Ong Thạch ndih tapui thun 1971 di palei Cam Hữu Đức, huyện Ninh Phước, tỉnh Ninh Thuận - lac labik pasak di ilamu, daoh tamia Cam. Ong takre alat ragam Cam meng tuk umo 13 thun. Meng nan, nyu pachreih ong khang hatai tui bac meng ame di drei, saong aruah nghệ nhân ưu tú Thiên Sanh Thềm daok dalam palei. Tuk camereip, ong tui bac taong Ginăng, tal thun umo 23, ong taong biak gheih 72 kadha Ginăng, jeng urang taong Ginăng duh ka bruk ngak adat cambat meng kan di urang Cam. Hadei di tuk tok diuk saong tui diuk nao daok di palei Bàu Trúc, ong patuah hu nghệ nhân Saranai lac ong Đàng Tà pato yuk Saranai saong taong Ginăng, me-in Baranưng. Urak ini ong lac urang duy nhất di palei Bàu Trúc me-in saong pato dom janih alat ragam meng kan di urang Cam brei ka mikva dalam palei. Ong Đàng Năng Thạch khan lac: "Dahlak likau di ong taha 92 thun pasram yuh saranai, brei saranai mai ka dahlak pasiam abih lime thun. Ong patua veik 5 thun nao ka, ong taha nao blaoh dahlak yuh duh pamere ka tuk ngak yang mebang dalam bhap bini..."
Meng hatai takre alat ragam meng kan saong caong khin likei dam bangsa Cam jeng thau tal alat ragam bangsa, ong Thạch hu caik tabiak dom harei puac adit piah pato me-in alat ragam ka dom likei dam, urang praong thun dalam palei. Meng abih hatung hatian di drei, dom urang hu ong pato urak ini lac dom menuac dalam kapul alat ragam Cam hu angan di palei. Ong Quảng Đại Trị, urang bac yuk Saranai brei thau: " Drei khin bac pasram yuh saranai piah khik ramik veik ilamu Cam drei"
Ong Đàng Chí Quyết - Bí thư chi bộ palei lan am Cam Bàu Trúc brei thau, ong Thạch lac sa urang nong slut mbut, ba akaok nao dahlau ngak njauk tui dom jalan ngak, dom sarak di palei, bo daok abih drei hu mbaok tame dom bruk ilamu daoh tamia. Gam haong nan, ong daok abih drei rik daong ka bruk cakrok du lịch bhap bini di palei ngak. Lac urang dalam Mban du lịch bhap bini palei Bàu Trúc, yaok mbang tuk hu tuai du lịch mai, ong saong anek saih di ong jeng hu mbaok tame parang me-in dom alat ragam Cam brei ka tuai maong iek, yaih khan brei tuai damuai thau dom gheih mekre dalam ragu ragam Cam.
Meng hatai takre dom alat ragam meng kan, ong Đàng Năng Thạch oh lac pabak hu hatai takre di drei meng bruk kham merat, ong daok hu ba alat ragam Cam nao jaik haong tuai damuai atah jaik, patoa veik ka dom rairah…rik daong khik ramik yaom glaong ilamu meng kan di bangsa./.
Viết bình luận