Jaik 20 thun dahlau, sang kan kandah, amuk Nguyễn Thị Phượng (daok di xã Trần Thới, huyện Cái Nước, Cà Mau) tagok Bình Dương ngak thợ hồ piah duah jien diuk tapa harei. Pasang ngak thợ, daok amuk cakaong kiak brei ka thợ xây. Yaok pok kiak jeng hu kak meng talei nhựa, tuk taoh klaak talei, amuk Phượng pataom ba mai sang pak jeng dom baoh yot pandar dalam sang.

Tuk mboh dom baoh yot drei pak hu rilo menuac meyaom lac mekre saong khin blei, amuk Phượng sahneng chip tal bruk blei talei mai pak yot pablei piah duah jien tame ka sang. Tal thun 2009, dua diuk pasang pataom hu hasit phun jien, blaoh mai daok di huyện U Minh, tỉnh Cà Mau blei taneh glai pala drak saong peih bruk ngak mbang meng pak yot nhựa. Hadei di nan oh lavik, Pasak Pato bruk ngak huyện U Minh mai taom gaok amuk piah nyim amuk pato bruk ngak, daong ka dom urang kumei kan kathaot hu bruk ngak mbang duah jien. Sa-ai Mai Ngọc Bích, sa urang bac dalam tal bac khan lac: “Dahlak mboh bruk ini biak lagaih, lahaiy tuk halei drei ngak tuk nan, melam drei ngak jeng hu. Pak hu ye drei ba tabiak darak pasar drei pablei atau ieu gauk gar drei daong blei jeng hu, yaom kaom mbiah, lap”.

Rilo urang kumei mboh bruk pak yot lagaih piah duah jien nan ye mai likau bac ngak. Bruk njauk pok meyaom lac amuk Phượng oh tuk halei mek jien pato bac. Rilo labik khin da-a amuk nao pato bruk pak yot, amuk jeng nao pato brei saoh.

Ndom ka bruk hadar kanal di abih dalam tuk nao pato bruk ngak, amuk Nguyễn Thị Phượng brei thau, amuk tok bac abih tal bac 8, nan ye tuk hu da-a nao pato bruk ngak, amuk huac tal ndih oh var. Tal urak ini, amuk hu labaih 10 thun nao pato bruk ngak saong tuk halei jeng halan hatian nao pato, kayua amuk mboh lac, dom menuac nao bac bruk ngak jeng hu raidiuk kan kandah:“Tuk camereip pato jeng mboh huac lo. Abih di nyu lac tuk hu menuac ieu anai lơi ye drei huac lo, oh thau drei pato hu halei oh. Urang gru pato ye karei, daok drei pato ye gam bui gam huac, oh thau pato urang ngak hu jeng pandap halei oh”.

Meng abih hatung hatian dalam pato bruk ngak, abih di nyu lac jalan yam tagok meng kan kandah, bo amuk Nguyễn Thị Phượng hu rilo sang bac pato bruk ngak di Cà Mau da-a nao pato. Amuk Nguyễn Hồng Nhung, Hiệu Trưởng sang bac Cao đẳng nghề Việt Nam - Hàn Quốc taong yaom lac:“Kol dahlak taong yaom biak glaong cơ sở đan lát Mỹ Phượng. Ka sa lac gah tangin ngak, dahlak mboh anai Mỹ Phượng hu tangin gheih ngak oh karei hagait sa nghệ nhân. Daok dom urang hu anai pato, anai halan hatain taduan urang tame ngak atau brei mek pandap ba nao sang ngak tuk lahaiy piah duah jien tame. Kol dahlak jeng hu panuac dhar phor cơ sở pak yot Mỹ Phượng hu daong ka sang bac dalam bruk pato pakai”.

Langiu di bruk ngak yot nhựa, amuk Phượng daok sahneng duah, ngak hu rilo pandap karei meng talei nhựa yau: bàn, ghế, ciu, tuk khum pandap mbang... saong pato veik ka dom urang mai bac haong drei. “Urang gru oh hu bằng cấp” hu daong ka labaih 1.000 urang bac ngak tabiak dom pandap oh lac piah pandar dalam sang, bo daok daong duah hu jien. Bahrau ini, amuk Phượng daok kuhria ngak dom pandap siam ka alam môi trường yau dom janih yot ngak meng phun bồn bồn saong daok ngak dom pandap karei meng phun patei./.