Tame ngak bruk di xã Long Vĩnh meng di thun 1979 ngan haong bruk ngak lac Phó Ban Khau tin ilamo gam khik ramik gah papar sap xã Long Vĩnh, huyện Gò Công Tây, tỉnh Tiền Giang. Jaik 45 thun pambuak haong bruk pathau khan, thaot binguk di saai Tèo hu jeng bhian randap haong rahra daok pak ini.

Taom gaok saai Tèo, bruk mbuan mboh nan lac sa urang salut mbut, abih hatai haong bruk ngak. Tal urak ini, yaom lac umo thun oh daok sit min saai jeng daok chreih chrai ngak siam bruk di drei, tuk halei jeng nao jaik pathau khan dom bruk ngak di puk palei, yau ye Padang ngak palei pala bahrau kiểu mẫu, pathau khan, jak ba rahra peih bruk tut angan tame pataom mek hareik hareim, parabha janih nerak di pak sang; pacang caga jit ruak, jak ba rahra nao klauk jru vắc xin… Dom asal kadha pathau khan ini hu saai Tèo vak veik habar ka nyu mbuan thau, blaoh eng drei puac, thu saong ba tagok mangaok dom loa papar sap di xã Long Vĩnh piah jak ba rahra thau saong hu mbaok tame ngak.

Di xã Long Vĩnh, saai Tèo daok padang ngak yaok adit 3 danak dak thời sự palei hu ginup asal kadha, lac khau tin, kadha vak, dom kadha yau ye kadha salih bahrau hành chính, kadha adat hukum, kadha y tế… Asal kadha hu pathau khan lac dom jalan ngal, sarak di Đảng, hukum di Kanja; pathau khan ka bruk cak rok patagok kinh tế - ilamo - xã hội - quốc phòng an ninh di palei. Dalam nan, sangka pathau khan, pato pakai adat hukum, pacang caga jit ruak saong padang ngak palei pala bahrau paglaong, palei pala bahrau kiểu mẫu... pachreih hu rahra tui pang yaok harei.

Abih di nyu nan lac, dalam tukvak pacang caga jit ruak Covid-19 tamuh khang, peih ngak dom Sarak 15, 16 di Thủ tướng Rajaei, Rayo Papar sap xã lac jalan pathau khan di palei. Kayua yau nan ye, saai Tèo njauk brei peih rilo jang tukvak danak dak jang yau maong papar sap, meng nan samu ba dom jalan ngak di Đảng, Kanja, di palei tal rahra hu siam lagaih saong samar di abih.

Langiu di nan, saai Tèo daok sami samar dalam bruk pathau khan padang ngak palei pala bahraupaglaong, palei pala bahrau kiểu mẫu di xã Long Vĩnh meng bruk patagok tukvak, peih rilo kadha papar, tiểu phẩm pathau khan piah jak ba rahra pak ini hu mbaok tame padang ngak palei pala bahrau, peih bruk puh ramik, pala bingu, neh rabha janih nerak, daong ba Long Vĩnh ngak ngak hu bruk palei pala bahrau kiểu mẫu di thun 2022.

Oh lac thau cambaih saong peih ngak siam bruk pathau khan di palei, saai Tèo daok lac sa urang vak tari tareng pambuak bruk vak dom khau tin, kadha vak di palei ngan haong gah Papar sap pakat huyện saong dom blah khau tin di Huyện ủy, UBND huyện Gò Công Tây.

Meng dom bruk ngak hu siam lagaih saong rik daong abih drei di saai Tèo, labaih 35 thun tapa, Rayo papar sap xã Long Vĩnh tuk halei jeng lac kapul ba akaok nao dahlau dalam dom rayo papar sap cơ sở di huyện Gò Công Tây. Meng kham merat abih drei, saai Tèo hu taduan rilo Huy chương, Harak mayaom di Rayo sap ndem Việt Nam, Sở Ilamo, Thể thao saong Du lịch tỉnh Tiền Giang, Rayo papar sap saong papar binguk Tiền Giang, UBND huyện Gò Công Tây.  

Bí thư Đảng ủy xã Long Vĩnh Đặng Công Tiên brei thau: Saai Tèo lac sa urang jakar ngak bruk abih drei, tuk halei jeng kham marat ngak salah bruk di drei, meng hatai anit ranam bruk ngak, saai yam tapa yaok kan kandah. Yaom lac jien bilan di urang jakar papar sap di pakat xã oh rilo, min saai jeng kham merat ngak bruk, oh huac kan kandah, glaih glar.

Dalam zaman cak rok patagok công nghệ thông tin yau urak ini, dom urang ngak gah papar sap - papar binguk yau Võ Văn Tèo hu rik daong pathau khan khau tin njauk, samar drah tal bol bhap rahar./.