Bac tamat gah hukum di Sang bac ĐH Cần Thơ min hadei di nan saai Tuấn salih jalan tapa pablei salih quan cà phê saong hu jien mek tame tani tanat, Meng hatai anit ranam anek saih kan kathaot saong hu ayut saabat pachreih ba, bilan 7.2013, saai dang tabiak padang Kalup kapul ngak pahla cà phê Suối Mơ, kayua saai ngak po, piah peih ngak dom danak dak ngak pahla daong ka dom adei kan kathaot nao tal sang bac.

Tuk camriep, saai Tuấn jak ba dalam sang kaoh tabiak meng jien laba di bruk pablei salih quan cà phê, yaok ly ia 250 đồng, piah pataom jien daong ka dom adei trun manieng kan kandah. Lavik lavik harei, bruk ngak di saai hu rilo urang thau tal saong halain hatain hu mbaok tame. Tal urak ini, kalup kapul ngak pahla cà phê Suối Mơ hu yaok piluh urang dalam kapul mai meng grauk dom tinh, ban dalam taneh ia saong hu gam urang Việt daok di negar langiu. Meng bilan 7.2013 tal urak ini, hu labaih 14 ribau 300 anek saih taduan hu paok jien bac, yaok paok yaom meng 500 ribau dong tagok. Langiu di nan, kalup kapul daok hu alin jien bac suai lavik, sổ patak pataom, daong jien bayar gilang paraik ka dom sang anek saih kan kathaot, alin limo pajaih piah ka dom sang di dom adei hu raidiuk tani tanat…

Kalup kapul hu jak ba dom urang ngak pahla dalam saong langiu taneh ia daong rilo danak dak haong paok jien labaih 56 tỉ đồng. Dalam nan, padang ngak 174 baoh sang anit ranam, labaih 100 tatua, 12 km jalan mbak nao mai di puk palei; 48 bilai ia ka rahra saong 3 bilik komputer ka 3 sang bac… Bahrau ini, saai Tuấn hu peih bruk padang ngak sang ka sang adei Nguyễn Hoàng Phú, anek saih Sang bac tiểu học Huỳnh Văn Lời, huyện Vũng Liêm, tỉnh Vĩnh Long. Sang di Phú biak kan kandah, min adei tuk halei jeng kham merat yam tapa kan kandah bac ta-a naih joi. Abih menuac dalam sang daok dalam baoh sang taik tahak, ame nduac radaih kuan duah jien raong sang.

Dreih yau nan, adei Thạch Thị Ngọc Thảo anek saih Sang bac Thạnh Hòa Sơn, huyện Cầu Ngang, tỉnh Trà Vinh jeng hu CLB di saai Tuấn padang ngak veik baoh sang jaleih. Sang adei Thảo oh hu taneh pala drak, amaik ame nao ngak mbang pah di TP.HCM, payua dua adei saai Thảo ka amuk raong. Sang jaleih kayua hangin ribuk, patuah hu daong padang ngak sang, sang adei Thảo biak uan tabuan.

Saai Lê Ngọc Dung, Bí thư Huyện đoàn Lai Vung, tỉnh Đồng Tháp brei thau, palei biak iek praong hatung hatian di Kalup kapul ngak pahla cà phê Suối Mơ kayua hu daong padang ngak 9 mbaik tatua palei di huyen ini. Saai Dung caong lac saai Tuấn daok peih ngak danak dak daong ka anek saih dalam saong langiu tinh piah ka dom adei anek saih hu nao bac, harei hadei hu hadah hadai, siam makre./.