Thun 2022, ong Phan Minh To brei labaih 400 m2 taneh piah ngak jalan nao mai dalam palei saong labaih 200 m2 taneh piah xã padang ngak sang Ilamo- the thao di palei. Birau ini, tuk huyen khin padang ngak tatua birau piah peih jalan oto pambuak haong jalan Cầu Đỏ - Bến Luông, ong To ginum biai njauk gauk haong diuk anek brei abih taneh labik jaik takai ribaong, praong labaih 100 m2 piah Karja padang ngak mbaik tatua birau, khang kajap saong radaih pajeng trak labaih 3 tấn nao tapa hu.

Pachreih tui bruk jak ba tabung glong ngak jalan nao mai dalam palei - ribong kraong dalam mblang hamu bilan thun thun 2024 ini, sang ong Phan Minh To alin brei gac jaik 300 m2 taneh anak mblang bein sang piah xã peih praong jalan atah labaih 1.200 met, praong hu 5 met, piah karja buh jien tame ngak jalan betong brei radaih peih nduac dalam tukvak anak tal.

Jalan palei Lộ Xe A, xã Vĩnh Lôc A, huyện Hồng Dân, tỉnh Bạc Liêu hu tuh betong samu, tapak, praong, laneng lanoi saong biak mekre. Nan ye takik thei thau lac dom thun dahlau, labik ini lac jalan “ kan kandah, glaih glar” di bhap bini tuk nao tapa.

Ndem ka bruk ini, urang taha ngak nong angan Phan Minh To brei thau: Dahlak ndih tapui tabiak dalam sa baoh sang ngak hamu ngak puh nan ye ngan haong dahlak cagam taneh lac cagam ameh. Yau nan min, mong mboh anek naih, urang taha nao mai angaok jalan sit, janal labuh di bilan hajan, kaya nong ngak tabiak njauk urang blei kateik yaom dahlak oh klaoh hatai. Mboh lac drei sa rahra njauk ba tangin tame haong karja palei rik daong sa binah halei  ka bruk padang ngak palei pala birau, brei ka mikva nao mai hu mbuan lagaih jang. Nan ye, tuk xã brei peih ngak jalan birau, dahlak  halan hatian alin brei taneh chip.

Ong To khan lac: “ Hu jalan nao mai mbuan lagaih ye kinh te meng patagok, bhap bini mbuan lagaih dalam bruk pablei salih pandap panda, uranaih nao bac jeng hu mbuan sahanang jang”.

Ong Nguyễn Văn Tôn, sa urang daok di palei Lộ Xe A, xã Vĩnh Lộc A, huyện Hồng Dân brei thau, ong To alin brei rilo taneh, meyah kuhria tabiak hu yaom jien tỷ piah ngak jalan, ngak tatua, padang sang ilamo jeng lac bruk ngak hu makna siam mekre, kayua urak ini taneh oh lac mbuan blei hu. Jalan nan dom thun dahlau sit sot daok tapen ar kraong glut jaleih. Dom harei langik hanjan ye jalan janal ngak ka dom anek saih labuh miat. Rilo mbang bhap bini ginum gauk tuh hluk patau piah mbuan nao mai, min tok hu dom harei min. Nan ye, njauk brei tuh be tong meng hu hacih sa-at. Ong Tôn hadar veik: “Hadei di tuk ong To brei taneh, karja palei brei ngak jalan betong khang kajap, mbuan lagaih ka mikva nao mai, dom anek saih nao bac hu mbuan sahanang, siam mekre, salamat”.

Ong Trần Văn Hùng – Pho Akok UBND xã Vĩnh Lộc A ndom lac, ong Phan Văn To oh lac yau kareih camin di palei dalam bruk cakrok patagok kinh te, ngak kaya meda bo daok lac urang abih hatai daong karja padang ngak palei pala birau paglong. Sang ong Phan Văn To abih drei rik prein daong ka palei, yau ngak tatua, ngak jalan nao mai…Dom bruk ngak di ong biak njauk iek praong./.