Amuk Mai nao jak ba jien, jak ba urang buh prein tame ngak tatua di rilo labik dalam tỉnh Đồng Tháp

Ala pandiak khang, angaok sruh radaih mô tô klak, amuk Tống Thanh Mai nao duah thau bruk padang ngak tatua Năm Biết (xã Tân Phú Trung, huyện Châu Thành) saong pachreih ba dom urang dalam kapul daok ngak tatua. Tatua Năm Biết hu peih tabiak ngak meng harei 1/3 meng blaoh, atah 25m, praong jaik 4m, yaom jien buh tame ngak labaih 300 triệu đồng. Yaom jien padang ngak tatua ini kayua UBND huyện Châu Thành daong meneing, daok viek lac amuk Tống Thanh Mai jak ba dom urang ngak pahla saong bhap bini pak nan rik tame.

Saai Trần Thanh Tùng, daok di xã Tân Phú Trung, huyện Châu Thành khan lac: "nai Mai hu prein biak praong dalam padang ngak tatua Năm Biết. Mbaik tatua baharu nyu praong, laneing meda daong ka bhap bini nao mai, pajeng ba pandap panda hu mbuan lagaih jang”.

Dalam 15 thun tapa, amuk Mai rik tame labaih 500 triệu đồng, amuk hu nao jak ba rik pataom jien padai saong peih bruk padang ngak labaih 150 mbaik tatua palei, yaom labaih 30 tỷ đồng. Tatua bê tông bhian praong 3,5m, trak 2,5 tấn tagok meda nao tapa hu. Piah mek hu hatai jia ngan haong dom urang buh jien tame daong ngak, meng di tuk padang ngak tatua blaoh, abih tih dom bruk pambuak tal jien padai, pandap panda padang ngak hu amuk Mai brei thau cambaih laih. Meng nan, dom urang ngak pahla biak jia tame saong sanang hatai rik jien tame daong.

Nao gam haong amuk Mai angaok jalan “pambuak dom ar bui sambai” lac 3 Kapul padang tatua-jalan ngak pahla di Chi hội Ilamo kỹ thuật tatua jalan ban Sa Đéc. Amuk Mai ngak bruk pasang iek labik padang tatua, jak ba urang ngak pahla rik jien tame saong peih bruk padang ngak… Daok kapul padang tatua jalan ngak pahla meda rik prein tame padang ngak tatua, khik njauk jalan ngak, njauk ilamo tui jalan ba tabiak.  

Ndom ka bruk kayua halei amuk ngak bruk ini, amuk Mai khan lac, thun 2007, dalam sa mbang nao rivang sa baoh sang sarak kanja daok di xã Bình Thạnh, huyện Cao Lãnh, mboh hu biak rilo anek saih njauk cang ghe gilai, atau ia thu ye caluai tapa kraong piah nao bac. Meng nan, amuk saneng tal bruk ngak tatua piah ka anek saih saong bhap bini nao mai hu siam lagaih. Saneng ye ngak, amuk Mai mek jien patak pataom jien di sang saong jak ba gauk gar rik tame piah padang ngak 2 tatua bê tông di xã Bình Thạnh, yaom jien ngak tuk nan labaih 100 triệu đồng.

Dom thun hadei di nan, amuk Mai daok nao jak ba jien, jak ba urang buh prein tame ngak, pambuak gauk ngak tatua di rilo labik dalam tỉnh Đồng Tháp. Thun 2013, amuk Tống Thanh Mai hu pok ngak akaok Chi hội Ilamo kỹ thuật tatua, jalan ban Sa Đéc.

Phó akaok UBND ban Sa Đéc Võ Thị Bình brei thau, amuk Tống Thanh Mai lac urang abih hatai haong bruk ngak pahla, bruk ngak ka rahra, abih di nyu nan lac dalam bruk ngak tatua puk palei. Meng hu bruk ba tangin, rik prein di amuk bo rilo mbaik tatua gam gam hu padang ngak dalam saong langiu ban, hu daong ka bhap bini nao mai mbuan lagaih, jhul patagok kinh tế - xã hội. Urak ini, yaom lac umo taha, praong thun, min amuk Mai jeng daok buh abih drei hu mbaok tame bruk ngak tatua puk palei./.

Urang lang: Thu Thảo – 21/03