Kadha vak di Nam Trang, urang vak di Rayo sap ndom Viet Nam daok di Tây Nguyên hu ndom tal bruk ini:

Tapa 21 mbang alin brei darah, min sa-ai Vũ Minh Cường, urang ngak bruk di jabat huyện ủy  Krông Búk jeng daok kanar hadar ka mbang camereip “brei darah”. Sa-ai Cường brei thau, sa-ai halan hatian brei darah tuk daok pal akaok kapul dam dara di thun 2009. Mbang akaok mereip brei darah, sa-ai gam huac gam kham merat yam tapa bruk cagar veik meng amaik di sa-ai. Jeng patuah, tapa rilo mbang menyai palua, hadei di yaok mbang brei darah mboh sa-ai jeng daok khang kadang nan ye amaik di sa-ai oh daok pacang veik. Urak ini, amaik di sa-ai hu jeng urang abih drei pathau khan, jak ba ayut sahabat, gauk gar dalam sang tame bruk brei darah:  “Mbang akaok mereip tuk brei darah drei mboh biak huac, min tapa blaoh ye drei meng abih huac saong mboh hu yaom dalam rai diuk. Mbang ka dua ye mai sang amaik ndom tapak lac raong he thau hadom piah ka he nao brei darah. Amaik oh thau ye drei langyah mbang ka sa, mbang ka dua, blaoh mbang ka 3 amaik jeng daok puac lac tal mbang ka 4, ka 5 ye amaik oh ndom hagait tra. Harei ini nao brei darah ye amaik jeng tui mong tui iek blaoh ba tagok facebook, yau nan amaik jeng thau cambaih yaom glaong di bruk ngak ini.”

Yaok thun, kuhria rah tapa Đắk Lắk hu jaik 30 ribau urang mboh tangin tut angan brei darah saong taduan mek hu jaik 20 ribau đơn vị darah. Meng dom kanjaoh darah ini, hu ba mai rai diuk ka dom urang njauk ruak daok caong hu darah. Sa-ai Lê Thị Thanh, daok di palei Tân Phú, xã Ea Tóh, Krông Năng hu anek njauk ruak ralai darah meng daok sit mai, yaok bilan njauk tame darah dua mbang, rah tapa labaih 10 thun gam haong anek mesruh saong ruak kik pandik harao, jang urang halei karei, sa-ai thau cambaih yaom di dom kanjaoh darah urang halan hatian brei: “Ndua dhal phol dom adei sa-ai hu mai brei darah di drei ka dom urang njauk ruak saong anek di dahak hu rai diuk siam jang, khang kadang jang. Tapa ini, adei jeng ndua dhal phol dom cei dom anai dom adei sa-ai hu mai brei darah di drei ka dom urang ruak hu rai diuk siam mekre jang, khang kadang jang.”

Đắk Lắk lac sa dalam 10 labik hu bruk brei darah glaong dalam negar. Dalam 5 bilan akaok thun 2023, tỉnh taduan hu labaih 12.400 đơn vị darah, mek hu labaih 62% bruk bo Trung ương jao brei. Yau nan min, yaom darah tok hu pataom tame dalam dom bilan dalam thun, oh lac bilan halei jeng hu. Urak ini, dalam tỉnh bahrau pabak hu jaik 80% darah brei ka bruk iek ruak. Amuk Ayun H’Hương, Akaok kapul chữ thập đỏ tỉnh Đắk Lắk brei thau: “Dalam tukvak anak tal, Mban tacei pato brei darah di tỉnh Đắk Lắk meda peih ngak khang jang bruk jak ba manuac urang, dom baoh sang saong taong abih hệ thống chính trị hu mbaok tame bruk ngak ini. Biak di nyu lac dahlau di abih dom urang pal akaok ngak kareih camin saong peih ngak bruk brei darah dahlau bloah ka meng pathau khan jak ba dom urang, kapul nyaom tame, nan ka meng brei pambak prong bruk brei darah dalam tukvak anak tal meda hu siam jang saong daong hu ka rilo urang ruak plaih di metai.”

Brei darah ngak pahla lac sa bruk ngak biak prong glaong, sa bruk ngak siam gheih, brei mboh hatai anit ranam di anek manuac saong bruk ngak di yaok urang ngan haong bol bhap rah ra. Taphia di nan, bruk ngak ini jeng lac bruk  biak hu yaom, brei mboh jalan ngak "anit manuac yau anit rup drei" di bangsa drei./.