Sa-ai Néang Ma La tui bac gah kỹ sư Lâm nghiệp di Sang bac Đại học Nông lâm TP Hồ Chí Minh. Thun 2017, sa-ai meng huyện Tri Tôn, An Giang mai ngak bruk di Bein Negar U Minh Thượng.

Bruk ngak di sa-ai Néang Ma La haong dom urang ngak di Pasak Du lich sinh thái, Pato pakai alam môi trường saong daong cak rok patagok anek athur glai, dalam Bein Negar U Minh Thượng nan lac daong veih, mong iek, pasiam vek saong ba palao gilac dom janih anek athur glai quý, hiếm, bhian hu meng dom bruk pablei salih, pajeng ba anek athur glai suan adat hukum.

Yaom lac ilamu gah ngak glai saong anek athur glai hu rilo kadha dreih gauk, min tuk akaok mereip taom gaok haong bruk ngak bahrau di Pasak ngan haong sa-ai Néang Ma La jeng biak kan kandah. Sa-ai Néang Ma La khan lac, anek athur glai biak karei, oh dreih athur raong dalam sang. Piah mong iek hu nyu, urang ngak bruk khik ramik brei thau ka-mbuan saong hatai takre di yaok janih. Dom urang ini njauk ba tabiak jalan mong iek raong glang ka nyu laghaih, bruk mbang menyum jeng karei di gauk...

Langiu di ilamu meng bac megru, dom urang ngak bruk khik ramik brei hu bruk tari taring, kham merat. Sa-ai brei thau, thun 2019, Pasak taduan mek drei bhai ikan balau idung sit oh ka thau mbang ikan. Piah oh caik lahik nao janih athur quý hiếm ini, sa-ai nao blei aia tasau mai craok meng yaok hanoi.  

Bruk ngak yaok harei di sa-ai saong dom ayut sahabat tuk halei jeng oh padeih tangin takai, yau duah blei pandap mbang ka kaol nyu mbang, puh ramik haci hacih van ro, mong iek raong glang dom drei njauk rambuis… Yau nan min, angaok jalan kan kandah nan, sa-ai oh ngak sa drei eng. Sa-ai Néang Ma La brei thau, meng tuk akaok mereip, sa-ai hu bruk nao gam saong daong brei di dom ayut sahabat. Pang dom ayut khan brei thau ka dom mbang nao daong dahlau diah atau bac megru meng dom bruk ngak sit di abih ka bruk daong anek athur nan lac jalan ka sa-ai pabak brei ka drei ilamu duh ka bruk khik ramik hadei ini. Oh ta-eng hagait sa-ai Néang Ma La, Kapul "ngak bruk samar drah" di Pasak tuk halei jeng caga tagok jalan tuk taduan hu mbang iew phon meng bhap bani atau jabat chức năng.

Hatai ranam dom janih anek athur glai gam haong trách nhiệm bruk ngak di dom urang ngak bruk khik ramik di Pasak daok ngak brei salih bahrau hatai saneng di bhap bani ka bruk ngak ini. Ngan haong sa-ai Néang Ma La, bruk kandaong veik dalam hatai hadei di yaok mbang nao daong peih talaih hu nan lac tuk peih palao gilac. Yaom lac glaih glar hasit, min ngan haong sa-ai nan jeng lac dom vaktu siam ghieh di abih tuk mong mboh dom janih anek athur gilac veik haong glai ram, gilac veik haong baoh sang biak biai di nyu.

Sa-ai Néang Ma La caong khin manuac sia drei thau cambaih ka yaom glaong di dom janih anek athur glai, oh mbang, oh pandar, oh raong kareik, oh daong ka dom urang pablei salih, mbang rilo anek athur glai. Nan lac dom bruk bo khaol drei meda ngak hu piah ba tangin tame khik caga dom janih anek athur glai.

Ngan haong mbaok tane labaih 4 ha, daok dalam Bein Negar U Minh Thượng prong labaih 8.000 ha, Pasak urak ini daok mong iek, raong glang 36 janih ngan haong 202 drei anek athur glai duh ka bruk khik ramik, roh duah ilamo saong pato pathram alam môi trường./.