Labaih 20 thun ngak bruk jhik khan aw, saai Nguyệt tuk halei jeng sahaneng tal bruk ini, nan ye khang hatai gam haong adei kumei peih cửa hàng 0 đồng thun 2022.  Kadha vak hadei ini di Minh Tâm hu khan veik dalikan ndung bak hatai anit ranam ini.

Saai Đoàn Thị Nguyệt, umo 46 thun, lac po labik pablei aw tah di jalan Đặng Văn Bi, P.Trường Thọ, ban Thủ Đức brei thau: hatai sahaneng ka cửa hàng hu tabiak rai meng 4 thun dahlau tuk sa adei kumei bhang meta mai jhik aw tah. Amaik di adei nan khan lac njauk patak pataom luac thun meng ginup jien piah jhik hu sa blah aw tui hatai caong di anek di drei. Saai Nguyệt biak drut droi nan ye ginum haong adei kumei ka bruk ngak brei cửa hàng di drei jeng labik pabak aw tah oh mek jien ka dom urang gaok kan kandah. Saai caong urang kumei Việt Nam yaom lac urang halei, thar vak yau habar jeng hu cuk aw tah.

Meng nan, saai caik tukvak piah nao likau dom tuai bhian randap, ayut saabat, gauk gar alin hadiah brei aw tah klak. Dalam nan jeng hu rilo aw tah di gauk gar dalam sang di saai. Dom blah aw tah hadei di tuk taduan mek meng dom urang alin brei, hu pasang iek, ngak pasiam veik, papah hacih saong ủi tapak. Saai Nguyệt daok parabha tui sambo, caik số đo 3 vòng tagok aw piah tuai duah hu aw tui njauk hatai caong. Harei 8/3/2022, cửa hàng aw atah 0 đồng di dua adei saai Nguyệt hu peih pakak.

Harei camriep, 300 bộ aw tah di saai hu brei abih ka dom adei saai takre. Dom tuai rilo meng lac dom urang kumei pablei vé số, rao panyin jam mbang pah, urang ngak kan kathaot… ka oh sa mbang dalam rai hu cuh aw tah. Ngan haong dom urang karei, nan lac blah aw klak, min ngan haong dom urang ini, nan lac paok pandap hadaih biak hu yaom, tal tuk lahik nao jeng caong hu ba tui.

Saai brei thau, aw tah 0 đồng hu caik dalam cửa hàng brei mboh hu bruk iek praong ngan haong dom urang mai taduan mek. Hadei di mateh thun peih tabiak, mboh lac hu menuac hu jien padai jeng mai likau aw tahi 0 đồng nan ye saai meng brei peih sa harei dalam adit. Bak sa thun, cửa hàng di saai Nguyệt hu alin hadiah labaih 5.000 bộ ka dom urang caong hu. Kuhri kuhria ka cửa hàng aw tah 0 đồng, ngak ka bruk ngak mbang di saai laik trun, min oh lac kayua yau nan bo saai padeih ngak. Saai Nguyệt brei thau, mayah tiệm jhik oh hu thei ngak veik, saai meda padeih ngak min aw tah 0 đồng jeng daok hu khik veik. Saai daok ngak mbiah tal tuk halei oh daok prein meng padeih./.