Di huyện Côn Đảo, tỉnh Bà Rịa – Vũng Tàu, Kadung jien pahla Kim Oanh haong Kadung jien bac Vừ A Dính hu jao alin 80 paok jien bac tal dom anek saih kan kathaot kham merat yam tapa kan kandah bac ta-a naih joi, anek di dom urang jakar, urang lin di Bilai Ra đa 590, di Trung đoàn 251- Bhum 2 Hải quân. Kapul hu nao rivang, alin pandap ka dom urang lin daok guk chính trị dahlau deih urak ini daok diukrai di huyện Côn Đảo.

Ndem mayai haong dom anek saih hu taduan jien bac, amuk Trương Mỹ Hoa - Phó akaok negar dahlau deih, akaok Kadung jien bac Vừ A Dính, akaok kalup kapul Kayua Hoàng Sa - Trường Sa anit ranam brei thau lac: “Yaom jien bac oh rilo min brei mboh hatung hatian di dom urang daong brei saong bruk ba tangin tame haong gauk pamaong tal dom anek saih daok di kaoh pulao, daong ka dom kamuan yam tapa kan kandah hu nao tal sang bac, ngak ka dom bruk caong maong hu jeng biak”.

Danak dak “Pabam pajaih ka harei hadei” di Kadung jien bac Vừ A Dính daok taduan hu bruk daong 2 sinh viên di huyện Côn Đảo urak ini daok tui bac di dom sang bac đại học dalam mbaok taneh. Dalam nan, Tập đoàn Kim Oanh lac kapul pambuak bruk nao gam dalam labaih 10 thun tapa haong Kadung jien bac Vừ A Dính, jao alin yaok rabau paok jien bac ka anek bik urang bangsa takik, dom anek di urang jakar urang lin bhum tasik pulao kaoh di grauk labik dalam taneh ia.

Amuk Đặng Thị Kim Oanh – Akaok Kapul khik ramik di Kapul Kim Oanh brei thau, Công ty maong nan lac bruk njauk ngak di drei ngan haong rahra, lac bruk bui sambai hu daong ka anek saih kan kandah hu nao tal sang bac saong caong maong dom adei hu rik daong dak padang taneh ia, palei negar./.