Diuk pasang ong Hữu Minh Út saong amuk Hữu Thị Phúc hu 8 urang anek, 4 urang bac tamat blaoh đại học, 3 urang bac cao đẳng; urang anek bac biar di abih jeng bac tamat tal bac 12. Anek di ong hu urang daok ngak Phaok Viện trưởng VKSND huyện; urang ngak Phaok Yam ndok Cty cấp nước; dom urang anek daok veik jeng hu bruk ngak tani tanat dalam dom jabat karja atau dalam doanh nghiệp. Sang ong muk tok hu 14 công taneh ngak hamu nan ye tuk dom urang anek daok nao bac, jeng hu tuk lac biak kan kandah. Ong Hữu Minh Út khan lac:“Sang tuk nan rambah lo, sahneng tal ye haok ia mata. Dahlak nao kaoh kreim ngak gai vah ikan, ia dauk dalam, caluai dalam mblang hamu blaoh ia nyu mbang tangin takai laka abih, nao oh truh. Tal tuk huak lasei, ramik talam lasei blaoh ieu dom anek tagok huak, pandar nyu huak dahlau nao, huak brei trei tian nao. Tuk nan drei daok ngak lợp cap mek ikan hadang duah jien raong anek. Jeng ngak dalam rambah rambup yau nan piah kuhria ka anek nao mbang bac.

Sang ong Út hu ilamu cách mạng meng kan mai, ame di ong hu Karja pok brei Huy chương kháng chiến. Daok ong ye hu mbaok tame bruk mesruh pacang Mỹ. Jeng dalam tukvak nan, ong bac megru hu rilo bruk saong thau lac bac akhar haroh hu makna biak praong, lac jalan piah ka baoh sang cakrok patagok:“Drei bac tui rai nao dahlau, dalam nan hu jalan sahneng ka cách mạng. Abih di nyu lac bac tui Wa Hồ, iek ilamu saong bac ta-a lac praong abih nan ye anek bhik brei mbang bac tal labik tal dhua yaom lac kan kandah glaih glar”.

Ong Út rilo thun lac menuac hu angan je dalam bhap bini bangsa Khmer. Ong Hữu Minh Út daok lac gru pato akhar haroh Khmer ka bhap bini dalam palei. Meng bruk thau di drei, urang gru pato sap Khmer daok bhian hu panuac pato pahadar anek kamuan diukrai siam. Urang bhian mek ong Út ngak kreih camin piah pasang tame, ngak tui. Sa-ai Hữu Đình Chính, khan ka baoh sang urang cei di drei:“Sang cei Hữu Minh Út yau kreih camin. Daok dalam palei biak hu angan, raong pato dom anek mbang bac tal labik tal dhua. Cei bhian tacei pato drei jalan diukrai siam mekre, diuk pasang dalam sang brei iek praong gauk, ndom puac bingi pang, plaih menyai trak gauk. Cei lac kreih camin, tuk halei jeng tacei pato siam mekre ka anek kamuan. Dua diuk pasang dahlak maong cei yau ame, lac kreih camin hadah piah drei ngak tui, patagok ilamu pachreih bac.

Meng akaok thun 2007, sang ong Út hu UBND huyện Thới Bình pok brei angan lac: “Baoh sang pachreih bac”. Sa-ai Hữu Việt Tâm, menuac daok jaik sang, meng sit hu mboh bruk rambah rambup di diuk pasang ong Út piah kuhria ka bruk mbang bac di anek, khan lac:“Sang ong Hữu Minh Út lac sa kreih camin hadah ka ilamu pachreih bac di palei. Yaom lac raidiuk rilo kan kandah, min diuk pasang ong jeng daok abih drei kuhria ka dom anek mbang bac tal labik tal dhua. Tapa nan, ngak jeng prein pambak tabiak, oh lac kreih camin ka rilo sang di palei, bo daok lac kreih camin ka dom puk palei dalam huyện ka baoh sang pachreih bac”.

Tal urak ini, dom urang anek di ong Hữu Minh Út jeng hu bruk ngak tani tanat. Daok ong Út jeng daok jar var haong bruk pato akhar haroh Khmer. Ong sahneng lac, pato akhar haroh piah khik ilamu siam mekre di bhap bini drei, piah klah rabha ilamu, piah ka anek kamuan urang Khmer patagok jalan bac ta-a piah daong padang puk paga, palei negar siam mekre, cakrok. Dom bruk ngak meng hatung hatian di ong Hữu Minh Út bhian hu UBND tỉnh Cà Mau mboh, thau saong alin brei Harak meyaom kayua naih gheih dalam dom bruk pakacah gauk anit ranam taneh ia di bhap bini bangsa takik./.