Bilan 8-2020, hadei di tuk bac tamat Trường Sĩ quan chính trị, urang likei angan Hồng Nhật Đăng palei daok di huyện Giồng Riềng hu ba nao ngak Chính trị viên phó Đại đội 6, Tiểu đoàn 519, Trung đoàn 893 (Bộ Chỉ huy Quân sự tỉnh) daok di huyện biên giới Giang Thành. Meng bilan 6-2021, Đăng hu brei bruk ngak Chính trị viên Đại đội Bộ binh Kiên Hải mbiah tal harei ini. 3 thun ngak bruk di labik tasik, pulao, Đăng hu kak kajap haong labik ngak, diukrai abih hatung hatian haong mikva dalam palei. 

Kol dahlak tui takai Trung úy Hồng Nhật Đăng nao ravang sang adei Quách Thị Phương Nhi – anek saih tal bac 5 sang bac Tiểu học Hòn Tre (Kiên Hải). Nhi lac anek saih sang kan kandah di xã Hòn Tre hu Đoàn cơ sở mBan Chỉ huy Quân sự huyện Kiên Hải mai sang ravang, brei dom pandap yau ye siphau, but saong jien 200.000 đồng sa quý. Nhi urak ini daok haong muk, amaik di Nhi nao ngak mbang atah.

Adei Nhi khan lac: “Anek bui sambai lo tuk hu dom cei bộ đội mai ravang, brei jien, brei pandap ka anek nao bac. Dom cei bhian kakei anek kham merat bac ta-a, oh klaak bac meteh dhi”.

Nhi lac sa dalam 4 anek saih hu daong meng bruk “gu hala hijao” kayua Đoàn cơ sở Ban Chỉ huy Quân sự huyện Kiên Hải peih tabiak ngak meng bilan 8-2020. Meng bruk ngak ini, yaok quý đơn vị hu daong 4 anek saih dalam xã Hòn Tre, labik đơn vị daok ngak bruk. Trung úy Hồng Nhật Đăng urak ini lac Bí thư Đoàn cơ sở Ban Chỉ huy Quân sự huyện, lac urang nao gam haong bruk “gu hala hijao” saong bhian jak ba urang ngak pahla daong ka dom anek saih kan kandah di xã đảo Hòn Tre.

Trung úy Hồng Nhật Đăng brei thau: “Jien daong anek saih bhian hu mek meng kadung jien patagok bruk sản xuất di đơn vị. Yaom lac jien daong oh praong min nan lac hatung hatian di dahlak haong dom urang jakar, urang lin, haong hatai caong daong prein ka dom adei nao bac”.  

Yaok thun tuk tame thun bac bahrau, Trung úy Hồng Nhật Đăng haong Đoàn cơ sở Ban Chỉ huy Quân sự huyện Kiên Hải jak ba urang ngak pahla daong brei dom pok pandap yau ye siphau, but ka anek saih sang kan kandah. Trung úy Hồng Nhật Đăng brei thau: “Tết Trung thu yaok thun, urang jakar, urang lin kaoh kreim, cakak ba-ar ngak dom baoh gom ông sao, cá chép… saong peih ngak malam pataom ia bulan bak baoh ka dom uraniah me-in bui sambai, pabak binah halei bruk daok kurang di labik xã đảo”. 

Yaom lac umo bahrau 28 thun, min dalam bruk ngak lac Bí thư Chi bộ, Chính trị viên Đại đội Bộ binh Kiên Hải, Trung úy Hồng Nhật Đăng tuk halei jeng ba akaok nao dahlau dalam bruk ngak saong pathau khan, jak ba urang jakar, urang lin dalam đơn vị ngak siam sarak di chi bộ. Trung úy Hồng Nhật Đăng gam haong chi bộ ba tabiak jalan ngak ka đơn vị ngak hu siam bruk di drei, dak padang tổ chức Đảng hacih sa-at, khang kadang, đơn vị khang kadang abih gah, hadah krah yau kreih camin. 

Dalam angan lac chính trị viên đại đội, Trung úy Hồng Nhật Đăng patagok labik dang, bruk ngak, peih ngak siam bruk pato pakai chính trị, adat hukum, jalan sahneng saong dom bruk ngak di Đảng, bruk chính trị karei karei tui bruk hu jao brei. Trung úy Hồng Nhật Đăng bhian duah thau hatai sahneng di urang jakar, urang lin, samar langyah pabak hatai caong njauk bruk di bộ đội; gam haong mban chỉ huy đại đội peih ngak siam dom bruk hu pakat angaok jao brei.

Trung úy Hồng Nhật Đăng ndom lac: “Dahlak oh padeih bac megru, pabak ilamu  piah paglaong bruk ngak, daong jhul khang bruk pato pakai chính trị, jalan sahneng, jhul khang bruk bac megru saong ngak tui jalan hadah krah siam mekre di Hồ Chí Minh. Dahlak pasram jalan diukrai hacih sa-at, khang kadang, panuac ndom nao gam haong bruk ngak, caik kein laba di kapul nyaom tagok mangaok kein laba di rup drei”.