Ong Tư từ Thiện, cei Tư ngak pahla, lac angan ieu anit ranam di mikva dalam bhum brei ka ong Võ Văn Tất, mai meng dom bruk ngak di ong meng lavik mai. Mikva pak ini brei thau, labaih 20 thun tapa, ong Tư hu brei saoh yaok ratuh tấn brah ka dom sang kan kandah. Kuhria rah tapa, yaok thun ong Tư hu labaih 10 mbang brei brah ka mikva di sang, abih tih dom mbang brei nan, lac meng 6-7 tấn. Langiu di nan, ong daok brei pandap mbang saong jien ka dom urang ruak kik min oh hu jien iek ruak, haong yaom jien meng dom ratuh rabau tal dom triệu đồng. Sa-ai Trần Thị Út daok di palei 2A, ban sit Bảy Ngàn, huyện Châu Thành A khan lac: “Adei tangi urang ini, sua urang daih min urang oh pah drei ngak, nan ye oh hu jien. Cei Tư mboh yau nan, cei brei phiếu, mai mek brah di cei ini, uan tabuan lo. Adei jeng patuk, jeng hu ruak kik min oh hu jien blei jru menyum, cei Tư mboh yau nan, cei brei jien blei jru manyum.”

Ong Nguyễn Văn Hòa, Trưởng ấp 2A, ban sit Bảy Ngàn, huyện Châu Thành A brei thau, palei daok hu rilo sang biak kan kandah, rilo meng nao ngak mbang pah, pablei vé số atau urang taha oh daok prein ngak bruk. Rilo thun tapa, dom kadung brah brei saoh di sang ong Tư hu daong ka yaok ratuh sang kan kathaot ini yam tapa kan kandah. Dom thun dahlau daih, tuk mboh labaih 100 sang oh hu jalan piah nao, njauk nao tapa hamu, tapa kraong biak rambah, ong Tư brei taneh gar 3 mét, atah 1.000 mét piah ngak jalan, hadei di nan, ong daok daong jien padang ngak 2 mbaik tatua ka mikva nao mai mbuan lagaih.“Ong Tư hu hatai biak siam daong ka mikva dalam palei. Ong peih jalan, ngak tatua daong ka uranaih, urang praong nao mai mbuan sahnang. Dahlau daih tuk oh ka hu jalan ye mikva pak ini nao mai biak kan kandah. Meng gah dalam tabiak ini brei nao ghe haong nao takai. Meng hu jalan ini, mikva nao mai mbuan lagaih jang.”

Urak ini umo 85 thun min ong Võ Văn Tất jeng daok patak pataom jien bo anek taco payua brei yaok bilan piah blei brah, blei pandap mbang brei ka mikva. Bruk ngak di ong hu menuac sia dalam sang pachreih tui. Daok urang kan kathaot dalam bhum saong karja palei tuk halei jeng thau dhar phor ong. Ong Tư khan lac:“Bruk bui sambai di dahlak lac yau nan, oh caong mek angan je atau kein laba hagait. Mboh daong hu ka urang taha, urang ruak, urang kathaot ye hatung hatian drei bui sambai lo”./.