Thun 1989, bác sĩ Đẩu saong dom urang ngak di Sang iek ruak Nhi đồng 1  peih bruk blaic raih jhik dom cambuai mbaih ka dom uranaih hu khe hở môi vòm. Yaom lac mbang blac raih camriep oh hu hagait dut saong ilamo urak ini, min hu daong ka bác sĩ Đẩu saong dom urang ngak khang hatai jia jang piah peih tabiak jalan duah veik cambuai klao ka ranaih oh patuah njauk mbaih cambuai, hở vòm.

Meng jak jeng ini bo ong daok hu rilo mbang blac raih ka uranaih njauk mbaih cambuai, hở vòm. Tui bác sĩ Đẩu, dalam hatai saneng di rilo urang, dom menuac jhak meng manek tabiak anek mbaih cambuai, hở hàm ếch. Nan lac dom jalan saneng oh njauk, ngak ka rilo baoh sang mesuh gauk,  hu sang calah gauk kayua oh patuah, anek di dom urang ini njauk dị tật meng di tuk bahrau manek tabiak. Gaok mai, rilo anek kamar oh hu tabiak dunya kayua amaik ame saong gauk gar huac panuac klao hia di menuac sia dunya.

 “Drei lac amaik di Dâu Tây, anek drei njauk mbaih cambuai meng di tuk daok dalam tain amaik. Harei thau lac anek drei njauk dị tật bẩm sinh, drei biak haduh hatai. Hadei di tuk duah thau, drei hu nao duah bác sĩ Đẩu saong hu bac si langyah brei thau biak cambaih laih. Hadei di tuk anek drei manek tabiak, hu bac si blaic raih. Urak ini anek drei lac uranaih umo 5 thun biak mekre saong cambuai tuk halei jeng khim klao. Mayah oh hu bác sĩ Đẩu, oh thau raidiuk di anek amaik di dahlak yau habar. Biak thau dhar phol bác sĩ Đẩu, ong Bụt di ranaih mbaih cambuai, hở hàm ếch”. Nan lac panuac di amaik ranaih An Nhiên (angan daok pak sang ieu lac Dâu Tây, daok di quận Phú Nhuận, TPHCM) brei thau ka jalan duah veik cambuai khim klao meng bruk daong prein di bác sĩ Nguyễn Văn Đẩu.

Atau yau bruk di adei Kiên (umo 5 thun, daok di ban Thủ Đức, TPHCM) jeng hu bác sĩ Đẩu ngak brei mekre veik hadei di 3 mbang blaic raih ngak veik cambaui klao. Saai Hải Yến, amaik di adei Kiên brei thau: “Yaok mbang saneng tal jalan duah veik cambuai klao ka anek di drei lac dahlak biak drut drui, oh pacang hu ia mata. Nan lac jalan nao biak kan kandah, glaih glar min biak patuah, jalan nao di kol dahlak hu bruk yam takai nao gam di bác sĩ Đẩu”.

Labaih 30 thun peih bruk blaic raih duah veik cambuai klao ka ranaih, bac si Nguyễn Văn Đẩu oh hadar hu hadom uraniah hu ong blac raih, min ngan haong ong, yaok uranaih lac sa thiên thần saong dom adei njauk hu anit ranam, hu gheih, mekre. Langiu di bruk ba tangin tame blac raih tapak ka yaok rabau uranaih jaoh jo, ong daok bhian pambuak bruk haong dom kapul ngak pahla dalam saong langiu di taneh ia piah rik daong, padang Kadung jien kayua cambuai klao di uranaih Smile Train blaic raih oh mek jien ka uranaih. Ong saneng lac, jhik dom labik laka, duah veik cambuai klao oh lac taong ruak bo daok  ngak siam hatai saneng, salih veik rai di uranaih. Cambuai klao slut mbut gam haong sap ndem menyai bingi pang lac bruk bo menuac urang caik dalam hatai tuk bahrau gaok bác sĩ Nguyễn Văn Đẩu. Urak ini, tuk tapa umo 60 thun, yaom lac hu harak padeih huu, min ong jeng daok veik ngak  “cố vấn chuyên môn” ka Khoa Răng Hàm Mặt, Sang iek ruak Nhi đồng 1.

Saong yaok harei, dalam bilik blaic raih dah gom, dua plak tangin di urang bác sĩ taha nan jeng daok kham merat jhik piah hu dom cambui klao ka dom uranaih./.