Tacei tangin tame dom mejam bingu “hoa giấy” daok raak bingu hadah rah tui 2 gah jalan palei Buôr, xã Hòa Xuân, ban Buôn Ma Thuột, amuk H’Lép Niê daok hu angan ieu lac Mí Khiết brei thau, hu jalan bingu ini, lac mai meng prein yava buh tame di phó bí thư chi bộ, akaok palei Ama Tháp:“Di palei Buôr, xã Hòa Xuân ni, dalam dom mbang nyaom palei, akaok palei pathau khan ka bhap bini, yaok urang, yaok sang ngak ka jalan hacih mekre, pala bingu pala hareik, bhap bini uan tabuan lo. Dahlak mehit akaok palei pathau khan jeng ngak tui, pala bingu ngak mekre.”

Oh lac jak ba mikva pala bingu ngak mekre palei, akaok palei Ama Tháp daok ba akaok nao dahlau dalam bruk salih janih phun pala meng pala pablak amriak kalu, durian dalam bein cà phê. Ama Tháp daok kham merat jak ba bhap bini dalam palei pandar ilamu kỹ thuật tame pala drak, raong glang saong hu mbaok tame padang ngak dom bruk patagok kinh tế. Sa-ai tuk halei jeng sangka tangi sua, pachreih ba dom sang kan kathaot, sang sarak karja, sang kan kandah, daok sa drei…, saong hu dom jalan daong ka urang tani tanat raidiuk. Sa-ai Y Sol Buôn Đáp, daok di palei Buôr, lac:“Di palei ini Ama Tháp lac akaok palei tacei pato mikva ngak puh, daong ka mikva ngak harak gar di UBND xã, daong patagok kinh tế, paglaong raidiuk ka rahra pak ini.”

Ama Tháp khan lac, di thun 2011, dalam palei hu dom kol jhak mai pacuh pajarak bhap bini nao tui jalan suan. Hadei di tuk brei thau halei bruk njauk, halei bruk suan, Ama Tháp haong karja palei nao tal yaok baoh sang jak ba, pathau khan piah mikva thau cambaih. Meng abih hatai jai yau nan, Ama Tháp hu karja saong bhap bini dalam palei jia tui saong pok ngak pho akaok palei, blaoh akaok palei, blaoh ngak phó bí thư chi bộ palei. Ndua angaok bara bruk praong nan, Ama Tháp sahneng lac njauk kham merat rilo jang, ba akaok nao dahlau jang piah pabak veik hatai jia nan: “Dahlak ndom biai haong mikva lac jhui pang kol pacuh pajarak, karja tuk halei jeng sangka daong ka rahra drei. Kol drei njauk sahneng tal raidiuk di drei dahlau, hu raidiuk siam, hu sang danaok praong mekre, ngak mbang hu, lisei huak trei tian. Mikva jeng mboh urak ini karja buh jien ngak jalan ba ia ka kol drei pruh ia ngak hamu, ngak jalan mbak hacih mekre, karja oh var klaak drei nan ye mikva njauk jia tui ”

Taong yaom ka bruk ngak di phó bí thư chi bộ, akaok palei Buôr Ama Tháp, ong Nguyễn Đức Thuận, bí thư Đảng ủy xã Hòa Xuân lac: “Akaok palei Ama Tháp hu rilo salih bahrau abih di nyu lac dalam tuk padang ngak palei pala bahrau. Palei Buôr dahlau deih jeng lac labik srau kadau, urak ini likei dam yaok thun nao lin, ngak nghĩa vụ quân sự ginup abih, blaoh dom bruk karei di palei peih ngak, Ama Tháp jeng kham merat abih drei”.

Dom rik daong di sa-ai Ama Tháp, phó bí thư chi bộ, akaok palei Buôr tukvak tapa hu daong pasiam raidiuk di mikva dalam palei, pakhang hatai jia di mikva tame Đảng, Karja, lac labik pambak tame, lac talei pambuak di pakat ủy, karja haong bhap bini dalam bruk dak padang hệ thống chính trị, ngak jeng prein khang patagok kinh tế - xã hội di palei./.