Ong daok buh pren pakacah gauk ngak mbang pala drak, patagok kinh tế baoh sang, rik daong ka bol bhap rahra, ka puk palei dak harei dak kaya meda jang. Kadha vak di urang pambuak bruk Lê Na – Rayo papar sap pandar binguk tỉnh Ninh Thuận:

 Dalam bruk ngak ka bol bhap rah ra ngan haong bruk ngak lac Akaok Mban ngak bruk Mặt trận palei Kiền Kiền 2, ong hu dang tabiak pambuak bruk haong dom uang dalam Mban peih ngak dom bruk pathau khan, jak ba mikva dalam palei pachreih tui dom bruk ngak kayua xã ba tabiak yau: Puh ramik hacih sa-at jalan palei; raong kreik anek thur atah di labik daok;  rik pataom jien padai tame kadung jien ba-yar dhar phol, kadung jien brei ka urang kathoat, kadung jien ribuk aia sua saong dom janih kadung jien karei kayua Kapul pakat angaok saong puk palei ba tabiak; pathau khan jak ba mikva urang nong hu mbaok tame dom bruk salih janih phun pala athur raong, pandar ilamu kỹ thuật tame dalam bruk pala drak saong raong glang; tapa nan patagok năng xuất phun pala, anek athur raong ba jien mek tame ka urang nong.

 Ong Ninh brei thau: "Dom urang kan kandah, atau dom urang oh thau rilo ka ilamu raong limo atau ngak nong, ye Wa brei njim yau limo, radaih limo piah ngak mbang. Drei ngak habar ka sang drei cak rok patagok, thei jeng hu sang daok, thei jeng hu lisei huak, ao cuk, drei kham merat yam tagok".

 Ong Ninh daok dang tabiak jak ba dom bruk pakacah gauk ranam taneh aia; peih ngak adat hukum di puk palei; pasang iek bruk ngak di dom ban ngành, urang lambaok ka bhap bani, urang jakar; hu mbaok tame bruk langyah dom cuang kandah dalam palei, peih ngak Harei Gul pataom taong abih bangsa di labik daok; pathau khan ka mikva dalam palei salih hatai saneng, tah klak dom adat cambat tanarakun oh daok laghaih dalam bruk ngak lakhah, bruk ngak ndam… 

Abih di nyu lac thun 2021, meng tuk jit Covid-19 tamuh khang ngak ka mikva dalam palei thei jeng huac, jeng duh hatai, ong haong dom urang karei dalam  Mban Ngak bruk Mặt trận palei nao tal yaok baoh sang, jak ba mikva dalam palei peih ngak dom jalan pacang caga jit Covid-19 kayua karja puk palei ba tabiak yau: Cuk suek pabang mbaok, oh ngak ndam lakhah, oh pataom rilo manuac di dom ndam metai… Langiu di pathau khan, jak ba, ong Ninh daok hu mbaok tame Kapul khik iek, pacang caga jit Covid-19 di palei; hu mbaok tame bruk jak ba jien ndo brei Kapul khik iek, pacang, caga jit Covid-19; daong labik brei daok karei ka urang ruak Covid-19 di xã dalam palei Kiền Kiền 2; pathau khan jak ba bhap bani klauk vắc xin pacang caga jit Covid-19…

 Langiu bruk ngak di urang dang akaok mban ngak bruk Mặt trận palei, ong Ninh daok lac akaok dhar kapul raong pabui Thuận Bắc tui chuỗi giá trị xã Lợi Hải. Hu bruk sangka di karja palei saong Kapul urang nong pakat angaok tacei pato ilamu pathau khan, jak ba dalam bruk ngak di kapul urang nong. Ong haong dhar kapul hu mbaok tame bruk pathau khan, jak ba urang dalam kapul hu mbaok tame dom bruk ngak yau: Bruk taong abih bhap bani gul pataom dak padang rai diuk bahrau, dak padang rai diuk ilamo di labik daok saong dom bruk ngak karei kayua puk palei saong Kapul nyaom pakat angaok ba tabiak. Meng ngak siam bruk pathau khan, jak ba bo dom bruk ngak, dom bruk jak ba jeng hu mikva urang nong pachreih tui. Abih di nyu lac bruk jak ba mikva hu mbaok tame dom tal bac bruk ngak katut panak ka urang ngak di puk palei: yau bruk raong pabui, raong menuk palao dalam bein, ngak padai…

 Langiu di nan, ong Ninh daok pambuak bruk padang dhar kapul ngak bruk raong pabui jhuk Thuận Bắc tui chuỗi giá trị ngan haong 17 urang hu mbaok tame cak rok patagok bruk raong pabui jhuk saong menuk Thuận Bắc, urak ini daok hu peih prong hội viên di dhar kapul Nghề nghiệp.

Amuk Chamalea Thị Hương urang daok dalam dhar kapul bruk ngak raong pabui jhuk Thuận Bắc brei thau: "Cei Ninh hu tacei pato jalan raong pabui, blaoh daok brei jien njim piah blei pabui mai raong. Tuk pablei tapon pabui drei hu jien, drei ba-yar gilac veik ka wa".

Langiu di sami samar, abih hatai dalam bruk ngak kayua karja palei saong kapul pakat angaok jao, ong saong sang ong tuk halei jeng ba akaok nao dahlau ngak siam jalan ba di Đảng, sarak hukum di Karja, abih hatai ngak dom bruk kayua puk palei ba tabiak; tuk halei jeng gul pataom haong mikva dalam palei; sang ong daok lac kareih camin hadah yam tagok cak rok patagok kinh tế baoh sang piah ka mikva dalam palei, dalam xã bac megru tui: Urak ini sang ong daok ngak bruk sai padai, raong pabui, menuk, limo, ngak padai saong pala dom janih phun yau dưa hồng kim, tangeiy, patei, kandiuk; pablei salih điện aia harei caik tabung ngan haong phun jien buh tame ngak labaih 750 triệu đồng. Ba jien tame tani tanat ngan haong jien laba yaok thun lac labaih 250 triệu đồng.

Ong Võ Ngọc Phương, Akaok UBND xã Lợi Hải, huyện Thuận Bắc brei thau: "Cei hu mbaok tame dom bruk ngak nong di Kapul urang nong. Di palei, Cei jeng hu mikva jia tui saong iek prong, iek glaong".

Meng điện aia harei di sang, pabak ka bruk sai padai ka mikva haong yaom jien lap. Dalam bruk ngak nong, ong tuk halei jeng klah rabha ilamu dalam bruk pala drak saong raong glang piah ka mikva cak rok patagok kinh tế sang, paglaong jien mek tame.

Meng dom rik daong siam dalam rilo thun gam, ong Chamaléa Ninh hu karja palei, kapul nyaom dom pakat pok brei rilo harak me-yaom. Abih di nyu lac, dalam thun 2020 ong hu UBND tỉnh pok brei harak meyaom kayua hu thành tích naih gheih dalam bruk pakacah Urang nong Ninh Thuận gul pataom daong ba gauk ngak mbang pablei salih naih joi ngak kaya meda saong patrun kathaot khang kajap vaktu 2016-2021./.