Ong Đô Hô Sên urak ini ngak gam 2 bruk lac urang hu angan je dalam bhap bini Cam (xã Bình Sơn, H.Long Thành) gam lac hakem di sang magik Islam bangsa Cam. Ong hu pambuak duah bruk ini piah pathau khan, jak ba mikva ngak njauk tui jalan ba di Đảng, sarak hukum di Kanja, dom adat di puk palei. Ong tuk halei jeng ba akaok nao dahlau dalam bruk peih ngak dom tal pato akhar vak di mikva, khik ramik, patagok dom yaom glaong ilamo di bangsa.

Sa bruk ngak ka ong Đô Hô Sên hu Ủy ban Bangsa pilih ruah pok mayaom lac urang hu angan je dalam taneh ia lac ba akaok nao dahlau dalam bruk ngak njauk tui dom adat di kanja, abih di nyu nan lac dalam tukvak kan kandah yau dalam tuk tamuh jit ruak Covid-19 meng blaoh. Ong Đô Hô Sên khan lac”Pambuak haong rahra piah peih ngak njauk dom sarak di kanja, jang yau samar drah brei thau dom hatai sahaneng, dom caong maong di mikva lac bruk ngak di urang hu angan je dalam bhap bini bangsa takik, di sa urang hakem”.

Bruk ini hu ong kham marat peih ngak tuk jit ruak Covid-19 tamuh tabiak. Di tukvak nan, tuk kanja palei brei thau lac brei padeih ngak dom bruk agama di sang magik, ong haong mban hakem pathau khan brei mikva ngak catang tui. Piah ka dom urang njauk ruak ngak njauk tui dom adat ong gam haong rahra pambuak haong palei sangka bruk mbang huak saong bruk nao mai piah ka mikva sahanang hatai taong ruak.

Rilo urang hu angan je dalam bhap bini bangsa takik daok lac kreih camin hadah dalam padang bruk ngak mbang duah jien ka sang, duah bruk ngak ka urang daok jaik taphia saong rik daong tame bruk cakrok di palei. Ong Thạch Vương, lac urang hu angan je dalam bhap bini bangsa Khmer (ấp Bình Minh, xã Suối Cát, Huyện Xuân Lộc) lac sa dalam dom urang yau nan. Ong Thạch Vương tuk halei jeng ba akaok nao dahlau dalam bruk di palei, pathau khan, jak ba mikva bangsa takik peih ngak siam dom jalan ngak, sarak di Đảng saong hukum di kanja.

Urak ini sang ong lac baoh sang ngak mbang, pablei salih naih joi di huyện. Ong Thạch Vương brei thau lac, hadei di rilo thun kham marat ngak mbang, sang ong hu raidiuk tani tanat. Langiu mblang taneh di sang, ong daok pah veik hamu, blei mac katung, mac li-ua, mac pruh jru piah caga dahlau meng bruk ngak taneh, sangka iek glang jang yau yuak kuak kaya nong. Ong pah menuac ngak di palei, dalam nan hu rilo urang bangsa takik. Meng rilo thun tapa, ong Thạch Vương haong sang drei hu daong ka mikva kan kathaot, sang kan kandah 50 paok pandap, yaok paok yaom meng 350 ribau daong.

Amuk Lương Thị Như Nga, Phó akaok Jabat Bangsa ban Long Khánh ndom lac, ong Vòng Nhì Sập, urang hu angan je dalam mikva bangsa Lo, daok di puk 1 xã Bình Lộc ngak hu biak siam bruk rik daong ka danak dak pachreih bac, pachreih megru di palei. Rilo thun tapa, ong Vòng Nhì Sập haong dom urang karei dalam rahra urang Lo peih tal bac pato sap negar langiu oh mek jien ka dam dara, daong ka dom urang ini hu ilamo ka sap negar languy piah nao likau bruk ngak, nao bac magru di negar langiu.

Langiu di nan, ong daok patak pataom meng kein laba di bruk ngak puh piah yaok thun alin 100 paok jien bac ka dom anek saih dalam palei. Taeng di tuk harei roya meng kan di rahra, ong hu pambuak haong Ban Trị sự danaok Quan Âm Bình Lộc jak ba dom urang ngak pahla alin 40 paok jien bac saong 641 paok pandap ka anek saih, sinh viên gaok kan kandah, mikva bangsa takik, urang taha, urang jaoh jo, kuhria tabiak yaom jien abih tih lac 203 triệu đồng./.