Ong Trần Văn Bé (daok di Phường 1, ban Cà Mau), mbaok meta jhuk di urang ngak bruk tangin takai vaih tame labik cakak mbuk oh mek jien Thịnh Barber daok di jalan Ngô Quyền (phường 2, TP Cà Mau). Urang umo jaik 70 thun cambuai khim klao, blaoh ndem lac: “yau klak” saong mai daok di kik katak piah hu cakak mbuk. Ong Bé hu rilo mbang cakak mbuk di pak ini saong tuk halei ong jeng gaok urang bhian cakak mbuk ka drei, nan ye biak bui sambai haong gauk. Sang ong Trần Văn Bé kan kandah nan ye hu dom dam dara cakak mbuk oh mek jien, ong biak uan tabuan, abih di nyu nan lac, dom urang nan ndom puac jeng biak bingi pang nan ye ong mboh biak takre, biak anit.

Kapul cakak mbuk oh mek jien Thịnh Barber kayua saai Trịnh Toàn Thịnh (daok di phường 5, TP.Cà Mau) peih ngak. Dom urang ini lac dom urang daok tui bac pak tiem cakak mbuk di saai, jeng hu rilo urang thau cambaih bruk min anit ranam bruk ngak pahla nan ye hu mbaok tame. Saai Lâm Trang My, urang hu mbaok tame kapul cakak mbuk oh mek jien brei thau lac, hu mbaok tame kapul cakak mbuk drei hu biak rilo janih. Nan lac cambuai klao di urang mai cakak; drei mboh bui sambai tuk ngak bruk hu makna ini; dom ayut saabat jeng bac hu ilamo tuk hu cakak mbuk yaok harei:“Drei meda daong ka dom wa, dom cei gaok kan kandah cakak mbuk hu mbuan jang. Dom urang hu jien mek tame takik, 2 bilan meng cakak mbuk sa mbang, tuk drei cakak mbuk oh mek jien ye dom wa, dom cei, adei mai cakak mbuk hu gam gam jang. Kayua yau nan ye dom wa, dom cei, dom adei mboh biak bui sambai jang. Mbuk likei tabiak atah maong oh lagaih min cakak gam gam jeng abih rilo jien. Kol dahlak cakak mbuk gam daong ka urang, gam patagok hu ilamo dalam bruk ngak di drei”.

Hu biak rilo anek saih atau dom urang gaok kan kandah vaih mai kapul cakak mbuk oh mek jien Thịnh Barber. Yaom lac pandiak hajan, jeng hu caik meng maong 9 tal maong 1 jala pandiak meng harei som tal harei suk yaok adit, tuk halei jeng hu 5 tal 10 urang mai tal labik ini piah cakak mbuk oh mek jien. Bruk halain hatain, sami samar di dom adei saai pan tăng đơ hu ngak ka labik cakak mbuk chreih chrai jang saong dak harei dak hu rilo urang mai. Adei Võ Đắc Nhuận, lac sa sinh vien vaih mai cakak mbuk khan lac: “Dahlak cakak mbuk di pak ini 3 mbang paje, mboh dom adei saai cakak mbuk biak gheih, jeng deih yau dom kieu cakak mbuk bahrau di dalam tiem. Dom sa-ai ndem mayai jeng biak bui sambai. Biak thau dhar phol saong caong maong ka ilamo cakak mbuk di dom adei saai dak harei dak naih gheih jang.

Kapul cakak mbuk oh mek jien ngak bruk hu 5 bilan ini mai. Tuk camriep kapul cakak mbuk oh mek jien hu padang ngak meng di tuk saai Trịnh Toàn Thịnh mboh biak rilo urang kan kathaot, urang pablei ve so oh hu cakak mbuk. Tiem cakak mbuk hu urang ngak, nan ye saai Thịnh dang tabiak peih ngak piah ka dom ayut saabat hu lagaih piah pasram cakak mbuk. Tal urak ini oh lac urang kan kathaot bo gam dom urang hu jien, lagaih jalan nao jeng vaih tame cakak mbuk min saai Thịnh jeng khik tamo asal kadha lac: “brei nao lac daok miat” nan ye oh mek jien bo tok taduan panuac thau dhar phol:“Dom urang bo drei pamaong tal lac dom urang  gaok kan kandah min urang halei vaih mai cakak mbuk jeng hu. Kol dahlak oh neh rabha urang kan kathaot atau urang kaya mada, urang taha atau uranaih. Thei caong cakak mbuk oh mek jien ye vaih mai cakak. Jang yau dom urang hu jien padai mai cakak, dom urang nan jeng biyar jien min dahlak oh mek. Dom urang mboh yau nan ye blei ia mai manyum, abih gauk mboh chreih chrai takre haong bruk ngak ini.

Kapul cakak mbuk di saai Trịnh Toàn Thịnh oh lac hu thau tal ngan haong bruk cakak mbuk oh mek jien ka urang kan kathaot di ban Cà Mau dom bilan tapa, bo lavik mai dom urang dalam kapul daok nao tal dom Pasak raong  iek glang dom urang ruak glo akaok, daong bruk xã hội tỉnh Cà Mau cakak mbuk. Kapul cakak mbuk Thịnh Barber jeng halain hatain nao tal yaok labik di bhum atah biyah halei di dalam tỉnh Cà Mau cacak mbuk oh mek jien, mayah labik halei nan caong khin./.