Daong diuk ka 23 urang njauk gar veik di craoh kayua gaok hajan khang 

Maong 4 bier harei 6-8, Jabat cảnh sát pacang khuah padam khuah saong daong duah urang njauk bala, Công an tỉnh Quảng Nam taduan hu panuac khan lac hu sa kapul 23 urang hu anek saih, gru pato di sa sang bac THPT di huyện Thăng Bình nao main di labik suối Tiên (xã Quế Hiệp, huyện Quế Sơn, Quảng Nam) ye daok gar veik di mangaok ceik kayua hajan khang, ia craoh tagok glaong, oh tapa hu gah daih craoh, daok ieu daong. Hadei di tuk taduan hu panuac khan, jabat brei  sa sruh radaih daong urang gaok bala haong 15 urang jakar, urang lin samar nao tal labik. Gam haong nan, tapa phone par tangin, kapul hu pato tacei urang pilih ruah labik salamat dalam tuk kapul nao tal labik piah daong.

Hadei di tuk nao tal labik, kapul mboh hu labik, pato tacei dom urang nan nao tal labik siam lagaih. Hadei di nan, kapul hu ba kanyan, katung talei ba 23 urang nao tapa craoh hu salamat, bruk daong nan hu ngak salah tuk maong 5 meteh bier harei nan. Hu thau, kapul anek saih saong gru pato hu 28 urang, 5 anek saih nao dahlau nan ye tapa hu gah ini craoh, daok 23 urang gar veik oh tapa hu.

Harei 8-8 Akaok negar Nguyễn Xuân Phúc hu payua harak mayaom Jabat cảnh sát pacang khuah padam khuah saong daong duah urang njauk bala, Công an tỉnh Quảng Nam biak naih daong hu 23 urang gar di craoh kayua langik tasik biak jhak. Dalam harak, Akaok negar vak lac: "Meng truyền thông, akau biak bui sambai tuk thau lac dom urang lin di Jabat cảnh sát pacang khuah padam khuah saong daong duah urang njauk bala, Công an tỉnh Quảng Nam daong hu ka kapul gru pato saong anek saih gar di suối Tiên (dalam xã Quế Hiệp, huyện Quế Sơn, tỉnh Quảng Nam) kayua hajan ia sua tagok glaong.

Hadei di tuk taduan hu panuac khan, dom adei sa-ai samar drah tagok jalan nao daong, tal pak di labik, ba tabiak jalan ngak, yam tapa craoh ia tagok glaong, nduac khang, ba urang njauk bala nao tal labik salamat. Akau pok mayaom bruk khang hatai, oh huac kan kandah saong hu ilamo daong urang njauk bala di dom urang dalam kapul, bruk ngak di kapul hu daong ngak brei hadah jang thoat binguk di urang Công an bhap bini, tabiak meng bhap bini, duh ka bhap bini, oh huac kan kandah, metai lahik, khang hatai khik caga suan yava saong drap ar di bhap bini. Yaok bhap bini njauk kham merat paglaong hatai caga dahlau dalam bruk pacang caga bala meng langik tasik, sabar langyah dom bala meda rahtabiak. Gam tui di nan jeng ieu kakei dom tinh, ban jhul khang bruk pathau khan, pato tacei bhap bini tuk nao me-in dom labik mbuan hu bruk kan kandah, paglaong hatai saneng dalam bruk pacang caga bala meng langik tasik, pacang caga haong bala saong daong duah urang njauk bala, kayua raidiuk salamat di bhap bini"./.

Urang lang: Thu Thao – 15/08