Dalam baoh sang khang kajap, sa-ai Điểu Hoang caik labik hadah hadai abih dalam duk piah tuan dom blah harak meyaom di drei. Ngan haong sa-ai nan lac drap ar hu makna praong glong abih bo sa-ai mek hu hadei di jaik 20 thun ngak bruk ka puk palei.

Sa-ai Điểu Hoang khan lac: rai diuk di bhap bani Mnông dalam puk palei biak kan kandah. Mai meng bruk sangka di Đảng, Karja ngan haong rilo sarak daong ba, dom thun jaik di ini rai diuk di bhap bani salih bahrau mboh di anak meta. Baoh sang kathaot saong jaik kathaot patrun yaok thun, yau nan min tal urak ini rilo bhap bani jeng daok kan kandah.

Thun 2005, sa-ai Điểu Hoang hu pok tagok ngak Bí thư Chi đoàn palei Bù Sê Rê 1, blaoh hu mikva jia tame pok ngak akaok palei. Pambuak haong mikva dalam palei, sa-ai hu thau hadom kan kandah, rambah rambup di mikva drei. Mboh cambaih laih bruk nan, sa-ai tuk halei jeng sahaneng duah jalan daong veih mikva. Sa-ai Điểu Hoang nao taom, ginum biai haong dom baoh sang ngak mbang pablei salih dalam palei, dang tabiak mbaok ka baoh sang kathaot piah hu blei pandap panda mai ngak mbang pala drak, mac moc, khak barak, jru khik caga phun pala… Tal bilan yuak padai, bilan paik baoh sa-ai gilac gam haong mikva ba jien nao ba-yar sre.

Bon Bù Sê Rê 1 urak ini hu 310 baoh sang, dalam nan hu 28 baoh sang kathaot, 22 baoh sang jaik kathaot. Yaom lac baoh sang kathaot patrun rilo jang dut haong dahlau, min rilo baoh sang urang bangsa takik jeng daok gaok kan kandah, mikva sahaneng daok kurang. Nan lac kadha daok ngak ka akaok palei Điểu Hoang saneng haduh hatai ralo abih. Tui sa-ai Điểu Hoang, njauk hu ilamo meng caong khin hu rai diuk siam jang. Kayua yau nan ye, 2 thun tapa, sa-ai peih tal pato bac di sang tuk melam mai ka uranaih dalam palei saong jak ba dua anai gru nan jeng lac adei kumei di sa-ai dang tabiak pato tacei. Hu mbaok dalam tal bac, dom adei hu daong brei tapuk siphau saong hu pato tacei ilamu piah bac da-a dalam sang bac ka nyu siam jang.

Meng angan je di drei, sa-ai Điểu Hoang daok jak ba mikva rik jien padai, pren yava tame piah ngak jalan, padang mbon palei dak harei dak siam gheih jang. Dahlau diah, palei Bù Sê Rê 1 tok hu dom canah jalan prong hu padang ngak khang kajap, daok veik nan lac jalan haluk mikva nao mai biak kan kandah. Tuk Karja brei jien piah ngak jalan, sa-ai saong Bí thư Chi bộ palei hu nao tal yaok baoh sang mikva piah langyah, jak ba alin brei taneh, rik daong harei ngak piah ngak jalan. Mikva thei thei jeng pang tui, halan hatian rik jien hu labaih 2 tỷ, gam haong rik daong harei ngak bruk, hu yau nan palei ngak hu dom jalan nao mai lagaih.  

Ong Nguyễn Văn Diện, Phaok akaok UBND xã Đắk Ru khan yau ini: Bon Bù Sê Rê 1 hu dom salih bahrau yau harei ini, mai meng bruk that triak, abih hatai haong bruk ngak ralo di Akaok palei Điểu Hoang. Sa-ai oh lac abih hatung hatai haong bruk ngak di puk palei, pakhang bruk pathau khan, jak ba mikva sangka bruk ngak mbang, cak rok patagok raidiuk dak harei dak yam tapa kan kathaot bo daok jak ba bhap bani rik daong prein, jien padai tame ngak jalan mbak nao mai dalam palei.

 Meda mboh lac, piah ka bhap bani jia, ngak tui, ta-eng rup sa-ai Điểu Hoang oh lac ba kaok nao dahlau dalam bruk cak rok patagok kinh tế baoh sang, sangka iek glang anek bhik bac megru tal labik tal dhua, bo daok daong mikva meng dom bruk ngak hu mboh di anak meta, lagaih haong raidiuk./.