Hareik tamuh di rilo labik mboh biak mekre 

Hu hatai caong khin padang mbang ngui meng bilan 6.2019, No ba tangin tame ngak chip bo oh huac kanda hagait kayua hatai saneng “hijao” saong hatung hatian di sa urang ranaih anit ranam langik tasik. Meng tuk hu dom urang blei pandar akaok mereip lac dom ribau nding tal puac thun 2019, nyu tagok tal dom pluh ribau. Kayua kan kandah di jit COVID-19, dom pandap pablei tapa negar langiu gaok rilo kan kandah, min 400.000 nding njuk ngak meng phun hareik jeng samu tagok jalan nao tapa Đức. Meng nan nyu pabak pren khang ka urang likei dam ranaih duah thau pasiam veik mac moc piah patagok sản lượng, patrun yaom phun di pandap.  

Yaom lac jit ruak ngak ka dom bruk ngak dang veik min urak ini, labaih 2 triệu nding njuk meng phun hareik hu pablei dalam taneh ia saong hu nao tal dom darak pasar kan tame yau Đức, Canada, Nhật Bản brei mboh chất lượng pandap oh lah hagait dom janih pandap di dom negar karei.  

Jalan ba Huỳnh Văn No nao tal bruk ini nyu hu meng hatai takre tuk daok sit. Kanar hadhar tal umo ranaih bhian nao jaoh phun hareik sậy salih ka nding njuk piah menyum ia la-u tuk tabiak mblang hamu ma-in, gam haong ilamu bac megru hu meng negar langiu dalam bruk ngak brei patrun hareik nhựa nan ye No hu hatai saneng ngak tabiak nding njuk meng phun hareik tamuh eng.

Meng phun hareik cỏ sậy, cỏ bàng tuk ba mai sang hu ngak brei haci hacih meng mac rao hadei di nan ba tame mac cakak atah samu panuac kakei di urang blei. No khan lac: “Dalam hatai nding hu dom tuk nan ye njauk ngak ka nyu samu, tapak labik nan blaoh rao ka nyu hacih gilac, ba tame sấy tiệt trùng meng tia UV. Ini jeng lac bruk ngak prong abih kayua lac meyah ngak meng tangin ye njauk pandar 1 mbaik gai haluak klauk tapa hatai nding biak lahik rilo tukvak, sản lượng biar saong brei pah rilo urang ngak. Drei hu pasiam veik saong eng drei ngak tabiak mac piah ngak công đoạn ini nan ye langyah hu taong abih kan kandah mai meng nan bo yaom phun jien jeng trun meneng. Pandap ba tabiak darak pasar hu rilo manuac urang meyaom, kayua hu ngak meng chất liệu tự nhiên, oh ralai dalam aia yau nding njuk ngak meng ba-ar, tukvak ngak tabiak jeng abih takik năng lượng jang dut haong dom janih nding njuk karei.

Sa-ai Hoàng Trang, urang ngak dalam xưởng brei thau: “Dahlau diah dahlak tok daok di sang nao darak ngak mbang ngak huak, meng tuk hu xưởng ngak nding njuk, dahlak likau tame ngak tal harei ini. Bruk ngak njual njac, jien bilan tani tanat. Jeng meng harei ngak nding njuk meng phun hareik, sang dahlak saong rilo urang pak ini meng thau cambaih dom kanjah jhak di hareik thải nhựa, nan ye pandar nding njuk meng phun hareik salih ka nding njuk meng nhựa”.

Urak ini, xưởng di sa-ai Huỳnh Văn No hu jaik 20 urang ngak. Pandap ngak tabiak ginup tanut chuẩn pablei tabiak dom negar langiu,  nan lac sa bruk kham merat biak prong di urang likei dam ranaih. Ndom ka bruk ngak di anak tal, No brei thau: “Hatai caong khin prong di drei nan lac peih prong bruk ngak, eng drei pala nguyên liệu saong duah urang hu hatai saneng dom janih pandap tự nhiên piah duh ka dom đơn hàng prong, brei mboh labik dang di pandap angan Việt Nam angaok darak pasa dom taneh aia saong ba rilo bruk ngak  jang ka urang ngak daok thaoh di puk palei”./.

Urang lang: Jasi -4/4