Saai Phan Bích Ngân pok mayaom dalam danak dak “pahadah prein khang Việt” thun 2022

Saai Phan Bích Ngân ndih tapui thun 1987, di phường An Cư, quận Ninh Kiều, Cần Thơ. Saai njauk ruak meng tuk manek tabiak, bac tal abih pakat tiểu học min saai bahrau glaong hu 1m25, trak 38kg saong oh glaong jang tal tuk praong. Yaom lac rup pabhap sit sot yau nan, min saai hu sa hatai khang yam tapa kan kandah, saai biak takre hu nao bac.

Hadei di tuk bac tamat Đại học Cần Thơ, saai ngak bruk di Kapul urang jaoh jo ban Cần Thơ. Meng hatai saneng lac “urang hu daong ka drei, urak ini drei daong veik ka urang”, saai Bích Ngân ngak bruk abih drei di Kapul urang jaoh jo. Saai jeng lac urang dalam Kapul mayaih khan paok jien bac ka uranaih jaoh jo; likau radaih lăn, pandap panda chỉnh hình ka urang jaoh jo; duah phun jien daong ka urang padang mbang ngui …

Rilo thun tapa, saai Bích Ngân daok lac urang lang panuac ký hiệu dalam kalup kapul urang tangaoh, nao gam haong dom urang tangaoh nao tal tòa án, sang iek ruak, nao likau bruk di dom doanh nghiệp.

Amuk Lê Thái Thị Phương Thảo, Phó akaok Kapul urang jaoh jo ban Cần Thơ brei thau, Ngân abih drei dalam bruk ngak, tari taring bac magru. Abih di nyu nan lac, piah daong ka dom urang tangaoh, oh lac dalam 6 bilan pasram megru katut panak bo yaok harei Ngân jeng pabak veik ngôn ngữ ký hiệu. Ngân hu daong ka rilo urang tabiak tòa ndok veik công bằng saong daong ka rilo urang thau hu quyền bo dom urang jaoh jo hu mbang tui.

Saai Trần Việt Tuấn, Phó Bí thư Thành đoàn, Phó akaok thường trực Kapul dam dara Việt Nam ban Cần Thơ khan lac, saai Bích Ngân urak ini lac akaok lâm thời kalup kapul dam dara jaoh jo ban Cần Thơ. Yaok thun, saai hu ba tabiak dom bruk ngak kein laba daong ka dom ranaih oh patuah hu ma-in sambai, hu taom gaok gauk. Saai jeng kham merat jak ba dom ranaih jaoh jo tame Kalup kapul dom urang jaoh jo saong tame Kapul urang jaoh jo; pambuak gauk peih dom danak dak daong ka dom urang kan kandah di dom tuk lễ, tết: “Ayut Phan Bích Ngân hu daong ngak brei pahadah dom kreih camin diukrai hu trách nhiệm, hu prein khang yam tagok  dalam raidiuk. Meng nan nyu pambak  dalam kapul dam dara, abih di nyu nan lac dom dam dara njauk jaoh jo maong mboh dom kreih camin ini hu prein khang yam tagok dalam raidiuk.”

Langiu di bruk hu pok brei angan praong glang di danak dak “pahadah prein khang Việt” thun 2022, meng bruk rik prein tame, kham marat oh padeih, dom thun tapa, saai Phan Bích Ngân daok taduan hu rilo harak mayaom meng Kapul dom urang jaoh jo ban Cần Thơ; Sở Lao động – Thương binh saong  Xã hội TP. Cần Thơ;  Kapul urang kumei ban Cần Thơ. Yaok sa mbang hu pok mayaom lac sa mbang saai hu pabak prein piah abih drei ka rahra. Saai Phan Bích Ngân brei thau:“Dahlak jeng bac megru hu meng dom saai dalam kapul oh daok huac kanda, drei mboh bui sambai chreih chrai jang. Praong di abih lac drei thau saong ngak siam bruk di drei ye hu urang mboh, urang thau. Dahlak caong lac bruk chreih chrai di drei meda ngak pachreih dom dam dara jaoh jo karei khang hatai jia tame bruk ngak di drei hu siam jang.”

Meng hatai caong diukrai siam makre, urang kumei sit sot Phan Bích Ngân hu ngak brei pambak tabiak hatai khang, jhul patagok bruk kham merat yam tagok di dam dara Việt Nam, abih di nyu nan lac dom dam dara jaoh jo./.

 Urang lang: Thu Thao – 17/10