Ong Phạm Kinh Doanh, urang dahlau daih ngak bol lin (daok di xã Tân Phú, huyện Thới Bình, Cà Mau) thun ini umo labaih 60 thun. Ong Doanh bhian hu mbaok tame mesuh di mblang mesuh Campuchia. Tukvak daok ngak lin hu pasram ka urang lin ini oh huac kan kandah, glaih glar hagait.

Taneh ia sron mbon, ong Doanh daok ngak bruk dalam dom jabat kanja. Tal thun 2002, ong likau padeih ngak mai palei ngak kinh te. Meng sa ha taneh, sang ong Doanh pala padai blaoh salih tapa ngak padai gam raong hadang. Meng hatai caong tagok hu glaong di abih jien mek tame di sa mblang taneh, dom thun jaik di ini, urang lin dahlau daih ba njam patam tame pala di angaok takai danao raong hadang.

Langiu di nan, oh caik ka mblang bein vil val sang klak saoh, hareik hareim tamuh bak, ong Doanh ngak brei hijao meng dom janih phun mbang baoh saong njam patam. Ong salih tapa pala rilo janih phun meng tamekai, kadaoh, baoh daak, tamun padai,.... Bilan pala ini, ong Doanh hu pandar jaik abih mblang taneh takai danao raong hadang piah pala tamekai saong ba mai kein laba glaong:

"Camriep abih dahlak pala tamekai, blaoh tal baoh kadaoh,saong pala rilo janih njam patam karei. Thun camriep ba mai kein laba biak glaong, blaoh ngak tal urak ini. Thun ini, tui kuhria  tamekai paik hu labaih 4 tấn, di mangaok takai danao raong hadang di sang".

 Urang lin wa  Hồ dahlau daih daok hu raong rilo janih mala danao raong hadang. Langiu di raong hadang thẻ, sú, arieng yau meng dahlau mai, ong Doanh daok raong hadang giraong hijao saong ikan dalam tukvak ngak padai. Meng nan, yaom lac sang ong tok hu 1ha taneh min ong laba hu labaih 120 triệu đồng sa thun. 

Ong Phạm Kinh Doanh daok lac Akaok dhar Kapul urang dahlau deih ngak bol lin palei Tapasa 2. Meng jak jeng di bruk ngak di sang, ong hu ba tabiak saong daong ka dom urang dalam kapul ba njam patam tagok pala di mangaok takai danao raong hadang piah hu jien mek tame. Blaoh hadei di nan, dom urang dalam dhar Kapul urang dahlau daih ngak bol lin palei thei jeng tabiak truh kan kathaot, jeng kreih camin saong tuk halei jeng halain hatain daong ka dom sang kathaot, sang jaik kathaot di dalam bhum palei ba gauk yam tagok. Amuk Nguyễn Thị Mỹ Á, akaok palei Tapasa2, xã Tân Phú brei thau:

 "Dom cei dahlau daih ngak bol lin pak ini tuk halei jeng daong ka dom sang kathaot, sang jaik kathaot, sang kan kandah. Dom cei jeng hu rilo panuac rik tame, ba jalan ka Chi ủy, ba tabiak dom bruk ngak, blaoh jak ba dom urang ngak pahla, daong padang ngak sang anit ranam, alin pandap ka urang kan kathaot. Tuk hu dom bruk pala drak, raong glang halei hu kein laba ye dom cei tuk halei ba akaok nao dahlau, dang tabiak daong ka dom baoh sang kan kathaot".

Lac akaok kapul Urang dahlau daih ngak bol lin palei Tapasa 2, ong Phạm Kinh Doanh thau patagok bruk ba akaok nao dahlau, njauk haong angan urang lin wa Hồ di gah ngak mbang, pala drak. Tal urak ini, dhar Kapul oh daok urang halei kathaot, jaik kathaot. Blaoh meng nan, dom urang lin dahlau daih hu daong ka rahra dalam palei ba gauk yam tagok. Dom cei yaom lac umo thun glaong min tuk halei jeng ba akaok nao dahlau dalam bruk ngak mbang, pala drak, abih hatai rik prein ka puk palei dak harei dak kaya mada, siam makre jang./.