Di Sang ilamu puk Đông Định, sa blah ba-ar hu mbat tagok hu cih haroh yau ini: “ Ghe pajeng urang ruak oh mek jien di puk Đông Định. Phone ka 0902.328250 atau 0857.874219". Nan lac panuac brei thau bruk pajeng urang ruak oh mek jien ka bhap bini dalam palei di ong Tám Thuận. Urak ini, ong Nguyễn Văn Thuận lac Ủy viên Ban Chấp hành Hội Chữ thập đỏ xã Tân Thuận Đông, Akok dhar kapul Urang taha umo puk Đông Định.

Tui ong Nguyễn Văn Thuận, puk kaoh pulao Đông Định lac sa dalam 4 puk di xã Tân Thuận Đông, hu labaih 700 baoh sang bhap bini.  Meng Đông Định khin tapa tal pasak ban Cao Lãnh saong Sang iek ruak Đa khoa Đồng Tháp brei tapa dua mbang ghe, abih rilo tukvak cang. Piah pajeng urang ruak hu samar tame sang iek ruak, thun 2008, hu bruk pachreih tui di karja palei, ong  Tám Thuận jak ba  urang rik jien tame, blei sruh ghe “tắc ráng” klak saong sa jamriak ‘”đuôi tôm”. Laik phone taduan manuac khin pajeng urang ruak tagok sang iek ruak hu khan brei abih puk thau saong peih luac harei melam. Ong Tám dang bruk saong dom urang halan hatian peih ghe, ba urang ruak dalam puk tal sang iek ruak.

Meng hu sruh “tắc ráng” klak saong dom urang peih ghe ngak bruk abih hatai, biak ralo urang ruak trak hu tal sang iek ruak cấp cứu sumu. Meng siam lagaih di bruk ngak ba mai, bruk pajeng ba urang ruak meng jalan kraong ia di ong Tám Thuận hu khik ramik labaih 10 thun ini mai. Ong Nguyễn Văn Thuận kuhria mboh lac : “Meng thun 2008 mbiah tal ini, khol dahlak pajeng hu abih tih 900 mbang urang. Jien blei menyek, nhớt, pasiam mac jamraih… jaik 5 trieu đồng sa thun hu sang dahlak saong dom urang ngak pahala rik tame’. Thun 2019, meng jien XHH, ong Tám Thuận blei hu sruh “tắc ráng” composite birau (pajeng trak hu 3 tấn), hu pagam rilo pandap njauk hu angaok ghe saong phao caluai ia; padang ngak labik piah ndik tame ghe piah mbuan lagaih pajeng urang ruak trun tagok ghe.

Tapa dom mbang pajeng ba urang ruak oh mek jien, ong Tám gaok rilo  urang sang kan kandah. Meng angan je di drei, ong haong dom urang ngak pahala rik jien tame daong urang kan kathaot, yau daong jien ka urang ruak kathaot rambah; brei brah saong pandap mbang yaok harei; padang ngak, pasiam veik sang anit ranam…

Ong Phan Hoàng Huy, Phaok Akok UB bhap bini xã Tân Thuận Đông brei thau: “ Ong Tám Thuận abih hatai haong bruk ngak pahala daong ka puk paga. Abih di nyu lac, bruk pajeng ba urang ruak meng ghe  di ong peih ngak yaok pluh thun ini mai, rik daong tame iek glang prein yawa ka bhap bini. Ong lac kreih camin dalam bruk ngak pahala, brei ka bhap bini dalam palei bac megru ngak tui”.

Tal urak ini, yaom lac umo 80 thun min angaok sruh radaih juak, ong Tám Thuận trun tagok nao ngak rilo bruk daong ka urang. Meng dom bruk ngak pahala daong manuac sia, ong Tám Thuận taduan hu rilo Harak meyaom. Njauk ndem tal di abih nan lac, ong hadah mbaok meta hu Thủ tướng Rajaei alin brei Bằng khen kayua hu ngak rilo bruk siam gheih dalam bac megru saong ngak tui jalan hadah krah siam mekre di Ho Chi Minh./.

Urang lang: A.Nghiêm – 21/2/2022