Di kreh pandiak, ong Nguyễn Ngọc Giới haok ia hauk ba dom patau angaok radaih jhul tangin, buh tame yaok “sruh menuk”, “sruh lamen” blaoh jan klik, hadei di nan tuh nhựa tame pasiam veik jalan ĐH.704 – jalan praong pambuak meng xã Minh Tân tal huyện Dầu Tiếng saong tỉnh Bình Phước. Bruk ini hu ong ngak meng rilo thun tapa.

Ong Giới khan lac, tuk mboh anek saih plaih “sruh menuk” angaok jalan bloh labuh trun, njauk radaih nao tapa ginuh metai, ong biak pandik harao dalam hatai. Meng nan nyu pachreih ong ba tangin tame ngak chip bruk bal veik jalan piah khik salamat ka manuac sia nao mai. 

“Drei pataom mek nhựa jalan di labik jalan khut, gah ngak jalan urang kuac tagok klaak, drei duan mek pandar, blaoh blei nhựa jalan, keo, piah pabak pasiam veik. Tuk drei daok ngak, urang mboh blaoh urang thaot ba tagok facebook, saong drei jeng hu ba tagok nan ye urang mboh bloh daong ka drei hu jien bal jalan”.

Meng bruk ngak siam mekre di ong akaok palei, urak ini menuac sia vil val nan hu ba gauk tame ngak pasiam jalan. Thei hu jien ye blei patau, xi măng, nhựa jalan, urang oh hu jien ye buh prein tame ngak. Tapa nan, jalan ĐH. 704 bak “sruh menuk”, “sruh lamen” hu pasiam veik, ba salamat ka rahra, ka anek saih tuk nao mai angaok jalan.

Ong Đỗ Văn Thọ, daok di xã Minh Tân khan lac, kayua radaih nao mai dak harei dak rilo, nduac samar nan ye mbaok jalan dak harei dak khut, mbuan hu bala:“Caong khin Karja saong dom pakat pasang iek, bhian tui iek piah pasiam veik bruk radaih container, radaih pajeng trak, radaih praong pajeng trak jang adat ba tabiak nao tapa jalan ini. Meng nan, khik kajap jang salamat angaok jalan, khik siam mekre jalan piah ka bhap bini nao mai hu sahanag hatai”.

Langiu di bal jalan, ong Giới daok patagok bruk ngak di urang akaok palei abih hatai jai, tuk nao gam haong mBan ngak bruk mặt trận duah jalan daong ka mikva puk paga, meng nan raidiuk dom sang dalam palei dak harei dak hu siam jang, mek hu tanut baoh sang ilamu.

Dalam tuk jien di kadung jien karja brei ka bruk khik iek, ramik ngak pasiam saong padang ngak bahrau dom jalan meng trung ương tal tỉnh ban daok kurang, takik, bruk ngak di ong hu mikva dalam xã pok meyaom, lac kreih camin hadah piah menuac sia bac megru, ngak tui.

Hadei di rilo thun ngak bruk, Akaok palei Nguyễn Ngọc Giới dak harei dak hu mikva anit ranam, iek praong. Tuk halei jeng ngak siam bruk, abih hatai ka puk paga, ong lac urang jakar hadah krah, bac megru ngak tui Wa tui jalan lac "ndom ka rahra pang, ngak ka rahra mboh, rahra jia"./.