Atah di ini jaik 2 thun, Sang iek ruak Lê Văn Thịnh hu peih pakak, ba tame ngak bruk Sang mbang huak haniem phul – sang huak 0 đồng duh brei saoh ka urang ruak, gauk gar urang ruak, urang ngak gah y tế gaok kan kandah dalam raidiuk. Sang mbang huak haniem phul hu dom manuac urang, kapul daong meng rilo jalan karei di gauk.

Jalan sahaneng padang ngak tabiak sang mbang huak haniem phun tamuh tabiak tuk Bác sĩ CKII Trần Văn Khanh, Yam ndok sang iek ruak Lê Văn Thịnh, maong mboh rilo urang ruak, gauk gar urang ruak mbang huak var jala pandiak biakk takik, kurang ralaow ikan. BS Trần Văn Khanh khan lac: “Urang ruak njauk mbang ginup trei, ginup chất piah pabak prein yava, samar abih ruak. Gauk gar urang ruak jeng njauk mbang hu ginup piah hu prein iek glang urang ruak. Kayua yau nan ye, sang iek ruak hu jak ba dom urang ngak pahla padang ngak sang mbang huak Haniem phul piah brei saoh pok lisei jalan pandiak (yaok adit 5 harei) ka urang ruak saong gauk gar di urang ruak, urang pablei vé số, gam urang ngak dalam sang iek ruak gaok kan kandah, meng di tuk dalam bilan jit ruak Covid-19”.

Sang mbang huak Haniem phul hu padang ngak di sa mblang taneh praong dalam sang iek ruak, phul hijao lanieng lanoi vil val nan. Jaik maong 11, yaok bruk caga ka var huak hu ngak salah. Dom anai acei ngak bruk pahla rami ramik pandap mbang tame dom khay. Amuk Nguyễn Thị Xuân Diệp (umo 70 thun, sang daok di xã Đại Phước, huyện Nhơn Trạch, tỉnh Đồng Nai) ndem lac: “adei di dahlak gar ma-ik, hu dom y, bác sĩ abih drei taong ruak saong hu tapa kan kandah. Sang dahlak biak kan kandah, nan ye adei di dahlak hu sang iek ruak daong jien daok iek ruak. Daok bruk mbang huak, dom harei camriep kol dahlak hulin biak glaih glar kayua yaom kaom biak chit, dalam tuk nan, adei dahlak njauk caong mbang dom pandap mbang siam piah pasiam veik prein yava hadei di tuk blac raih. Tuk camriep, dahlak hu tapa veik sang huak haniem phul, min mboh bàn, kik, labik vil val nan biak gheih nan ye oh khin yam takai tame. Hadei di nan, dom urang daok gam bilik mboh dahlak biak kan kandah nan ye tacei dahlak mai tal pak ini. Yaom lac dom var mbang oh mek jien, min pandap mbang biak bingi saong dom anai, acei duh ka drei abih hatai. Likau haong po brei ka dom acei anai tuk halei jeng hu prein yava khang kadang piah tani tanat bruk ngak di Sang huak Haniem phul hu suai lavik”.

Taphia di Sang huak haniem phul, di sang iek ruak ini daok hu Giaraong brah an sinh. Giraong brah ini caik di pabah mbang tame tabiak di Jabat Công tác xã hội lac baoh giraong dang meng mica sambo patih. Gah dalam pabah mbang kreih jangaih lac dom labik caik dom kadung brah janih 5kg. Brah hu angan pablak haong dom kadung hijao hu brah karai. Sa papal vak cambaih: “Urang ruak nao iek ruak di sang iek ruak meyah biak kan kandah caong hu daong brah likau taom gaok pak ini”

Urang ruak taduan hu bruk daong ini biak bui sambai saong bak hatai anit ranam dalam tuk ruak kik, kan kandah. Dom urang ini caong ka hatai anit ranam ini dak harei dak pambak praong jang piah ka rilo urang ruak gaok kan kandah hu daong saong klah raba anit ranam./.