Thun ini, ong Trần Văn Chung, Yam ndok HTX ngak nong Phát Tài umo bak 60 thun. Di umo thun njauk daok saoh me-in sambai, min ong jeng daok jar var haong bruk hit, bhian duah thau dom jalan ngak ilamo kỹ thuật, kong nghe bahrau piah patagok yaom glaong pandap panda saong kein laba ka dom urang dalam HTX saong urang ngak nong di palei.

Ong Chung brei thau, dom thun 2000, taneh di sang ong saong abih bhum dalam xã Thanh Mỹ tok randap pala dom janih padai bhian pala, takik pacang hu halak halin, brei padai takik, ba mai kein laba oh glaong. Bruk ini dak ngak ka ong nao roh duah, bac taa. Thun 2012, ong tut angan tame tal pasram, pato ilamo “ngak tabiak, pilih ruah pajaih cao sản, katut harei” kayua Sang bac Đại học Cần Thơ peih tabiak. Bac hu ilamo, mai veik palei, ong likau kanja palei daong padang Kapul pambuak gauk ngak tabiak padai pajaih di puk Ô Tre Lớn (xã Thanh Mỹ). Meng kham merat abih drei, pandar ilamo kỹ thuật, ong hu pan akaok ba jalan brei Kapul pambuak gauk ngak mbang hu kein laba. Meng nan, rilo urang ngak nong dalam palei hu taneh, ba gauk pambuak haong ong tame ngak mbang pataom gauk.

Bilan 9/2017, dom urang ngak nong likau tame Kapul pambuak gauk tagok labaih 50 urang. Tuk ini, ong Chung brei peih praong bruk ngak mbang saong padang Hợp tác xã ngak nong Phát Tài kayua ong ngak Yam ndok ngan haong 54 urang, ngak tabiak dom janih padai pajaih hu chat luong glaong, abih tih mblang taneh pala ngak lac 80 ha. Ong Chung khan lac “Ngak Yam ndok njauk abih hatai haong bruk ngak kayua kein laba di abih urang dalam kapul”. Meng hatai sahneng yau nan, ong hu pambuakbruk haong dom doanh nghiệp peih ngak tui jalan “blei tal gha, pablei tal jhung” piah ba mai kein laba glaong abih ka dom urang dalam kapul, daong ngak tabiak khang kajap anak dom cuang kandah di kinh te darak pasa.

Langiu di nan, ong Chung daok lac “kỹ sư takai haluk” kham merat roh duah, ngak tabiak, ngak bahrau jak jeng rilo janih mac jamraik pabak ka bruk pala drak padai pajaih, ngak pandap yau ye mac hieng padai 3 tal, mac trang padai 3 dalam 1, mac ngak pong nerang bahrau 2 dalam 1, daong patrun biak rilo tukvak saong phun jien pah manuac ngak. Tui kuhria yaok thun, Hợp tác xã ngak nong pala drak, ngak tabiak, pabak ka darak pasa labaih 200 tấn padai pajaih.

Ong Nguyễn Văn Minh, urang dalam HTX brei thau, meng tuk hu mbaok tame HTX mbiah tal harei ini, hamu padai di ong tuk halei jeng yuak hu meng 7 - 9 tấn/ha. Padai yuak hu rilo lac meng hu pajaih siam kayua HTX pabak brei, gam haong yaom phun jien buh tame ngak abih takik. Padai pablei ka HTX tuk halei jeng glaong jang yaom darak pasar. Meng nan, kinh tế sang ong hu tani tanat jang duk haong dahlau daih.

Ong Nguyễn Văn Chung, Phaok Akaok UBND xã Thanh Mỹ brei thau, oh lac ngak tabiak, pablei salih naih joi, ong Chung saong Hợp tác xã ngak nong Phát Tài daok hu daong 55 pandap caik kanduh kalaok jru khik caga phun pala; daong 150 mbaik gheng gom jalan di dom labik jalan, 10.000 phun Hoàng yến pala di dom jalan dalam xã; padang 2 mbaik tatua nao mai dalam palei; ngak 2 baoh sang anit ranam. Taphia di nan, Hợp tác xã daok hu brei jien bac ka anek saih kan kathaot kham merat yam tapa kan kandah, daong ka palei dalam bruk pacang caga COVID-19…

Thun 2023, Hợp tác xã ngak nong Phát Tài hu Trung ương Kapul urang ngak nong Việt Nam pok angan lac sa dalam 63 Hợp tác xã angan je dalam taneh ia. Ong Trần Văn Chung hu Trung ương Kapul urang ngak nong Việt Nam pok manyaom lac 1 dalam 100 urang ngak nong Việt Nam naih gheih abih dalam thun 2022./.