Nguyễn Đức Vinh tui amaik ame meng Nam Định tame TP.HCM tuk daok bac tal 4. Daok dalam labik trọ di phường Thạnh Lộc (quận 12), Vinh kanar hadhar tuk bahrau tame mai ye hu dom adei sa-ai urang jakar đoàn mai jak tame dom bruk man-in sambai brei ka uranaih.

Salah bruk nghĩa vụ quân sự mai veik mai sang, Vinh tame đại học, blaoh bac ilamu ngak bruk Đoàn, saong thun 2017 hu pok ngak bí thư Đoàn phường Thạnh Lộc. Dalam bruk ngak đoàn, sa-ai caik hatai sangka yaok bruk ngak tuk kanar hadhar veik bruk di drei meng dom harei oh ka bhian randap dalam labik daok trọ. Vinh khan lac: "Drei prong tagok meng ini nan ye caong khin daong hasit pren ranaih ka puk palei, labik hu daong ka baoh sang di drei hu rai diuk siam jang".

Sa-ai ieu pataom dom ayut sahabat mai haong bruk ngak pahla, samar daong dom urang ngak daok atah mai ini ngak bruk bo laik tame kan kandah. Dom mblang ma-in hè biak bhian randap haong dom uranaih pak ini. Vinh pambuak bruk ba mai ka danak dak 5.000 ly aia tasau cakrok patagok pren yava ka anek bhik urang ngak. Dom harei ini, tuk rilo urang ngak lahik bruk ngak, sa-ai daok nao jak ba rilo labik piah alin hadaih pandap panda, daong ka urang ngak yam tapa kan kandah di anak meta.

Hu jeng bhian randap, thun halei jeng yau nan, dalam melam giao thừa, Vinh haong dom ayut ranaih saong dom urang ngak pahla  nao tal yaok bilik trọ di urang ngak oh nao palei mbang Tết. Dom harei ini, sa-ai hu duah thau bruk meng dom po sang trọ, kuhria caga ka mikva mbang Tết atah palei.

Sa kapul labaih 20 urang halar hatian, hu gam dom ayut hadei di klak njuk jru phian hu ngak bruk haong gauk. Dom ayut parabha jeng dom tổ, nao pasang iek khik caga an ninh trật tự ka dom khu phố. Tukvak Thạnh Lộc lac sa dalam dom labik pandiak di jit COVID-19 pak TP.HCM, dom urang dalam kapul jeng hu mbaok dalam kapul nyaom pacang caga jit ruak di phường.         

  Dua thun tapa, tal dom harei jaik Tết, Vinh haong dom ayut hu padang sa labik padeih takai angaok jalan roya 1 labik tapa phường Thạnh Lộc. Dom klaok aia la-ar hu ba brei tapak tangin mikva angaok jalan nao palei mbang Tết, dom hộp sữa alin brei ka dom adei sit nao tui amaik ame. Gaok radaih halei khut, ye dom ayut pasiam veik oh mek jien. Vinh khan lac, labik jalan nao tapa phường puac thun bhian hu rilo urang ngak nduac radaih meng Đồng Nai, Bình Dương, Bình Phước... nao dom tỉnh miền Tây nan ye caong khin klah rabha meneing dom cuang kandah haong mikva drei.

Nguyễn Đức Vinh lac sa dalam 10 urang bahrau taduan mek hu giải thưởng Urang halar hatian pakat negar thun 2022 di Kapul dam dara pakat negar pok brei di akaok bilan 12. Ndom tal Vinh,  urang hu ndom chip tal dom bruk ngak halar hatian hu kuhria caga saong peih ngak tani tanat. Meda ndom tal kapul nyaom urang "Daong ka bhap bani", dom bruk padang ngak mỹ quan đô thị yau: Labik phố dahlak ranam, Canah jalan dam dara atau  bruk "Gilang tapuk bhap bini"... bo yaok công trình, yaok bruk ngak jeng hu karja palei, mikva haong dom ayut ranaih di labik daok pachreih tui.

Sa-ai Nguyễn Hoài Bảo, bí thư Quận Đoàn 12 (TP.HCM), brei thau: "Ayut Vinh biak sami samar, tuk halei jeng kham merat roh duah, bac megru dom bruk ngak gheih, jalan ngak siam piah pandar di puk palei. Vinh jeng lac urang thau caik hatai pang panuac pato pahadar di urang karei, hatai caong khin di urang đoàn, dam dara piah peih ngak dom bruk ngak ka nyu siam laghaih, kein laba, dak harei dak pabak hatai caong khin di dom ayut sahabat ranaih".