Tuk khol dahlak birau mai tal Kapol padang sang ngak pahala di xã Phú Điền, dom urang dalam Kapul daok kham ngak bruk di drei yau kaoh gheng, ngak danieng, thei jeng thuvi thuvar haong bruk di drei. Di labik ini urang ranaih umo abih jeng labaih 30 thun, daok praong ye umo jeng jaik 60. Sa-ai Nguyễn Song Pha, lac urang di kapol padang sang ngak pahala brei thau, sa-ai tame Kapol padang sang ngak pahala ini hu labaih 10 thun ye, langiu bruk sang drei tuk lahaiy sa-ai nao daong padang sang ngak pahala, daong ka mikva hu raidiuk kan kandah:
“Tuk Ban Trị sự khan brei thau ye kapulrami ramik bruk hit piah jak ba adei sa-ai nao daong ngak bruk piah sumu vaktu di urang, samu bilan hajan ribuk tal mai. Padang blaoh sang urang pan tangin drei, ndom biai dhar pgor ini daih. Nan lac prein pabak ka adei sa-ai chreih chrai nao ngak.”
Diuk pasang sa-ai Trần Văn Cường, daok di xã Mỹ An, huyện Tháp Mười, jien mek tame oh tani tanat, yaok bilan duah hu dom trieu đồng meng bruk ngak pah ye mek halei hu jien ngak sang. Yau nan min, bruk bui sambai mai tal diuk pasang sa-ai Cường tuk Kapol padang sang ngak pahala hu daong diuk pasang sa-ai padang hu sang piah pacang pandiak, pandauk hajan. Bui sambai, haniem siam dalam harei tame sang birau, sa-ai Trần Văn Cường chreih chrai khan lac: “Hu sang oh daok huac ngin hajan. Meng harei hu sang birau jeng uan tabuan lo, blaoh kham merat nao ngak duah jien raong anek”.
Meng phun jien ja ba hu di Ban Trị sự Giáo hội Phật giáo Hòa Hảo xã Phú Điền, yaok thun Kapol padang sang ngak pahala padang ngak hu labaih 100 baoh sang ka mikva kan kandah, jien buh tame ngak meng 25 - 50 trieu dong. Sa-ai Nguyễn Ngọc Điệp, akaok Kapol padang sang ngak pahala brei thau, meng ini tal puac thun meda ngak hu labaih 40 baoh sang ka urang kathaot oh ka hu sang daok piah tani tanat labik daok, labik ngak mbang:
“ Dahlak mboh mikva biak anit, hu urang taha, ralo meng lac dom urang oh eng drei padang sang daok hu. Meng nan meng padang Kapol padang sang ngak pahala, drei jak ba adei sa-ai buh prein tabiak ngak pahala, gam likau urang daong. Pak ini palei buh prein ngak, daok urang ngak pahala ye jak ba labik karei mai piah padang sang ka mikva”.
Dom urang dalam Kapol padang sang ngak pahala tuk halei jeng klaak tukvak, buh preih yawa gam jien padai tok caong mboh mikva bui sambai, haniem phol saong cambuai klao. Meng hatai ngak pahla, dom urang di Kapol padang sang ngak pahala kham ngak habar hu rilo baoh sang piah daong ka rahra tani tanat raidiuk.
Dalam bruk ngak anak tal, dom urang dalam Kapol padang sang ngak pahala xã Phú Điền, huyện Tháp Mười jeng daok nao tal dom baoh sang bhap bini daok khin hu sang daok piah kakei, pachreih ba saong payua hatai anit ranam tal dom baoh sang, haong hatai caong lac abih gauk jeng hu sang pacang pandiak, plaih hajan./.
Viết bình luận