Pak di dalam mbang sinh hoạt camriep, adei Dương Nữ Kim Xuân Viên, urang dalam Kalup kapul tok gauk tuk ka oh ginup umo thun tui hukum, tok gauk dalam but pajaih di Sang bac Phổ thông Bangsa gam bac gam daok THCS huyện Thuận Bắc hu pathau khan ka dom adei dom asal kadha di Hukum lakhah caga saong baoh sang. Tapa pathau khan hu daong ka dom adei thau cambaih ka dom kan kandah, dom kanjak jhak di bruk tok gauk tuk ka oh ginup umo thun saong tok gauk dalam but pajaih. Adei Dương Nữ Kim Xuân Viên saong adei Thập Nhất Linh Đan brei thau: “Harei ini, Sang bac peih dom bruk ngak pacang caga bruk tok gauk tuk ka oh tal umo thun ye adei hu pang pathau khan lac oh anit ranam saong khin lakei aval jang…”, “Lac urang dalam kalup kapul ye drei jeng oh hu khin lakei aval…”

Dalam thun bac 2022- 2023 ini, Sang bac Phổ thông Bangsa gam bac gam daok THCS Thuận Bắc hu jhul khang bruk pathau khan ka dom kan kandah, dom kanjah jhak di bruk tok gauk tuk ka oh ginup umo thun saong tok gauk dalam but pajaih. Langiu di nan, mban par akaok Kalup kapul daok hu brei bruk ka dom urang dalam kalup kapul nao tal yaok baoh sang anek saih mbuan hu bruk tok gauk tuk ka oh tal umo thun tui hukum saong tok gauk dalam but pajaih piah thau cambaih bruk, meng nan bo pathau khan, jak ba, daong ka anek saih saong amaik ame mboh hu kan kandah jang yau dom kanjak jhak di bruk tok gauk tuk ka oh tal umo thun tui hukum saong tok gauk dalam but pajaih. Adei Chamaléa Thị Tuyết Trinh, tal bac 8/1, Sang bac Phổ thông bangsa gam bac gam daok THCS Thuận Bắc, Ninh Thuận, lac: “Di palei adei, xã Lợi Hải ye adei mboh bruk tok gauk tuk ka oh ginup umo thun lac biak rilo. Tuk hu cei gru, nai gru pathau khan ka bruk pacang caga tok gauk tuk ka oh ginup umo thun tui hukum ye adei mai palei ieu abih gauk jhui tok diuk, tok pasang saong menek tuk umo thun daok sit. Kayua nyu ngak kan kandah tal bruk bac taa saong oh siam tal harei hadei.”

Tui amuk Nguyễn Thị Kim Sáng, akaok Sang bac Phổ thông bangsa gam bac gam daok THCS Thuận Bắc, oh padeih di bruk pathau khan dalam sang bac, Kalup kapul jak ba hu 2 urang tok gauk tuk ka oh ginup umo thun klak bac mai bac gilac veik. Meng akaok thun tal ini, sang bac oh daok anek saih halei klak bac, padeih bac kayua tok gauk tuk ka oh ginup umo thun saong tok gauk dalam but pajaih. Amuk Nguyễn Thị Kim Sáng ndem lac: “Bruk tok gauk tuk ka oh tal umo thun di huyện Thuận Bắc jeng daok rahtabiak. Kayua yau nan ye, piah ka dom adei saneng njauk ye sang bac jeng hu peih bruk pathau khan cambaih laih ka dom adei saneng njauk piah plaih di bruk tok gauk tuk ka oh ginup umo thun tui hukum. Dalam tuk padang Kalup kapul ye sang bac ngak siam bruk pathau khan. Ngak habar ka dom adei bac magru, roh duah piah ka dom adei thau cambaih ka bruk tok gauk dalam but pajaih piah ka dom adei saneng njauk piah jeng dom menuac pathau khan siam abih dalam sang bac saong langiu puk palei”

Tal urak ini, tỉnh Ninh Thuận padang hu 14 kalup kapul “Pacang caga bruk tok gauk tuk ka oh ginup umo thun tui hukum saong tok gauk dalam but pajaih”. Dalam nan hu 3 kalup kapul hu padang tagok di dom Sang bac Phổ thông bangsa gam bac gam daok. Meda ndem lac, bruk padang Kapul kapul “pacang caga bruk tok gauk tuk ka oh ginup umo thun  saong tok gauk dalam but pajaih” dalam sang bac hu caong lac jalan ngak siam lagaih dalam bruk pathau khan patakik veik bruk tok gauk tuk ka oh ginup umo thun tui hukum tuk dom adei daok bac dalam sang bac. Piah ngak hu bruk ini, brei hu bruk ba tangin tame di rahra, abih di nyu nan lac patagok bruk ngak di yaok urang dalam kalup kapul pathau khan ngak patrun patakik bruk tok gauk tuk ka oh ginup umo thun tui hukum saong tok gauk dalam but pajaih  pak di dalam palei drei daok./.

Urang lang: Thu Thảo