# Gilang pariak karja bahrau tabiak Thông tư ka 41/2018/TT-NHNN pasiam veik, pabak dom paka di Thông tư ka 19/2016 brei thau ka hoạt động thẻ gilang pariak. Sa dalam dom  asal kadha njauk caik hatai dalam thông tư ini nan lac gilang pariak karja hu ba tabiak jalan ngak cambaih laih ka bruk salih taong abih thẻ ATM ngak meng thẻ từ tapa thẻ chip. Tui jalan ngak, tal harei 31/12/2019, takik abih 30% dom thẻ; tal harei 31/12/2020, takik abih 60% saong tal harei 31/12/2021, 100% dom thẻ hu BIN kayua Gilang pariak Karja ngak daok di dom kapul nyaom phát hành thẻ ngak njauk haong Tiêu chuẩn cơ sở ka thẻ chip nội địa. Thông tư hu peih ngak meng harei 18/2.

# pamoang tal bruk pahadar 89 thun harei padang Đảng cộng sản Việt Nam (3/2/1930 - 3/2/2019, Liên đoàn Lao động TPHCM bahrau peih bruk pok meyaom “Kreih camin hadah urang Đảng”. 54  kreih camin urang  đảng hu pok meyaom, lac dom urang ngak tapak saong urang ngak gah dịch vụ hu rilo rik daong, naih gheih dalam bruk ngak, dalam bac megru, pasiam paglaong jalan diukrai.

# Bahrau ini, tuk pah urang ngak takac ribaong dalam bein, ong Trần Minh Đức, daok di ấp Trung, xã Dưỡng Điềm, huyện Châu Thành, tỉnh Tiền Giang hu duah mboh sa “ổ” đạn pháo, dalam nan hu 5 baoh pháo janih 105mm daok dalam haluk dalam jaik 0,5 mét. Yaok baoh đạn pháo ini atah jaik 0,5 mét, trak jaik 4kg, nyu craih abih. Thau hu bruk nan,  Ban Chỉ huy quân sự huyện Châu Thành hu brei menuac di drei trun nao piah pataom mek dom baoh đạn pháo ini piah am cuh klaak, khik grap tanat an toàn ka rai diuk bhap bani.

# Urak ini, bruk urang pablei salih nhập lậu ralow pabui, pabui anek, pajeng ba suan adat hukum tame Việt Nam piah pablei daok ngak brei mbuan njom mbak jit tả pabui Châu Phi tame Việt Nam. Anak bruk ini, UBND TPHCM hu tacei gah chức năng peih ngak rilo jalan piah pacang cakak saong saong khik caga siam mekre, hacih sa-at pandap mbang menyum, abih di nyu nan lac tuk Tết Nguyên đán. Urak ini, yaok harei  TPHCM mbang labaih 10.000 drei pabui, dalam tuk dom pabui raong dalam ban raya tok pabak hu 18-20%, daok veik lac pabui blei meng dom tỉnh ban karei. 

# Chi cục pala drak saong Pacang khik phun pala tỉnh Bến Tre bahrau tabiak Quyết định taong phạt 40 triệu đồng po labik ngak ratak tamuh  Hồng Ngọc nan lac ong Nguyễn Quang Hoàng daok di ấp 3, xã Long Hòa, huyện Bình Đại ka bruk pandar chất cấm, hóa chất oh thau cambaih laih asal di nyu, oh ka brei adat pandar di Việt Nam dalam bruk ngak tabiak njaok. Gah chức năng  pandar po cơ sở ini njauk ba am cuh klaak 520 ống jru oh thau cambaih asal di nyu mai meng harei saong 172 thùng njaok.

Khaw tin dunya:

# Thủ tướng Ô-xtrây-li-a Xcốt Mô-ri-sơn (Scott Morrison) bahrau payua panuac klah rabha pandik harao tal sang 1 sinh viên Ixraen daok bac di ban Men-bơn (Melbourne), njauk urang pametai jaik sang bac bo anai daok bac. Thủ tướng Ô-xtrây-li-a brei thau, ong biak pandik harap saong ndom oh tabiak panuac tuk mehit bruk nan, saong brei thau quyền hu mai tal sang siam mekre salamat di abih menuac sia daok di Ô-xtrây-li-a. Thi thể kumei sinh viên Mát-xa-uê (Maasarwe), 21 thun hu mboh di jalan nao takai di mesup harei 16/1 meng bloh, jaik sang bac đại học La Trô-bê (La Trobe), gah Đông Bắc Men-bơn – ban praong ka 2 di Ô-xtrây-li-a.

# Cục khik iek môi trường Bộ tài nguyên môi trường Thái Lan bahrau tabiak panuac brei thau ka bruk ô nhiễm môi trường di bhum Băng-cốc saong dom bhum jaik taphia dak harei dak trak jang. Cambaih laih, Cục khik iek môi trường Thái Lan brei thau, urak ini hu biak rilo labik dalam bal ine Băng-cốc jeng yau dom labik jaik taphia nồng độ thak/dhul biak sit (2.5 PM) tapa tanutg brei phép (ngưỡng brei phép 50 micro gram/M3) saong meda ngak kanjah jak tal pren yava di menuac sia.

# Dalam panuac khan bahrau ini, Hiệp hội Nông nghiệp Italy brei thau Ủy ban châu Âu (EC) meda kak je brah blei meng Campuchia saong Myanmar piah patrun bruk patagok brah blei meng 2 taneh ia ini. Dahlau di nan, bilan 3/2018, EC hu peih pasang iek piah thau lac brah blei meng Campuchia saong Myanmar meda ngak kan kandah trak ka dom labik ngak dom pandap dreih yau nan di EU halei oh. Tapa nan mboh lac brah blei meng 2 taneh ia nan daok ngak kan kandah ka gah padai  brah di EU./.