Amuk Châu Thị Xéo nao tal yaok baoh sang jak ba mikva pambuak gauk pala măng tây xanh piah patagok kinh tế

Palei Thành Tín, xã Phước Hải, huyện Ninh Phước hu labaih 90% meuac lac urang bangsa Cam. Ini lac bhum taneh cuah kan kathaot, luac thun thu lagu. Raidiuk kan kandah ngak brei rilo urang kumei Cam palei Thành Tín klaak puk palei nao ngak mbang atah. Bruk ini nyu ngak brei amuk Châu Thị Xéo mboh suh sah dalam hatai. Meng nan, amuk kham merat duah thau, bac megru ilamu meng dom bruk pala ngak lagaih haong taneh thu lagu. Amuk mboh lac taneh riya di palei meda pala hu phun măng tây xanh piah cakrok kinh tế sang, daong ka mikva tabiak truh kan kathaot. 

5 thun dahlau, amuk Bà Châu Thị Xéo ramik ngak pasiam taneh thu lagu di sang drei piah pala iek 1 sào phun măng tây xanh. Meng pandar jalan pruh ia patak pataom saong ngak njauk tui ilamu iek glang nan ye phun măng tây xanh tamuh siam brei năng suất glaong. Meng hu kein laba, amuk Xéo peih praong tagok 5 sào pala măng tây xanh, yaok bilan mek jien tame hu labaih 40 triệu đồng. Meng jak jeng di sang drei, amuk nao tal yaok baoh sang jak ba mikva pambuak gauk pala măng tây xanh piah patagok kinh tế. Thun 2018, amuk Châu Thị Xéo hu mbaok tame padang Hợp tác xã dịch vụ nông nghiệp tổng hợp Châu Rế saong hu pok ngak Yam ndok. Amuk Châu Thị Xéo brei thau:“Meng di tuk drei hu pok tagok ngak giám đốc HTX, drei duah jalan piah pablei pandap ka bhap bini…”

Sa-ai Châu Hồng Tiêu, daok di palei Thành Tín, xã Phước Hải, huyện Ninh Phước khan lac:“Dalam HTX ye amuk Bà Châu Thị Xéo hu daong pajaih măng tây hacih ka sang pala di mblang taneh puk di HTX Châu Rế...”

Meng pambuak bruk khang kajap haong dom doanh nghiệp, dalam luac tukvak pa-atah di gauk piah pacang caga jit, bruk pala, ngak saong pablei măng tây xanh di HTX Dịch vụ Nông nghiệp Tổng hợp Châu Rế jeng rah tabiak yau krung. Dalam bilan Tết, măng tây xanh hu yaom meng 30 tal 50 rabau đồng sa kg, tagok jang labaih 10 rabau đồng sa kg duk haong tukvak pa-atah di gauk.

Lac 1 baoh sang kan kathaot, meng tuk tame HTX Dịch vụ tổng hợp Châu Rế, langiu di bruk hu daong jien pala măng tây, sang amuk Đạo Thị Thúy daok hu HTX blei veik haong yaom tani tanat. Pak di tukvak palei Thành Tín daok hu dom urang njauk Covid- 19 dalam bhap bini, nan ye bruk nao mai di bhap bini brei takik veik, bruk pablei, pajeng ba măng tây xanh jeng biak kan kandah min meng 2 sào măng tây xanh, yaok harei sang amuk Thúy mek jien tame hu jaik 700 rabau đồng. Meng pablei hu măng tây tani tanat bo sang amuk Thúy hu tabiak truh kan kathaot:“Tukvak jit ruak ini kayua HTX Châu Rế di amuk Châu Thị Xéo, dom urang dalam HTX thei jeng kham marat dalam bruk pala phun măng tây hijao…”

Mboh hu bruk ngak kein laba di amuk, akaok UB bhap bini tỉnh Ninh Thuận hu pok Harak meyaom menuac urang ngak hu bruk praong dalam pakacah gauk di urang ngak nong Ninh Thuận jum pataom gauk pala drak, ngak mbang, pablei salih naih joi, ngak kaya meda saong patrun kathaot khang kajap vaktu 2016 – 2020 brei ka amuk Châu Thị Xéo./.

Urang lang: Thu Thao – 02/02