Nai bahrau peih ngak danak dak Xuân trei sil uan raok tết meng kan di bangsa saong salam uan 89 thun Harei padang Đảng Cộng sản Việt Nam (3/2/1930 -3/2/2019). Ban giám hiệu sang bac hu alin brei 32 harak vé radaih ka sinh viên, gru pato hu rai diuk kan kandah nao palei mbang tết; pok brei 16 pok jien bac ka sinh viên kan kandah; 15 pok pandap tết ka bhap bani puk palei hu rai diuk kan kandah, urang jaoh jo, urang taha daok sa drei di puk palei saong pok meyaom ka  21 sinh viên bac megru naih jioy ngan haong yaom jien abih tih labaih 306 triệu đồng.

# 11 labik pablei xăng menyek di TP.HCM daok ba tabiak pandar bruk Tự động hóa pablei rai xăng menyek meng harei 15/1. Ini lac dom labik pablei xăng menyek di Công ty Xăng menyek khu vực II (Petrolimex Sài Gòn). Tui nan, tuai meda ngak eng dom bruk yau tui xang tui yaom jien, tui lít, tui janih xăng, eng drei bayar jien tapa thẻ saong eng drei tuh xăng tame radaih di drei.

# Meng ini tal harei 26/1/2019, tỉnh Kiên Giang hu 9 mbang ba pandap grap tanat yaom kaom mai tal bhum atah bayah, bhum tapen negar saong pulao akaok piah duh ka bruk blei pandar di bhap bani tuk Tết Nguyên đán Kỷ Hợi. Amuk Nguyễn Thị Quốc Thuận, Phaok akaok siêu thị Co.op-mart Kiên Giang brei thau, pandap panda ba mai palei pala, bhum atah bayah, bhum tapen negar, pulao kaoh labaih 80 tấn, yaom abih tih labaih 2,3 tỷ đồng. Pandap panda hu mbaok dalam danak dak grap tanat yaom kaom mboh biak rilo janih, khik kajap chất lượng, vệ sinh an toàn pandap mbang menyum, yaom kaom jeng gap takre kayua dom labik ngak, doanh nghiệp hu angan je dalam saong langiu tỉnh ngak tabiak. Dalam nan, rilo meng lac pandap pandar, pandap mbang menyum di bhap bani dalam tuk tết.  

Khaw tin dunya

# Thái Lan hu tabiak bruk dui atah bruk miễn thị thực ka menuac sia di dom taneh ia. Tukvak bahrau, lac tal puac bilan 4/2019, oh lac harei 13/1 meng bloh. Urang jakar ngak praong di Bangkok hu ngak tui bruk miễn thị thực ngan saong yaom jien 2.000 baht (lac jaik 60USD) ka menuac sia di 20 taneh ia, dalam nan hu Trung Quốc, meng bilan 11 thun bloh.

# Langik la-ar saong kurang bruk mong iek y tế daok ngak ka takik abih 15 uranaih tỵ nạn Xyri metai dalam dom adit jaik di ini. Đặc phái viên bahrau di Liên hợp quốc iek gah Xyri, ong Gie–ơ Pe-đơ-sừn (Geir Pedersen daok rivang Đa-mát caong khin dom gah pasiam veik bruk ngak pahla di dom labik di Xyri.

# Quốc hội Singapore bahrau brei tapa dự luật bahrau ka Dịch vụ thanh toán, dalam nan patabiak dom paka cambaih laih pambuak tal bruk thanh toán điện tử piah jhul patagok dom giao dịch ph pandar tal jien di taneh ia ini. Tui hukum bharau, bhap bini Singapore oh brei suak mek jien meng dom tài khoản jien điện tử. Lingiu di nan, hukum jeng tabiak bruk lac tài khoản cá nhân oh brei tapa 5.000 dollar Singapore (lac jaik 3.700USD) saong abih tih jien thanh toán meng tài khoản dalam 1 thun oh tapa 30.000 dollar Singapore (lac labaih 22.100USD), lingiu di bruk chuyển khoản tame tài khoản gilang pariak hu chỉ định di urang pandar./.