Nao haong ong di mangaok jalan tuh be tong jangaih makre di palei Cam Chakleng, ong Quảng Đại Thính brei ka kol dahlak thau lac, dahlau deih, jalan ini bhian hu gluh baok di bilan hajan, mikva nao mai, pajeng ba kaya nong biak kan kandah. Ong lac sa dalam dom urang ba akaok nao dahlau dalam bruk alin taneh ngak jalan, rik daong harei ngak bruk piah padang palei Chakleng hu yau harei ini.

Thun 2020, ong hu jak ba mikva rik tame labaih 500 triệu đồng piah ngak jalan nao hacih, mekre. Gam haong bruk Kanja buh jien tame labaih 23 tỷ đồng, palei Chakleng hu padang ngak sang parang iek pandap panda, jalan tame palei ngak, jalan dien truac hadah, ngak jeng mbaok mata bahrau dalam labik mikva bangsa Cam.

Langiu di nan, labik klaak hareik meng kan di palei hu ong Thính jak ba mikva rik jien, rik prein tame puh ramik saong tuh be tong, ngak jeng labik praong siam, jeng labik pataom gauk ngak adat cambat di mikva dalam palei. Jalan mbak nao mai hacih, mekre, njauk haong angan ieu lac pasak di huyện Ninh Phước.

Dahlau nan, di thun 2017, ong Quảng Đại Thính lac urang hu jak ba mikva klaak dom adat cambat klak oh daok lagaih piah padang raidiuk ilamo, khik caga alam môi trường. Tui ong Thính, meng kan dahlau, bangsa Cam hu adat ngak ndam matai lac sang halei hu manuac lahik, oh hu pandar phun kayau klak piah ngak kajang piah ieu yang bo gauk gar njauk tagok glai piah kaoh kayau bahrau ba mai padang ngak kajang ngak ndam matai ye urang metai meng hu siam makre. Kayua yau nan ye, bruk jah tak glai dak harei dak rilo, mikva gam lahik jien nao kaoh kayau glai gam ngak jhak tal alam môi trường.

Piah klak nao adat cambat oh daok lagaih ini, ong Thính nao taom gaok dom urang taha dalam palei piah ginum gauk ba tabiak jalan pandar dom mbaik pasei hộp urak ini piah ngak khung padang kajang piah ngak ndam matai salih ka phun kayau. Ong langyah lac, mayah pandar pasei ye mikva meda pandar hu veik hadei di tuk ngak blaoh ndam matai, gam abih takik phun jien, gam daong khik ramik alam moi trong saong oh ngak suan adat hukum.

Min, dom halau janieng lac oh khin ngak adat ieu yang dalam dom kajang ngak meng pasei. Khang hatai ngak ka pahu, ong Thính salih tapa jalan pathau khan, jak ba dom baoh sang dalam but pajaih khang hatai salih. Tuk camriep, tok hu dom sang ngak tui min, hadei di nan, abih palei Chakleng ngak tui saong meng nan oh daok bruk kaoh mek palai pajoa glai. Tal urak ini, dom palei Cam di Ninh Thuận jeng ngak tui.Meng nan, mbaok mata dom palei Cam dak harei dak hadah hadai jang, siam makre jang.

Palei Chakleng danei angan haong bruk manyim khan bai di urang Cam. Pak ini, hu rilo rai urang kumei naih joi bruk ngak, ong Thính hu jak ba mikva pato veik bruk ngak ka anek taco di drei piah khik ramik dom bingu la meng kan di bangsa Cam. Meng nan, rai ranaih patui veik bruk menyim meng kan saong palei Chakleng jeng labik rivang iek du lich danei angan di Ninh Thuận.

Ong Nguyễn Hữu Tuấn, Bí thư Huyện ủy Ninh Phước brei thau: “Huyện tuk halei jeng sangka patagok labik dang di urang hu angan je piah pathau khan, jhul kadun likuk dom adat cambat klak oh daok lagaih dalam bhum bangsa Cam. Bruk ini hu rik daong paglaong raidiuk, padang ngak palei pala bahrau, hadah krah, siam makre saong kaya mada.