Menuac sia dalam palei anit ranam ieu ong Hùng lac “kỹ sư oh hu jien bilan”. Kadha “Menuac gheih bruk siam” adit ini, kol dahlak likau khan ka ong taha Khmer ngak nong labaih 30 thun padang tatua ngak pahla. Kadha vak di Quốc Trinh angaok báo Nhân dân.

Menek tabiak saong praong tagok dalam bhum palei kan kathaot di ấp An Hưng, xã Định An, huyện Gò Quao (Kiên Giang), ong Danh Hùng bhian mboh rahra nao mai tapa dom mbaik tatua kreim sit danar. Mboh bruk suai salih bahrau di palei drei, ong suh sah, caong khin rik daong prein yava piah dak padang palei negar. Puac dom thun 80, ong Danh Hùng bhian tui ame nao grauk dom bhum palei Gò Quao padang tatua, padang jalan palei ngak pahla.

Ong Dương Đẹp, urang hu rilo thun nao gam haong ong Hùng padang tatua ngak pahla brei thau, yaok mbang ngak tatua atau padang sang ngak pahla, ong Danh Hùng bhian jak ba gauk gar dalam sang dahlau blaoh ka meng jak ba dom urang ngak pahla di gah langiu. Ong oh jak ba jien, bo tok jak ba pandap padang ngak, harei ngak bruk di rahra daok jaik sang saong di labik hu padang ngak.

Puac bilan 4 meng blaoh, amuk Thị Nhâm daok di ấp An Thuận, xã Định An bui sambai tame daok dalam baoh sang bahrau yaom labaih 70 triệu đồng. Klau adei sa-ai amuk Nhâm jeng oh hu pasang likei, lac sang kan kathaot. Raidiuk kan kandah, ngak pah duah jien mbang tapa harei, 3 adei sa-ai amuk Nhâm oh sahneng lac hu baoh sang gheih mekre. Akaok thun 2023, UB bhap bini xã Định An jak ba urang ngak pahla hu 40 triệu đồng daong ka amuk Nhâm ngak baoh sang bahrau. Meng yaom jien nan, biak kan piah amuk Nhâm hu sa baoh sang siam mekre. Thau hu bruk nan, ong Danh Hùng dang tabiak taduan ngak, oh mek jien pah padang ngak.

Baoh baha Sóc Ven bahrau, daok di ấp An Lợi, xã Định An hadei di labaih 10 thun ramik ngak veik, urak ini gheih mekre jang. Yaok bingu la di mangaok chánh điện, baoh sala 2 tal saong pabah mbang tame hu sarak biak gheih, sambo màu mekre meta, khang kajap… Ini lac bruk rik daong oh sit di ong Danh Hùng.

Raidiuk tani tanat, meng thun 2000, ong Danh Hùng caik veik taong abih taneh ngak hamu brei 4 urang anek pala drak, piah pataom tame ngak tatua, padang sang ngak pahla. Meng thun 1985 tal urak ini, ong Hùng jak ba dom urang ngak pahla dalam saong langiu taneh ia, pambuak haong karja palei padang ngak bahrau 40 mbaik tatua di xã Định An, yaom jien padang yaok mbaik tatua meng 40 triệu tal 100 triệu đồng.

Langiu di bruk padang tatua ngak pahla, dom thun tapa, ong Hùng hu rilo rik daong dalam bruk padang ngak palei pala bahrau di palei, abih di nyu lac ngak tatua, ngak jalan palei, padang sang ka urang kan kathaot. Ong Quảng Trọng Dũng, Phaok akaok UB bhap bini xã Định An brei thau, xã Định An hu biak rilo kraong ribaong, bhap bini gaok rilo kan kandah dalam bruk nao mai. Hu ong Hùng, tatua bê-tông hu salih ka dom mbaik tatua kreim sit. Ong Hùng lac urang hu angan je dalam bhap bini bangsa Khmer dalam palei.

Yaok thun, tal tuk Đôn Ta saong Tết Nguyên đán, ong Hùng jak ba gauk gar, urang ngak pahla jaik 100 triệu đồng blei pandap alin hadiah ka urang kan kathaot, urang taha daok sa drei, urang jaoh jo, urang gaok bala.

Ong Danh Hùng brei thau, ong daok caga ngak bahrau kinh Cống ka 4 pambuak pagam 2 xã Định An saong Vĩnh Hòa Hưng Nam, huyện Gò Quao yaom jaik 100 triệu đồng kayua urang ngak pahla di ban raya Hồ Chí Minh daong. Dua mbaik tatua tra jeng hu padang ngak saong hu ngak salah blaoh dalam bilan 6 meng blaoh./.