Di tuk salam uan harei Gru jru Việt Nam 27/2, urang vak Kim Dung daok di ban raya hCM hu kadha ka urang kumei bác sĩ ini:

Meng tuk daok lac sinh viên thực tập, bác sĩ chuyên khoa 2 (BS CKII) Trần Thị Mai Linh (umo 39 thun) khoa Ngoại Thần kinh, Sang iek ruak Chợ Rẫy hu hatai takre bruk blac raih thần kinh, hadei di nan pilih ruah gah blac raih não. Ngan saong Mai Linh, glo akaok hu prein dui pachreih saong rilo kadha biak kandauk, dalam. Mbiah tal harei ini, khoa học yaom lac hu cakrok biak rilo min hu dom kadha ka glo akaok  oh langyah hu abih gah khoa học, bo daok brei roh duah. Langiu di bruk paglaong ilamu ngak bruk, bác sĩ blac raih glo akaok brei pasram rup drei biak catang piah ngak siam, ngak njauk. Kadha ini daong plaih hu bruk mbuan ba tal nhiễm trùng atau ngak lahik nao sa labik hadar kanal, lahik nao bruk menyai ndom, nao mai, jhul urang ruak jeng menuac oh daok thau hagait, gaok mai lac metai.

Yam tame yaok mbang blac raih, tui yaok urang ruak, BS Mai Linh hu jalan ndom puac karei di gauk, duah thau ka gauk gar, sang danaok, ka bruk ngak saong dom bhian randap dalam raidiuk…Bruk sangka nan hu daong ka bruk taong ruak hu siam jang. Urang kumei bác sĩ ini khan lac:  “Pak ini dom bác sĩ blac raih nao ngak biak aval min mai sang biak suai jang, oh mboh ia harei lac yau nan. Kayua rilo tuk blac raih blaoh brei tui iek urang ruak, hu hagait karei halei oh, bloh meng sanang hatai nao sang. Pak ini blac raih oh tui mon bo kuhria tui dom urang ruak blac raih bloh, mboh tani tanat, bác sĩ meng nao sang”.

Di sang iek ruak Chợ Rẫy, kuhria rah tapa yaok adit hu meng 20-30 mbang blac raih u não, labaih 30 mbang blac raih talang raong, talang ka-ing. Langiu di nan, daok hu rilo mbang blac raih karei, bruk ngak biak rilo, bhian tapa prein ngak. Tui PGS.TS.BS Huỳnh Lê Phương, Trưởng khoa Ngoại thần kinh Sang iek ruak Chợ Rẫy, ngan saong dom ruak kan, sa mbang blac raih meda dui atah 7-8 mon, daok dom ruak mbuan jang jeng abih meng 3-4 mon. Ngan saong urang kumei bác sĩ, ngak bruk catang dalam tukvak dui atah yau nan, bhian gaok kan kandah jang urang likei, min bác sĩ Mai Linh yam tapa hu bruk kan kandah nan, kayua tari taring, abih hatai kham merat tui bruk takre di drei.

Trưởng khoa Ngoại Thần kinh Huỳnh Lê Phương lac: “Hadei di tuk bác sĩ Mai Linh bac tamat saong mai ngak bruk di khoa ngoại thần kinh sang iek ruak Chợ rẫy ye bác sĩ Mai Linh biak kham merat, langiu di bruk iek ruak, taong ruak yaok harei, Mai Linh daok hu mbaok tame dom roh duah khoa học dalam khoa. Dahlak taong yaom bác sĩ Mai Linh biak naih joi saong lac sa dalam dom bác sĩ daok tagok jang di anak tal. Dom urang ruak hu bác sĩ Mai Linh blac raih jeng hu siam mekre yau bruk kham merat di adei”.

BS Mai Linh ndom lac, maong gah langiu rup pabhap, mbaok meta rup drei yau oh hu cảm xúc hagait tuk pataom tame ka bruk blac raih sọ não. Min ngan saong dom urang ruak, gauk gar di urang ruak, BS Mai Linh lac sa menuac njauk iek praong, sa menuac ngak dhar ngak phor.

 Sa-ai Nguyễn Thị Tâm, daok di Kiên Giang brei thau,  2 thun tapa blaoh, kuhria meng harei BS Mai Linh dang blac raih u não ka pasang likei di sa-ai, tal urak ini sang sa-ai thau dhar phor biak rilo. Meng 1 khối u ác tính tukvak ka 3, urak ini diuk pasang sa-ai tok daok nao iek ruak veik 6 bilan sa mbang. Yaok mbang nao iek ruak veik, diuk pasang sa-ai caong khin hu taom gaok BS Mai Linh piah khan brei thau bruk bui sambai, prein yava khang kadang di sa-ai. Sa-ai Tâm jeng brei thau, BS Mai Linh lac menuac pabak prein khang, ba chreih chrai piah ka pasang likei di sa-ai yam tapa ruak kik: “Anai Mai Linh lac 1  bác sĩ biak naih gheih saong biak siam hatung hatai. Sang dahlak oh hu jien ndo hagait, min anai abih drei iek ruak brei. Tukvak jit ruak oh nao mai hu, adei ieu phone tuk halei anai jeng pang saong tacei jalan ka adei iek glang pasang likei di sang”.

Yam lac hu hatai khang yau pasei di mangaok bàn mổ, di labik blac raih, min hu dom mbang blac raih oh hu siam mekre yau hatai caong, gaok mai rilo urang ruak blac raih bloh oh daok thau hagait, BS Mai Linh haok ia meta tuk mboh urang ruak palang lahik. Thau lac bruk palang lahik nan meda kayua tai biến y khoa, atau kayua dom ruak karei, ngak brei urang ruak jeng trak jang blaoh tabiak nao miat.

BS CKII Trần Thị Mai Linh lac sa dalam dom bác sĩ kumei takik hu dalam gah blac raih thần kinh. Jaik 14 thun ngak bruk, tapa rilo kan kandah haong bruk ngak, hu tuk urang ruak laik tame bruk var drei jan oh daok thau hagait, min bruk blac raih siam saong njauk tukvak, urang ruak hu siam veik samar, lac prein khang daong ka BS Mai Linh daok ba hatai takre tame bruk ngak./.