Phun jadar oh daok atah hagait haong dom puk palei dalam bhum, min ngan haong mikva Cam palei Tuy Tịnh 2 ye ini lac phun pala birau. Kayua meng dahlau mai mbiah tal ini, mikva labik ini tok thau pala padai ia saong nyo.

Hu taneh jaik ceik, oh caga hu ia pruh nan ye ong Kinh Văn Hùng oh ngak padai ia yau dom baoh sang jaik taphia, ong palih ruah phun jadar piah pala.

Tuk camereip, ong pala 5 sào. Tui ong lac, jadar pala labaih sa thun brei paik baoh saong meda brei baoh lauc thun, 6 bilan cakak dhar, tabaik bingu saong ndam baoh. Meyah iek glang siam, phun jadar brei baoh tal 20 thun.

Phun jadar  praong, ong buh jien ngak panieng halam pacang halak lin ngak palai khut. Meng iek glang njauk jalan, sangka paglaong asal siam, gam haong langik pandiak thu, bein jadar di ong brei baoh hu sambo mau mekre, hu urang blei salih takre blei. Bein jadar  di sang ong tuk halei jeng hu yaom glong jang dom bein jaik nan. Ong Kinh Văn Hùng khan lac:

Mboh phun jadar lagaih saong taneh riya langik tasik saong ba mai kein laba glong ka sang, ong brei peih praong taneh pala, tagok 1 ha. Ong buh jien tame ngak jalan pruh ia tự động, takik pah urang ngak. Yaok thun, bein jadar paik baoh hu dua mbang, yaok mbang meng 12 tal 14 tấn, yaom jadar  pablei yaok kilo 12.000 đồng.

Langiu di bruk pala, raong glaong jeng lac prein khang di sang ong. Ong raong limo saong pabe, urak ini taphon limo  hu labaih 40 drei, pabe hu labaih 100 drei. Ong brei thau, bruk raong  pabe mek jien tame ka sang di ong biak glong. Pabe manek, pabe binai ong khik veik ngak pajaih, pabe tano  ong raong praong 15 kilo ye pablei ngak rilow. Meng hu taneh jaik ceik nan ye lagaih ka bruk raong palao taphon pabe:

Khak di taphon pabe, limo ong pabam saong buh ka bein jadar, meng nan takik abih jien blei khak drak. Ong Hùng khan lac: pandap mbang ka taphon pabe dahlak pandar meng hala jadar cakak trun. Langiu di  nan, dahlak daok pala ratak lo, ratak haluk piah caga  pandap mbang ka taphon pabe.

Ong Mai Văn Bình, akaok palei Tuy Tịnh 2 brei thau, ong Kinh Văn Hùng lac urang ngak nong naih joi dalam bruk ngak padai ia. Yaok mbang pala labaih 5 ha. Ong tuk halei jeng lac urang nao dahlau dalam bruk ba pajaih padai birau mai pala ngak. Ong lac akaok dhar kapul urang nong palei Tuy Tịnh 2 labaih 20 thun tapa.   

Meng bruk khang hatai khin sahaneng, khin ngak, brei buh jien tame, ba ilamo bahrau tame pala drak piah patagok bruk ngak mbang saong ba mai kein laba glong, nan ye ong Hùng lac sa urang ngak ong pala drak, pablei salih naih joi pakat huyen rilo thun gam. Dom bruk ngak di ong jeng hu rik tame ngak brei patagok kinh te- xa hoi di bhum palei  dalam dom thun tapa, abih di nyu lac dalam bruk padang ngak palei pala birau, ngak brei mbaok meta palei Tuy Tịnh 2 dak harei dak hadah hadai./.