Palei Phò Trì, xã Tân Thắng, huyện Hàm Tân urak ini hu labaih 570 baoh sang, dalam nan hu jaik 400 baoh sang urang Cam Awar. Dom thun jaik di ini, rai diuk di urang Cam palei Phò Trì hu rilo salih bahrau, abih di nyu lac meng tuk hu bruk padang ngak palei pala bahrau, rilo jalan palei hu tuh bêtông siam mekre, sang danaok di mikva hu padang ngak khang kajap ngak ka mbaok meta puk palei hu hadah hadai tagok. Mong mboh bruk salih bahrau di palei drei dalam dom thun jaik di ini, ong Huỳnh Văn Cơ, urang hu jaik 20 thun kak kajap haong bruk di palei biak bui sambai saong hadah mbaok meta kayua palei Phò Trì mek hu angan palei pala bhrau dalam thun 2022.

Ong Huỳnh Văn Cơ, akaok palei Phò Trì, xã Tân Thắng, huyện Hàm Tân, tỉnh Bình Thuận brei thau: “Dahlau di thun 2003 di palei Phò Trì ini hu tal 90% sang taik tahak, daning ngak meng haluk, tabung sang tak meng gak, daok veik nan lac sang tabung tôn. Tapa nan brei mboh rai diuk di mikva biak kan kandah. Meng bruk tari tareng sami samar di Mban khik iek palei gam haong taong abih hệ thống chính trị jak ba mikva yam tagok ngak mbang cak rok patagok kinh tế, ngak habar piah tapa truh eik, patrun kathaot, anek bhik hu nao bac tal labik tal dhua. Gam haong nan lac danak dak cak rok patagok mbang angui di Karja brei ka mikva urang bangsa takik, meng nan bo rai diuk di mikva hu tagok tui, labaih sa meteh dom sang hu sang danaok khang kajap.”

Ndom tal urang pan akaok palei Huỳnh Văn Cơ, mikva dalam palei Phò Trì thei jeng anit ranam kayua ong lac urang salut mbut, abih drei ka bruk ngak di palei. Ong bhian pambuak haong dom mban, ngành, kapul nyaom dalam palei pathau khan, jak ba mikva ngak siam dom bruk pakacah gauk, padang ngak palei pala bahrau, gul pataom gauk dak padang rai diuk ilamo saong khik ramik an ninh, trật tự. Hatai jia di mikva brei ka ong Cơ brei mboh di labik lac luac dalam 20 thun, ong tuk halei jeng hu mikva jia tui  saong pok ngak akaok palei.

Ndom tal urang pal akaok palei Huỳnh Văn Cơ, ong Đào Ngọc Sơn, daok di palei Phò Trì, xã Tân Thắng, huyện Hàm Tân, tỉnh Bình Thuận brei thau: “Ong Cơ biak abih hatai. Ong ngak bruk hagait jeng jeng hu urang lambaok gah agama, karja, mikva dalam palei. Ong abih drei jak ba mikva dalam palei rik daong jien padai piah ngak kalan kakuh yang, ngak habar siam ka agama, mekre ka rai diuk. Daok bruk ngak mbang ngak huak ye hadiuk pasang ong jeng hu ginup meda”.

Daok ong Thông Văn Bắc, Akaok mban Mặt trận palei Phò Trì, xã Tân Thắng, huyện Hàm Tân, tỉnh Bình Thuận ndom ka ong Cơ akaok palei yau ini: “Bruk pambuak gauk di mặt trận haong akaok palei biak khang kajap. Ong Cơ abih drei ka bruk di palei, abih hatung hatai haong mikva dalam palei. Ong tuk halei jeng duah jalan piah pambuak bruk haong dom ban ngành, kapul nyaom piah daong dom baoh sang kathaot, dom urang gaok kan kandah.” 

Piah pabak hatai jia di mikva, lac urang pal akaok palei, jaik 20 thun tapa, ong Cơ tuk halei jeng abih drei haong bruk ngak, kham merat pathau khan dom sarak bahrau tal mikva saong jak ba mikva peih ngak hu siam lagaih. Meng duah thau saong thau cambaih hatai saneng, rai diuk di yaok baoh sang, ong Cơ hu rilo jalan ngak piah khan brei thau jalan ngak, sarak di Đảng, Karja ka nyu laghaih haong yaok urang, yaok baoh sang, abih di nyu lac dom sang kathaot tuk halei jeng hu ong sangka daong ba, meng nan hu yam tagok tabiak truh kathaot khang kajap.  

 Dalam bruk pala drak, ong kham merat jak ba mikva salih janih phun pala, athur raong, ba dom pajaih padai hu năng suất glaong tame pala. Yaok thun, gam haong bruk buh jien tame ngak di Karja, ong Cơ hu jak ba mikva dalam palei alin hadiah taneh, rik daong harei ngak bruk, padang ngak palei pala bahrau.

 Ong Thông Văn Linh, Phaok akaok UBND xã Tân Thắng, huyện Hàm Tân, tỉnh Bình Thuận brei thau, rilo nhiệm kỳ tapa, meng bruk abih hatung hatai di ong Huỳnh Văn Cơ bruk pathau khan sarak jalan ba di Đảng daong ka mikva thau cambaih jang. Meng nan, mikva ngak njauk tui jalan ba, sarak, adat hukum di Karja, rai diuk dak harei dak glaong tagok. “Ong Cơ jeng lac urang hu angan je dalam bhum urang Cam daok pak ini, daong ka palei Phò Trì mek hu angan palei pala bahrau di xã, tapa bruk pan akaok palei di ong, mboh rilo mikva njauk hatai, hu mikva dak harei dak jia tui, meng nan rai diuk di mikva dak harei dak hu glaong tagok, mbaok meta palei pala hu salih bahrau, baoh sang kathaot patrun, yau thun 2017 palei hu tal 200 baoh sang kathaot, tal urak ini, palei daok 26 baoh sang kathaot min, rai diuk di mikva hu glaong tagok, thei jeng hu bruk ngak tani tanat, hu jien mek tame glaong”.

Langiu di ngak siam  bruk di urang pan akaok palei, ong Cơ daok kham merat cak rok patagok kinh tế baoh sang saong jak ba mikva ba gauk dak padang baoh sang trei sil, haniem phon. Piah ka mikva ngak tui, ong Cơ hu patagok bruk ba akaok, naoh dahlau dalam yaok bruk ngak di palei. Meng nan, mikva palei Phò Trì thei jeng ngak tui saong ngak siam jalan ba di Đảng, sarak, adat hukum di Karja, abih di nyu lac gul pataom dak padang rai diuk ilamo./.