Sa-ai Trương Thị Bạch Thuỷ, urak ini lac Giam doc HTX May tre đan Thủy Tuyết khan lac, Phú Tân lac labik hu rilo urang Khmer daok, hu palei pak pandap meng kan mai, rilo mikva joi bruk ngak, min kayua ngak sit sot, abih di nyu lac pandap oh hu salih birau, nan ye oh ka cak rok patagok. Meng nan sa-ai brei padang HTX piah pamong tal bruk pambuak gauk ngak mbang , pablei salih, patagok dulich, dich vụ di dom baoh sang, meng nan paglong yaom palei ngak.

“ Padang HTX ye drei hu mikva pok ngak Yam ndok HTX gam Hoi dong quan tri, mikva jia drei ye drei kham ngak piah duah jien mai ka mikva saong patagok bruk ngak ini. Tame HTX ye thei jeng ngak bruk, kayua bruk nyu pambuak gauk, ngak habar piah hu ralo, oh daok ngak yau dahlau daih.”

Sa-ai  Thủy ndih tapui tabiak saong praong tagok di tỉnh Bạc Liêu dalam baoh sang ngak bruk pak pandap…Patui bruk ngak meng kan di baoh sang, umo 17 thun, sa-ai brei padang labik pak pandap di ta-eng drei. Piah cak rok patagok, sa-ai tuk halei jeng duah jalan nao karei, hadah karah di drei. 

Meng labik pak pandap, sa-ai ngak brei cak rok patagok jeng doanh nghiep saong urak ini lac HTX, caik di xã Phú Tân, huyện Châu Thành. Piah paglong asal pandap, mau ma, sa-ai Thủy kham merat sahneng duah ngak tabiak dom pandap birau, jalan ngak birau, hadei di nan pato veik ka dom urang dalam HTX. Abih di nyu nan lac, sa-ai daok hu tame dom tal pasram jien padai, tal pasram daong urang kumei padang mbang ngui, tal pandar cong nghe thong tin…saong hu mbaok tame dom bruk pambuak gauk pabei salih gam haong dom adei sa-ai  kumei padang mbang ngui dalam saong langiu tỉnh, meng nan, hu lagaih rilo piah pambuak bruk taom mbaok, yaih khan pandap pak meng krem la-ar. Ndem ka pandap pak di HTX, sa-ai Thủy daok brei thau lac:

 “ Urak ini, HTX hu labaih 700 pandap. Pandap pabak ka darak pasar dalam negar saong pablei tabiak negar langiu. Ngan haong bruk pablei tabiak negar langiu ralo lac pandap pandar, yau yot buh khan ao ka nhà hàng, khách sạn. Khol dahlak daok ngak veik gah padang sang danaok meng kreim la-ar, yau ye homestay, labik padeih padei, labik du lịch. Ngan haong  pandap pandar ye khol dahlak  pandar kreim la-ar  gah meraong negar, kayua nyu laman, daok bruk pandang ngak ye khol dahlak mek kreim meng gah Barak kayua phun kreim khang”. 

Urak ini meng hu bruk pak pandap bo bhap bini dalam palei hu bruk ngak tani tanat, oh daok nao ngak mbang atah yau dahlau diah. Ini jeng lac labik piah pato veik ilamo ka rai ranaih, rik daong khik ramik saong patagok ilamo meng kan di bangsa. Abih di nyu nan lac, daong ka labaih 30 urang dalam HTX saong labaih 60 urang kumei palei jaik nan duah jien tame yaok bilan meng 4 - 5 trieu dong. Muk Dương Thị Trang, Bí thư Đảng ủy xã Phú Tân, huyện Châu Thành daok brei thau lac: “ HTX Mây tre Thuỷ Tuyết jeng hu jalan pambuak bruk haong Ubbhap bini xã peih dom tal pato bruk ngak, piah duah bruk ngak di palei ka dom dam dara umo ngak bruk. Birau ini, HTX jeng pato hu labaih 10 urang, tapa nan brei mboh bruk kham merat tuk dom adei umo ngak bruk takre ma-in hu tame HTX ngak bruk saong duah hu jien.”

Ndem tal bruk anak tal, sa-ai Trương Thị Bạch Thuỷ khan lac, sa-ai hu ngak danak dak pasiam veik palei ngak saong dulich bhap bini, piah khik palei ngak meng kan, duah jien tame tani tanat, pasiam raidiuk, bruk ngak mbang kinh te ka mikva./.