Anek saih kankathaot hu gru dong brei pandap panda
Gru Nguyễn Nhựt Tân, pato môn Mỹ thuật di sang bac Tiểu học ban sit Phong Điền 1 hu menuac sia thau tal lac urang gru abih hatai haong bruk pato bac, bo gru Tân daok hu caik veik dalam hatung hatian dom anek saih kan kathaot, rahra kan kandah ka hatai anit ranam tuk daong ka dom urang nan meng prein yava tal jien ndo.
Dalam tuk pato bac, rilo mbang gru buh jien kadung di drei tabiak blei dom pandap sit piah pok meyaom dom anek saih kan kathaot bac da-a naih joi. Langiu di bruk blei pandap pok meyaom meng jien bilan takik di drei, gru Tân hu jak ba dom urang, dom kapul ngak pahla piah daong ka dom sang anek saih kan kandah. Meng nan, dom adei sanang hatai tui bac, oh klaak bac meteh dhi:
Bruk daong dom anek saih kan kandah dom mbaik but, kalam, dom baoh siphau ye mboh dom adei bac da-a hu siam jang. Bruk nan dahlak mboh chreih chrai saong daok ngak ka sang bac di drei. Tuk mboh hu siam lagaih ye dahlak pambak praong tabiak tal taong abih dom sang bac dalam huyện.
Thun 2021, tuk jit Covid-19 tamuh tabiak, gru Tân ngak pahla rilo jang meng bruk pablei vé số duah jien daong ka urang kan kathaot. Tuk camereip rilo menuac oh jia lac gru pablei vé số, min tuk mehit gru khan brei thau makna, rilo menuac chreih chrai daong blei, yaok harei pablei hu meng 500 – 1.000 hala.
Dalam bruk ngak pahla, tuk thau hu urang kan kandah, gru Tân samar pambuak bruk haong karja palei nao tal sang duah thau, hadei di nan tagok mạng xã hội ieu dom urang ngak pahla daong brei. Yaom lac bruk di sang bac biak jar var min gru tuk halei jeng caik tukvak piah duah thau saong nao jak ba. Kuhria tal urak ini, gru Tân saong dom ayut sahabat hu jak ba, daong ka yaok ratuh urang kan kathaot, urang ruak kik, daok sa drei.
Tui ong Nguyễn Văn Sang, Akaok Jabat Pato Megru huyện Phong Điền, gru Nguyễn Nhựt Tân lac gru hu ilamu pato bac khang kajap, hu hatai anit ranam bruk ngak. Langiu di nan, gru daok abih drei hu mbaok tame dom bruk ngak pahla, haong yaom jien jak ba, daong ka yaok ratuh rahra saong anek saih jaik 500 triệu đồng.
Bruk ngak di gru Tân hu prein pambak praong tal dom gru pato dalam sang bac saong gah pato megru dalam huyện Phong Điền. Ini jeng lac kreih camin piah ka urang jakar, gru pato, urang ngak di dom sang bac dalam huyện bac megru, ngak tui. Langiu di bruk pato bac, daok ngak siam bruk ngak pahla piah padang palei negar dak harei dak siam mekre jang, jeng yau daong ka dom anek saih sang kan kandah hu nao bac da-a, harei hadei daong veik ka puk paga, palei negar.
Bruk ngak siam mekre di gru Nguyễn Nhựt Tân hu ngak brei mekre jang rup binguk urang gru pato dalam xã hội harei ini. Jia lac, meng hatai anit ranam peih praong, gru Tân meda ieu hu ilo jang dom urang ngak pahla daong brei di anak tal, piah hu rilo jang dom anek saih kan kandah, urang kan kathaot hu labik piah pambak tame, hu labik piah daong brei, ba gauk yam tapa kan kandah, glaih glar dalam raidiuk./.
Urang lang: Hanipha- 22/8
Viết bình luận