Hóa học hu maong lac môn bac kan, thu lagu. Piah dui pachreih anek saih, lac bruk oh mbuan ngan saong anai gru pato môn ini. Yau nan min, meng hatai anit bruk ngak saong tuk halei jeng salih bahrau jalan pato pakai,  nan ye anai gru Đạo Thị Thanh Du hu ba mai ka anek saih dom mong bac môn Hóa biak chreih chrai, bui sambai. Dalam yaok mong bac, dom panuac sua tangi bo anai Du ba tabiak tuk halei jeng hu dom adei anek saih abih drei tame javap jalei, ngak jeng bruk biak chreih chrai. Adei Tài Diệu Nữ Hoàng Cầm – tal bac 12A5, Sang bac THPT Tôn Đức Thắng, huyện Ninh Hải, tỉnh Ninh Thuận lac: “Anai gru Du pato anek saih biak halain hatain, mbuan thau kayua anai gru pato biak cambaih laih, tantu…”

Cei gru Hứa Đại Khoa, Phó Hiệu trưởng Sang bac THPT Tôn Đức Thắng, huyện Ninh Hải, tỉnh Ninh Thuận brei thau, yaom lac oh ngak chủ nhiệm tal bac, min meng bruk sangka saong anit ranam anek saih, anai gru Thanh Du tuk halei jeng nao jaik duah thau hatai sahneng, hatai caong di yaok anek saih. Ngan saong dom bài tập kan, anai abih hatung hatian tacei pato, ngak habar ka dom adei thau hu bài samar di abih. Langiu di nan, anai daok caik tukvak pato pasram paglaong ilamu ka dom anek saih naih gheih gah môn Hóa piah tame pakacah anek saih naih joi pakat huyện saong pakat tỉnh. Meng nan, sang bac THPT Tôn Đức Thắng tuk halei jeng hu anek saih naih joi môn Hóa pakat huyện saong pakat tỉnh rilo thun gam. “Anai gru Du lac gru pato naih joi rilo thun…”

Yaom lac hu taong yaom lac gru pato hu rilo ilamu khang kajap, min anai gru Đạo Thị Thanh Du oh ka tuk halei mboh njauk hatai haong rup di drei. Anai tuk halei jeng kham merat duah jalan pato pakai bahrau, chreih chrai saong hu siam lagaih piah ba tame bruk pato pakai. Ngan saong anai, bhian salih bahrau jalan pato pakai meda daong dui pachreih dom adei tame bài giảng di drei rilo jang. 5 thun tapa, anai gru Đạo Thị Thanh Du hu dom đề tài sáng kiến hu taong yaom glaong, yau ye bruk “Ngak brei anek saih pachreih bac meng dom tangi sua saong bài tập đa dạng dalam bruk ngak di kapul”, “Kein laba meng bruk pandar jalan ngak palak tangin jaik tapung dalam bài ngak hóa di sang bac THPT Tôn Đức Thắng”. Anai Đạo Thị Thanh Du – Gru pato Sang bac THPT Tôn Đức Thắng, huyện Ninh Hải khan lac: “Mon Hoa lac mon bac kan. Dalam tuk pato, anek saih kan thau tantu saong kan dalam bruk hadar kadha bac…”

Meng dom kham merat oh thau glaih glar, anai gru Đạo Thị Thanh Du hu sang bac saong gah pato megru tỉnh Ninh Thuận pok brei rilo harak meyaom. Bahrau ini, anai hu Thủ tướng Rajaei alin brei Harak meyaom kayua hu bruk ngak biak gheih dalam pato megru meng thun bac 2018-2019 tal thun bac 2021-2022, rik daong tame bruk dak padang chủ nghĩa xã hội saong khik caga palei negar. Ini gam lac bruk ngak brei hadah mbaok meta, gam lac bruk pachreih ba piah ka anai kham merat ngak siam jang bruk pala menuac di anak tal./.