Hadei di tuk padeih hưu, ong Bo Bo Bi caik rilo tukvak piah sangka bein phun mbang baoh praong 1ha di sang ong. Dahlau di nan, sang ong pala patei, tal thun 2000 salih tapa pala kruac bhung kanduh hijao tai hồng, blaoh pala phun durain daok tal bilan paik baoh.                                                                                  Piah hu ilamo sangka phun kruac bhung kanduh hijao saong phun durain, langiu di bruk bac megru ilamo meng ayut saabat, ong daok duah thau tapa mạng xã hội piah duah dom jalan pala dom janih phun nan ba mai kein laba kinh te glaong yau di Tiền Giang, Đồng Nai…   

Urak ini sang ong Bi daok hu 160 phun kruac bhung kanduh hijao (dalam nan hu sa meteh daok paik baoh) saong 60 phun durian daok dalam tuk cak rok patagok. Ong Bi brei thau, yaom baoh kruac bhung trun tagok sarau kadhau nan ye oh kuhria dahlau hu hagait. Yau ye thun 2019 yaom kruac bhung meng 40.000-45.000/kg, tal thun 2021 yaom pablei meng 15.000 – 20.000 đồng/kg; akaok thun 2022 ini yaom meng 10.000 – 12.000 đồng/kg.  Dalam tuk Tết Nguyên đán thun sak tapai 2023, sang ong tui kuhria paik hu 1 tấn baoh, ngan haong yaom 8.000 – 20.000/kg ye jeng duah hu hasit jien piah mbang Tết. Tuk sua tangi ka hatai caong dalam thun bahrau 2023 ini, ong Bi caong lac drei hu jeng urang ba akaok nao dahlau dalam bruk ngak du lịch sinh thái di palei Bạc Rây 1 ini. “Dahlak caong drei meda lac menuac ba akaok nao dahlau palei Bạc Rây 1 ka bruk ngak du lịch sinh thái rahra. Mayah hu Đảng, kanja sangka daong brei masaiy jien, dahlak meda ngak 2 baoh sang tuan  jaik taphia bein. Tuk hu sang blaoh dahlak meda ngak du lịch rahra. Daok caong khin yau nan, min ka oh ngak hu kayua ka oh hu jien...”

Tui saai K’tơ Chinh – urang jakar ngak nong di xã Phước Bình, huyện Bác Ái, ong Bo Bo Bi lac urang ba akaok nao dahlau di palei dalam bruk pandar ilamo kỹ thuật tame pala kruac bhung, durain. Meng hu yau nan bo bein sang ong Bi cak rok tamuh siam. Oh padeih di nan, meng bruk lac urang Đảng, ong caong drei meda jak jeng haong bruk ngak du lịch sinh thái rahra di mangaok mblang taneh  sang drei. “Bruk ngak di sang ong Bo Bo Bi dut saong dom baoh sang karei dalam palei hu siam jang, thau pandar ilamo kỹ thuật tame bruk ngak mbang. Tui jalan daok kuhria ngak di sang ong Bo Bo Bi, lac pala phun mbang baoh njauk pambuak haong ngak du lịch sinh thái rahra. Dom adei saai, ayut saabat atah jaik meda mai tal ravang me-in, ba drei tame, mbang dom baoh kayau di bein. Blaoh sang ong daok palao raong manuk di bein piah duh ka tuai meng dom pandap mbang angan je di urang Raglai pak ini nan lac manuk am haong lasei lam.”

Ong Phạm Phùng Bảo Châu, akaok UBND xã Phước Bình, huyện Bác Ái brei thau, dalam xã prein khang rilo meng lac cak rok patagok ngak nong, dahlau deih pala patei, pala đào,  dalam dom thun jaik di ini, mboh lac phun mbang baoh lagaih haong langik tasik di pak ini. Abih di nyu nan lac janih baoh hu pasiu, yau kruac bhung kanduh hijao, durian, quýt, cam… Tal urak ini, taneh pala kruac bhung kanduh hijao jeng hu labaih 200ha saong tuk camriep hu ba mai kein laba kinh tế. “Meng dom danak dak daong ba di Kanja, rilo baoh sang di Phước Bình tari tareng, kham marat salih janih phun pala piah paglaong jien mek tame. Meng nan bo yaok thun trun hu labaih 5% sang kan kathaot. Tal puac thun 2022 daok gilac labaih 20% sang kathaot. Dalam xã urak ini hu labaih 1.026 sang ngan haong labaih 4.490 urang, dalam nan sang kan kathaot lac 306 baoh.”

Hu siam lagaih meng hu bruk sangka buh jien tame di Kanja, ong Bo Bo Bi jak ba phun jien meng gauk gar dalam sang saong but pajaih, 2 baoh sang tuan tui tanut chuẩn di Kapul du lịch tỉnh Ninh Thuận meda hu padang ngak dalam thun bahrau 2023 ini. Gaom haong nan, ong jeng daok jak ba 2 anek kumei di drei hu mbaok tame tal pato pasram ilamo ngak du lịch rahra. Caong lac tapa thun bahrau thun sak tapai, sang ong meda raok hu kapul tuai du lịch mai palei Bạc Rây 1, xã Phước Bình./.