Kadha dah krah di “Manuac gheih bruk siam” adit ini, kon dahlak hulin likau khan yaih kadha cih vak di Ngọc Hoàng hu ba tagok hala harak mbao Đồng Nai ndem ka ong Bùi Văn Luyện lac urang nong naih joi:

Sang ong Bùi Văn Luyện hu labaih 4ha taneh pala phun durain brei mek baoh, dalam nan hu labaih mateh mblang taneh bein hu umo meng 15 tal 20 thun. Dahlau deih, bein phun durain di sang ong Luyện tuk halei jeng bak hareik hrom, bruk ramik hareik, puh bein, buh khak, pruh ia njauk apah manuac ngak, lahik biak rilo jien buh tame. Dalam tuk nan dam dara urang ngak di dalam puk palei jeng hu ralo urang nao ngak mbang atah di dom labik ngak kong yau nan ye sang ong gaok biak rilo kan dalam bruk pah manuac sangka iek glang bein apuh.

Mai meng dom kan daman nan, ong Bùi Văn Luyện kham saneng marat duah, ngak tabiak sa baoh jamraik daong manuac ngak tangin cakak hareik. Ndem hu lac ngak hu, hadei di sa labaih tukvak roh duah thun 2020, sa sruh mac cakak hareik otomatik barau hu tabiak mbaok. Langiu di dom janih jamraik njauk blei barau ong nao duah blei dom janih jamraik pandar blaoh ba mai ngak jamraik di drei daong kurang jien buh tame ralo. Don baoh chruh jamraik ong ngak tabiak hu rilo kein lagaih dalam bruk cakak hareik di abih tih mbaok tanah dalam bein, prein cacak khang ralo labaih 4 mbang dut saong jamaraik cacak meng tangin dalau. Ong Luyện brei thau lac, chruh jamraik ini meda cacak hu 1ha taneh dalam sa harei mang abih 3 lít manjek min. Kayua yau nan ye, bruk ngak bein jeng hanjul njac jang, urang cakak hareik daok di angaok radaih gam ba radaih gam par to dhaong cacak hareik, gam tui iek phun pala dalam bein lac hu halak halieng atau oh piah ramik caga. Oh lac bruk ngak tabiak mac cacak hareik otomatik, ong Luyện daok ngak tabiak dom janih jamraik karei, yau ye jamraik cacak hareik di gok phun durain jhul meng tangin, jamraik cacak caklik dhar hala piah ngak khak, mac bluh hala saong mac pataom mek hala…  

Amuk Lê Thị Thêm, Akaok Kapul urang ngak nong di xã Xuân Định brei thau lac, Xuân Định hu labaih 450ha taneh pala phun durain, bhum taneh riya ini ieu ndok ralo meng prein manuac ngak. Kayua yau nan ye, dom baoh jamraik kayua ong Luyện ngak tabiak daong patrun jien padai buh tame, patrun prein yawa manuac ngak, daong kein lagaih patagok bruk ngak mbang kinh tế.

Ong Phan Thanh Xứng, Akaok Kapul urang ngak nong di Xuân Lộc brei thau, Xuân Lộc hu padang ngak jeng 9 bhum pataom ngak hu dom janih phun pala, yau ye njam patam, baoh pa-aok, baoh naga, amaraik kalu, durain, rambut, kruac bung kanduh hijau… ngan haong taneh praong labaih 20 ribau ha. Kayua yau nan ye bruk pandar ilamo jamraik tame bruk njauk ngak. Tukvak masa mai tal, Kapul urang ngak nong meda ba mikva nao rivang iek, bac magru di dom labik ngak pandar jamraik ilamu glaong, dom labik ngak tabiak dom jamraik daong ka urang ngak nong hu siam lagaih yau ye labik ngak jamraik cacak hareik di urang ngak nong Bùi Văn Luyện. Gam tui di nan jeng daong phun jien piah ka urang ngak nong rami ramik jamraik ba tame bruk ngak mbang, pala drak./.